ຈີນໄດ້ຕັດສິນລົງໂທດນັກທໍລະນີວິທຍາອະເມຣິກັນຄົນນຶ່ງໃຫ້ຈຳຄຸກ 8 ປີ ຫລັງຈາກກັກຂັງຜູ້ກ່ຽວມາເປັນເວລາດົນກວ່າ 2 ປີເຄິ່ງ ໃນຂໍ້ຫາຖານລັກຂະໂມຍຄວາມລັບຂອງລັດ.
ສານປະຊາຊົນຊັ້ນກາງນຳເບີນຶ່ງຂອງກຸງປັກກິງ ໄດ້ຕັດສິນໂທດທ່ານ Xue Feng ວັຍ 44 ປີ ສັນຊາດອະເມຣິກັນ ໃນຂໍ້ຫາລັກລອບຄ້າ ຂາຍຄວາມລັບຂອງລັດ ໃນວັນຈັນມື້ນີ້ ຊຶ່ງເປັນເວລາ 1 ປີຫລັງຈາກເລີ່ມດຳເນີນຄະດີຜູ້ກ່ຽວ ແລະປະມານ 6 ເດືອນຫລັງຈາກຜູ້ກ່ຽວໄປຂຶ້ນສານຄັ້ງຫລ້າສຸດ. ນອກນັ້ນ ທ່ານ Xue ຍັງຖືກປັບໄໝເປັນເງິນ ເກືອບ 3 ໝື່ນດອນລາ.
ທ່ານ Xue ຊຶ່ງເກີດທ່ີປະເທດຈີນ ຖືກຈັບກຸມໃນທ້າຍປີ 2007 ຫລັງ ຈາກທຳການເຈລະຈາກັນເລື້ອງການຂາຍຖານຂໍ້ມູນ ກ່ຽວກັບອຸດສາຫະ ກຳນ້ຳມັນໃຫ້ນາຍຈ້າງຂອງທ່ານ ໃນເວລານັ້ນ ຄືບໍລິສັດທ່ີປຶກສາ HIS ທ່ີມີສຳນັກງານໃຫຍ່ຕັ້ງຢູ່ໃນລັດ Colorado ທ່ີສະຫະລັດ.
ພວກທະນາຍຄວາມຂອງຜູ້ກ່ຽວເວົ້າວ່າ ໃນລະຫວ່າງການຄຸມຂັງນັ້ນ ທ່ານ Xue ໄດ້ຖືກທໍລະມານ ແລະທາງການຈີນກໍໄດ້ກວດກາເບິ່ງຈົດ ໝາຍຕ່າງໆຈາກພັນລະຍາຂອງທ່ານ ຊຶ່ງເປັນຄົນອະເມຣິກັນເຊື້ອສາຍຈີນເຊັ່ນກັນ ປັດຈຸບັນນີ້ອາໄສຢູ່ໃນລັດ Texas ໃນພາກຕາເວັນຕົກ ສຽງໃຕ້ຂອງສະຫະລັດ.
ບັນດາເຈົ້າໜ້າທ່ີສະຫະລັດໄດ້ກ່າວວ່າ ປະທານາທິບໍດີໂອບາມາໄດ້ຍົກເລື້ອງຂອງທ່ານ Xue ຂຶ້ນມາໂອ້ລົມ ກັບເຈົ້າໜ້າທ່ີຈີນໃນລະຫວ່າງ ການຢ້ຽມຢາມຈີນຂອງທ່ານ ໃນເດືອນພະຈິກປີແລ້ວນີ້.
