ສະພາສູງສະຫະຣັດມີກຳນົດຈະລົງມະຕິກັນໃນຕອນບ່າຍວັນຈັນມື້ນີ້ວ່າຈະເລີ້ມທຳການອະພິປາຍກັນຫລືບໍ່ກ່ຽວກັບຮ່າງມະຕິວ່າດ້ວຍການປະຕິຮູບດ້ານການເງິນຢ່າງຮອບດ້ານທີ່ໄດ້ຮັບການສະໜັບສະໜຸນຈາກປະທານາທິບໍດີບາຣັກໂອບາມານັ້ນ.
ພວກສະມາຊິກຄົນສຳຄັນຂອງພັກ Republican ກຳລັງຂູ່ທີ່ຈະໃຊ້ສິດຍັບຍັ້ງການອະພິປາຍທີ່ວ່ານີ້ ນອກຈາກວ່າຈະບັນລຸຂໍ້ຕົກລົງກັນກັບ ພວກສະມາຊິກສັງກັດພັກເດໂມກຣັດກ່ຽວກັບຄວາມເປັນຫ່ວງບາງຢ່າງຂອງສະມາຊິກພັກ Republican ກ່ຽວກັບຮ່າງກົດໝາຍປະຕິຮູບດັ່ງກ່າວທີ່ພັກຣີພັບບລິກັນເອີ້ນວ່າຮ່າງກົດໝາຍຂອງພັກດຽວນັ້ນ.
ທ່ານ Richard Shelby ສະມາຊິກສະພາສູງສັງກັດພັກຣີພັບບລິກັນກ່າວໃນວັນອາທິດວານນີ້ວ່າທັງສອງຝ່າຍໃກ້ໆຈະຕົກລົງກັນໄດ້ແລ້ວກ່ຽວກັບຮ່າງຍັດຕິດັ່ງກ່າວແຕ່ຍັງມີບັນຫາອີກ 2 ຫລື 3 ເຣື່ອງທີ່ຍັງແກ້ໄຂກັນບໍ່ທັນໄດ້. ທ່ານ Shelby ເປັນຫົວໜ້າພັກ Republican ປະຈຳຄະນະກັມມາທິການວ່າດ້ວຍກິດຈະການເຄຫາສະຖານແລະເທດສະບານເມືອງຂອງສະພາສູງສະຫະຣັດ.
