ສະຫະລັດໄດ້ຖອນ ພະນັກງານຂອງຕົນທັງໝົດ ອອກຈາກເຢເມນ
ໃນວັນເສົາວານນີ້ ໜຶ່ງມື້ຫຼັງຈາກພວກວາງລະເບີດສະຫລະຊີບ
ຈຳນວນໜຶ່ງໄດ້ ສັງຫານປະຊາຊົນຢ່າງໜ້ອຍ 137 ຄົນໃນໂບດ
2 ແຫ່ງໃນນະຄອນຫຼວງຊານາອາ ທີ່ຢູ່ພາຍໃຕ້ການຄວບຄຸມ
ຂອງຝ່າຍກະບົດ.
ກະຊວງການຕ່າງປະເທດສະຫະລັດ ກ່າວຢູ່ໃນຖະແຫຼງການ
ສະບັບໜຶ່ງໃນວັນເສົາວານນີ້ວ່າ ການຍົກຍ້າຍເປັນການຊົ່ວຄາວ
ດັ່ງກ່າວ ແມ່ນເນື່ອງຈາກ”ສະຖານະການດ້ານຄວາມປອດໄພ
ຊຸດໂຊມລົງໃນເຢເມນ.”
ກ່ອນໜ້ານີ້ ມີໜ່ວຍລົບພິເສດຂອງສະຫະລັດ ປະມານ 100 ຄົນ ປະຈຳການຢູ່ທີ່ຖານທັບອາກາດ al-Anad ໃນພາກໃຕ້ ຊຶ່ງເປັນບ່ອນທີ່ສະຫະລັດສົ່ງພວກເຮືອບິນບໍ່ມີຄົນຂັບ ໄປໂຈມຕີເປົ້າໝາຍແຫ່ງຕ່າງໆຂອງກຸ່ມ al-Qaida ຢູ່ໃນເຢເມນ. ກະຊວງການຕ່າງ
ປະເທດ ກ່າວຕື່ມວ່າ ສະຫະລັດຈະ “ສືບຕໍ່ຕິດຕາມສິ້ງຊອມເບິ່ງຢ່າງແຂງຂັນການຂົ່ມຂູ່ຕ່າງໆຂອງພວກກໍ່ການຮ້າຍ ທີ່ອອກມາຈາກເຢເມນ ແລະຈະຮັກສາຄວາມສາມາດ
ໄວ້ໃນຂົງເຂດ ເພື່ອຕໍ່ຕ້ານການຂົ່ມຂູ່ດັ່ງກ່າວ.”
ໃນວັນອາທິດມື້ນີ້ ພວກກະບົດ Houthi ນິກາຍ Shi’ite ໄດ້ຍຶດເອົາ ເດີ່ນເຮືອບິນໃນເມືອງ Taiz ໃນພາກໃຕ້ຂອງປະເທດ. ບັນດາເຈົ້າໜ້າທີ່ຮັກສາຄວາມປອດໄພເຢເມນ ກ່າວວ່າ ພວກກະບົດໄດ້ຮັບການໜຸນຫຼັງຈາກພວກສະໜັບສະໜຸນອະດີດປະທານາທິບໍດີ Ali Abdullah Saleh.
ສະພາຄວາມໝັ້ນຄົງສະຫະປະຊາຊາດ ຈະປະຊຸມສຸກເສີນກັນ ໃນວັນອາທິດມື້ນີ້ ກ່ຽວກັບສະຖານະການໃນເຢເມນ.
ຫຼັງຈາກສະຖານະການດ້ານຄວາມປອດໄພໃນເຢເມນ ຊຸດໂຊມລົງ ປະທານາທິບໍດີ Abd-
Rabbu Mansour Hadi ໄດ້ກ່າວຄຳປາໄສ ທີ່ຖ່າຍທອດອອກທາງໂທລະພາບຄັ້ງທຳ
ອິດຂອງທ່ານ ໃນວັນເສົາວານນີ້ ນັບແຕ່ໄດ້ຫຼົບໜີຈາກການຖືກກັກໃຫ້ຢູ່ໃນບໍລິເວນບ້ານເຮືອນໃນນະຄອນຫຼວງ Sana’a ໃນເດືອນແລ້ວນີ້.
ທ່ານ Adi ທີ່ກ່າວຄຳປາໄສ ມາຈາກເມືອງ Aden ໃນພາກໃຕ້ຂອງປະເທດ ໄດ້ຮຽກຮ້ອງໃຫ້ພວກກະບົດ Houthi ອອກໄປຈາກຕຶກ ກະຊວງຕ່າງໆຂອງລັດຖະບານ ທີ່ພວກເຂົາ
ໄດ້ເຂົ້າຄອບຄອງ ພ້ອມທັງໃຫ້ຖອນກຳລັງອອກໄປຈາກນະຄອນຫຼວງ ແລະກັບຄືນໄປສູ່ການເຈລະຈາສັນຕິພາບ ທີ່ສະຫະປະຊາຊາດເປັນຜູ້ອຸບປະຖຳນັ້ນ.
ນອກນັ້ນ ທ່ານຍັງໄດ້ປະນາມໃນອັນທີ່ທ່ານເອີ້ນວ່າ “ຄວາມພະຍາ ຍາມເພື່ອກໍ່ລັດຖະ
ປະຫານ” ຕໍ່ຕ້ານທ່ານ ຫຼັງຈາກເຮືອບິນລົບລຳໜຶ່ງ ທີ່ບໍ່ຮູ້ວ່າຂອງຝ່າຍໃດ ຍິງລູກສອນໄຟໃສ່ທຳນຽບປະທານາທິບໍດີໃນເມືອງ Aden ໃນຫວ່າງຫຼາຍມື້ຜ່ານມານີ້ ແຕ່ທ່ານ Adi ບໍ່
ໄດ້ຮັບບາດເຈັບໃດໆ.
ເຢເມນໄດ້ຕົກຢູ່ໃຕ້ຄວາມຮຸນແຮງແລະສັບສົນວຸ້ນວາຍ ນັບແຕ່ການລຸກຮືຂຶ້ນຂອງປະຊາ
ຊົນ ໄດ້ໂຄ່ນລົ້ມທ່ານ Saleh ທີ່ປົກຄອງປະເທດມາເປັນເວລາດົນນານ ອອກຈາກອຳນາດ
ໃນປີ 2012.
ພວກ Houthi ທີ່ເປັນພັນທະມິດຂອງອີຣ່ານ ໄດ້ຍຶດເອົານະຄອນຫຼວງ ໃນເດືອນກັນຍາຜ່ານມາ ແລະໄດ້ທຳການສູ້ລົບກັນກັບເຜົ່າຊຸນນີ ໃນຂະນະທີ່ພວກເຂົາພະຍາຍາມຂະຫຍາຍ ອຳນາດຄວບຄຸມຂອງພວກເຂົາອອກໄປອີກ.
