ປະທານາທິບໍດີບາຣັກໂອບາມາ ກໍານົດຈະສະຫລອງມື້ພັກວັນແຮງງານ ໃນສະຫະລັດໃນວັນຈັນມື້ນີ້ ໂດຍຈະກ່າວປາໄສຕໍ່ພວກສະມາຊິກຂອງສະຫະພັນແຮງງານ ກ່ຽວກັບເສດ ຖະກິດຂອງສະຫະລັດ ຢູ່ທີ່ລັດ Wisconsin ໃນອີກບໍ່ເທົ່າ ໃດຊົ່ວໂມງຂ້າງໜ້ານີ້.
ຄໍາປາໄສຂອງທ່ານໂອບາມາ ແມ່ນຈະມີຂຶ້ນໃນເວລາບໍ່ເທົ່າໃດມື້ ຫລັງຈາກມີລາຍງານສະບັບໃໝ່ອອກມາວ່າ ອັດຕາ ການຫວ່າງງານໃນສະຫະລັດໄດ້ເພີ່ມຂຶ້ນເປັນ 9.6% ໃນ ເດືອນແລ້ວນີ້.
ທ່ານໂອບາມາໄດ້ກ່າວຢູ່ໃນຄໍາປາໄສປະຈໍາສັບປະດາຂອງທ່ານ ໃນວັນເສົາຜ່ານມາວ່າ ວັນພັກວັນແຮງງານເປັນ ໂອກາດອັນນຶ່ງ ເພື່ອຢືນຢັນອີກຄັ້ງໃໝ່ເຖິງຄວາມໝັ້ນໝາຍ ຕໍ່ການສະໜັບສະໜູນພວກແຮງງານອາເມລິກັນ.
ວັນແຮງງານໃນສະຫະລັດໄດ້ເລີ້ມສະຫລອງກັນເມື່ອ 100 ກວ່າປີຜ່ານມາແລ້ວ ເພື່ອໃຫ້ກຽດແລະອຸທິດແກ່ພວກທີ່ເຮັດລ້າເຮັດການ ຈໍານວນຫລາຍກວ່າ 150 ລ້ານຄົນໃນສະຫະລັດ.
ແຕ່ເບິ່ງຄືວ່າວັນພັກມື້ນີ້ ຈະບໍ່ເປັນວັນສະຫລອງສໍາລັບພວກຄົນອາເມລິກັນຈໍານວນເກືອບ 15 ລ້ານຄົນ ທີ່ຍັງບໍ່ມີວຽກເຮັດງານທໍາ.
ສະຖານະການດ້ານແຮງງານໃນປັດຈຸບັນ ແມ່ນຄ້າຍຄືກັນຫລາຍກັບເມື່ອນຶ່ງປີຜ່ານມາ ຄືອັດຕາແລະຈໍານວນຄົນຫວ່າງງານປີນີ້ ແມ່ນເກືອບເທົ່າໆກັນວັນແຮງງານ ເມື່ອປີກາຍ.
