ລິ້ງ ສຳຫລັບເຂົ້າຫາ

ວັນສຸກ, ໒໔ ພຶດສະພາ ໒໐໒໔

ສະຫະລັດດຳເນີນການ ກ່ຽວກັບ 'ການຕອບໂຕ້ຢ່າງຮອບດ້ານ' ຕໍ່ອີຣ່ານ ແລະຮຽກຮ້ອງໃຫ້ ອິສຣາແອລ ໃຊ້ຄວາມອົດກັ້ນ


ທະຫານອິສຣາແອລຄົນນຶ່ງ ຢືນຢູ່ຂ້າງໆລູກສອນໄຟຂີປະນາວຸດຂອງອີຣ່ານ ທີ່ຕົກຢູ່ໃນອິສຣາແອລ ໃນທ້າຍອາທິດທີ່ຜ່ານມາ, ໃນລະຫວ່າງການຢ້ຽມຢາມຂອງສື່ມວນຊົນ ຢູ່ທີ່ຖານທັບທະຫານ ຈູລີສ (Julis) ໃກ້ກັບເມືອງ ເຄີຢັດ ມາລາຊີ (Kiryat Malachi) ທາງພາກໃຕ້ຂອງອິສຣາແອລ ໃນວັນທີ 16 ເມສາ 2024.
ທະຫານອິສຣາແອລຄົນນຶ່ງ ຢືນຢູ່ຂ້າງໆລູກສອນໄຟຂີປະນາວຸດຂອງອີຣ່ານ ທີ່ຕົກຢູ່ໃນອິສຣາແອລ ໃນທ້າຍອາທິດທີ່ຜ່ານມາ, ໃນລະຫວ່າງການຢ້ຽມຢາມຂອງສື່ມວນຊົນ ຢູ່ທີ່ຖານທັບທະຫານ ຈູລີສ (Julis) ໃກ້ກັບເມືອງ ເຄີຢັດ ມາລາຊີ (Kiryat Malachi) ທາງພາກໃຕ້ຂອງອິສຣາແອລ ໃນວັນທີ 16 ເມສາ 2024.

ສະຫະລັດກ່າວວ່າ ຕົນກຳລັງເຮັດວຽກກັບບັນດາພັນທະມິດ ໃນການຕອບໂຕ້ແບບປະສານງານຕໍ່ການໂຈມຕີດ້ວຍເຮືອບິນບໍ່ມີຄົນຂັບ ແລະລູກສອນໄຟຂອງອີຣ່ານ ໃສ່ດິນແດນ ອິສຣາແອລ ໃນທ້າຍອາທິດທີ່ຜ່ານມາ. ພ້ອມ​ກັນ​ນັ້ນ, ຍັງ​ສືບ​ຕໍ່​ຮຽກຮ້ອງ​ໃຫ້ ອິສຣາ​ແອລ ​ໃຊ້​ຄວາມ​ອົດ​ກັ້ນ ​ແລະ ຫຼີກລ້ຽງ​ການກໍ່ໃຫ້ເກີດຄວາມຂັດແຍ້ງ​ໃນລະດັບ​ພາກ​ພື້ນ ​ໃນວົງ​ກວ້າງຂຶ້ນ.

ປະທານາທິບໍດີ ໂຈ ໄບເດັນ ກຳລັງ "ປະສານງານກັບພັນທະມິດ ແລະຄູ່ຮ່ວມງານ, ລວມທັງກຸ່ມຂອງເຈັດປະເທດ, ແລະກັບບັນດາຜູ້ນຳຂອງສອງພັກການເມືອງໃນສະພາ, ກ່ຽວກັບການຕອບໂຕ້ຢ່າງຮອບຄອບ," ທີ່ປຶກສາດ້ານຄວາມໝັ້ນຄົງແຫ່ງຊາດ ທ່ານ ເຈັກ ຊຸລລີວານ (Jake Sullivan) ກ່າວໃນຖະແຫຼງການສະບັບນຶ່ງ.

ທ່ານ ຊຸລລີວານ ກ່າວ​ວ່າ ສະຫະລັດ ​ຈະ​ວາງ​ມາດ​ຕະການ​ລົງ​ໂທດ​ໃໝ່​ໃສ່​ອີຣ່ານ​ ໃນ​ຊຸມ​ມື້​ຕໍ່ໜ້າ ​ເຊິ່ງລວມທັງ​ໂຄງການ​ລູກ​ສອນ​ໄຟ ​ແລະໂດ​ຣນ​ ​ແລະ​ຕໍ່​ບັນດາ​ອົງການ​ທີ່​ສະໜັບສະໜູນ​ກອງກຳລັງ​ພິທັກປະຕິວັດ​ອິສ​ລາມ ​ແລະ​ກະຊວງ​ປ້ອງ​ກັນ​ປະ​ເທດຂອງ​ອີຣ່ານ.

ທ່ານກ່າວຕື່ມວ່າ ສະຫະລັດ ຈະຊຸກຍູ້ການເຊື່ອມໂຍງລະບົບປ້ອງກັນໄພທາງອາກາດ ແລະລູກສອນໄຟ ແລະລະບົບເຕືອນໄພລ່ວງໜ້າ ໃນທົ່ວເຂດຕາເວັນອອກກາງ.

ບັນດາ​ຜູ້​ຊ່ວຍ​ຂອງ​ທ່ານ ໄບເດັນ ​ໄດ້​ຮຽກຮ້ອງ​ຊ້ຳ​ແລ້ວ​ຊ້ຳ​ອີກ​ ໃຫ້​ຫລຸດ​ຜ່ອນ​ຄວາມ​ຮຸນ​ແຮງ. ໂຄສົກຂອງທຳນຽບຂາວ ທ່ານ ຈອນ ເຄິີບີ ກ່າວຕໍ່ບັນດານັກຂ່າວ ໃນວັນອັງຄານວານນີ້ວ່າ ປະທານາທິບໍດີ “ບໍ່ຕ້ອງການເຫັນສົງຄາມກັບອີຣ່ານ.

ທ່ານ ເນຕັນຢາຮູ ​ໄດ້​ປະຕິຍານ​ວ່າ​ ຈະ​ຕອບ​ໂຕ້​ຄືນ, ​ແຕ່​ເຈົ້າ​ໜ້າ​ທີ່​ອິສຣາ​ແອ​ລ ບໍ່​ໄດ້ບອກ​ວ່າ ​ພວກເຂົາ ​ຈະ​ໂຈມ​ຕີ​ແບບໃດ ຫຼື​ເວລາ​ໃດ.

"ພວກເຮົາຈະເລືອກການຕອບໂຕ້ຂອງພວກເຮົາຕາມຄວາມເຫມາະສົມ," ພົນໂທ ເຮີຊີ ຮາເລວີ (Herzi Halevi), ຫົວຫນ້າກອງທະຫານຂອງອິສຣາແອລກ່າວ.

ການ​ໂຈມ​ຕີ​ໂດຍ​ກົງ​ຂອງອິສຣາແອລ ໃສ່​ດິນ​ແດນ​ຂອງ​ອີ​ຣ່ານ ຈະ​ເຮັດໃຫ້ມີການແຜ່ລາມອອກຂອງຄວາມ​ຮຸນ​ແຮງອີກຄັ້ງນຶ່ງ, ​ໂດຍ ເຕຫະຣ່ານ ​ໄດ້​ໃຫ້​ຄຳ​ໝັ້ນ​ສັນ​ຍາ​ຢູ່ແລ້ວວ່າ ຈະ​ຕອບ​ໂຕ້ຢ່າງຮຸນ​ແຮງ​ຂຶ້ນກວ່າ​ເກົ່າ ຕໍ່ການຕອບໂຕ້ຄືນໃດໆ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG