ຕໍາຫລວດສັນຕິບານ FBI ຂອງສະຫະລັດ ກ່າວວ່າ ຊາຍຄົນນຶ່ງທ່ີເກີດຢູ່ໃນປະເທດ Saudi Arabia ທີ່ອາໄສຢູ່ໃນສະຫະລັດ ເປັນເວລາຫລາຍກວ່າ 15 ປີ ບັດນີ້ ເຊື່ອວ່າ ເປັນຫົວໜ້າປະຕິບັດງານໃນທົ່ວໂລກຂອງກຸ່ມ al-Qaida.
ອົງການ FBI ກ່າວວ່າພວກເຈົ້າໜ້າທີ່ສອບສວນສືບສວນຂອງລັດຖະບານກາງເຊື່ອວ່າ ນາຍ Adnan Shukrijumah ໄວ 35 ປີ ໄດ້ຂື້ນກໍາແໜ່ງ ຫົວໜ້າ ຫລັງຈາກການຈັບກຸມ ນາຍ Khalid Sheikh Mohammad ໃນປີ 2003 ຊຶ່ງຜູ້ກ່ຽວໄດ້ເປັນຜູ້ວາງແຜນທໍາການໂຈມຕີຢູ່ໃນສະຫະລັດ ໃນວັນທີ 11 ເດືອນກັນຍາ ປີ 2001 ນັ້ນ.
ທ່ານ Brian LeBlanc ເຈົ້າໜ້າທີ່ສືບລັບພິເສດຂອງອົງການ FBIກ່າວວ່າ ນາຍ
Shukrijamah ອາດໄດ່ທໍາການູ້ຕິດຕໍ່ເປັນປະຈໍາກັບນາຍOsama bin Laden ແລະພວກ
ຜູ້ນໍາຂັ້ນສູງສຸດອື່ນໆຂອງເຄືອຂ່າຍAl-Qaida ນັ້ນ. ທ່ານ LeBlanc ກ່າວຕື່ມວ່າ ນາຍ
Shukrijumah ໄດ້ຖືກກ່າວຫາວ່າໃນປີນີ້ວ່າ ເປັນຜູ້ສົມຮູ້ຮ່ວມຄິດໃນຄະດີຂອງພວກຊາຍ 3 ຄົນ ທີ່ຖືກກ່າວຫາວ່າ ວາງແຜນໂຈມຕີລະບົບລົດໄຟໃຕ້ດິນໃນນະຄອນນີວຢອກ ໃນປີ 2009 ນັ້ນ ແລະຖືກສົງໄສວ່າ ຫລິ້ນບົດບາດໃນການວາງແຜນທີ່ອາດເປັນໄປໄດ້ໃນການໂຈມຕີ ທີ່ປະເທດ Norway ແລະອັງກິດ.
