ລິ້ງ ສຳຫລັບເຂົ້າຫາ

logo-print

ສະຫະລັດ ຈະບໍ່ ‘ຫລີກເວັ້ນ’ ໄປຈາກການຕອບໂຕ້ ສຳລັບການໂຈມຕີ ຕໍ່ຖານທັບອາກາດ ຢູ່ໃນອີຣັກ


ໂຄສົກທຳນຽບຫ້າແຈ ທ່ານຈອນ ເຄີຣບີ ກ່າວຖະແຫລງຕໍ່ບັນດານັກຂ່າວ ໃນວັນທີ 17 ກຸມພາ 2021.

ບັນດາເຈົ້າໜ້າທີ່ຂັ້ນສູງຂອງສະຫະລັດ ກ່າວວ່າ ສະຫະລັດຈະບໍ່ “ຫລີກເວັ້ນ” ໄປຈາກການຕອບໂຕ້ຕໍ່ການໂຈມຕີດ້ວຍຈະຫຼວດໃສ່ພະນັກງານຂອງສະຫະລັດ ແລະພັນທະມິດຢູ່ໃນປະເທດອີຣັກ ດ້ວຍກຳລັງທາງທະຫານ ຖ້າວ່າຈຳເປັນ.

ພວກໂຈມຕີໄດ້ຍິງຈະຫຼວດຫຼາຍບັ້ນ ໃສ່ຖານທັບອາກາດ ອາລ ອາຊາດ ຢູ່ໃນແຂວງອານບາຣທາງພາກຕາເວັນຕົກຂອງອີຣັກ ໃນຕອນເຊົ້າວັນພຸດວານນີ້ ອີງຕາມການກ່າວ ຂອງບັນດາເຈົ້າໜ້າທີ່ກະຊວງປ້ອງກັນປະເທດ ໂດຍມີຈະຫຼວດ ຢ່າງໜ້ອຍ 10 ລູກ ຕົກໃສ່ພາຍໃນສະຖານທີ່ດັ່ງກ່າວ.

ພະນັກງານສັນຍາຈ້າງທີ່ເປັນພົນລະເຮືອນຂອງສະຫະລັດຄົນນຶ່ງໄດ້ເສຍຊີວິດ ຫຼັງຈາກທີ່ໄດ້ເປັນຫົວໃຈວາຍ ໃນຂະນະທີ່ໄດ້ໄປຫລົບລີ້ຢູ່ສະຖານທີ່ລີ້ໄພຈາກການໂຈມຕີຢູ່ນັ້ນ.

ໂຄສົກຂອງທຳນຽບຫ້າແຈ ທ່ານຈອນ ເຄີບີ ໄດ້ກ່າວຕໍ່ບັນດານັກຂ່າວໃນວັນພຸດວານນີ້ວ່າ ກຳລັງຮັກສາຄວາມປອດໄພຂອງອີຣັກ ແມ່ນນຳພາໃນການສືບສວນສອບສວນ ໂດຍກ່າວຕື່ມວ່າ ມັນຍັງໄວເກີນໄປທີ່ຈະໃຫ້ການພິຈາລະນາໃດໆ.

ທ່ານເວົ້າວ່າ “ໃຫ້ພວກຊາວອີຣັກຄູ່ຮ່ວມງານຂອງພວກເຮົາສືບສວນເລື້ອງນີ້ ເບິ່ງວ່າແມ່ນຫຍັງທີ່ພວກເຮົາຮູ້ຈັກ ແລະຕໍ່ຈາກນັ້ນຖ້າວ່າ ການຕອບໂຕ້ແມ່ນສົມຄວນອະນຸມັດ, ຂ້າພະເຈົ້າຄຶດວ່າ ພວກເຮົາໄດ້ເຫັນຢ່າງຈະແຈ້ງວ່າ ພວກເຮົາຈະບໍ່ຫລີກເວັ້ນ ໄປຈາກອັນນັ້ນ. ແຕ່ວ່າ ພວກເຮົາຍັງບໍ່ເຖິງຈຸດນັ້ນເທື່ອ.”

ທ່ານເຄີຣບີ ໄດ້ກ່າວວ່າ ການສືບສວນໃນເບື້ອງຕົ້ນບົ່ງບອກວ່າ ການໂຈມຕີດ້ວຍຈະຫຼວດຕໍ່ຖານທັບ ອາລ ອາຊາດ ແມ່ນໄດ້ຍິງມາຈາກຫຼາຍແຫ່ງທາງທິດຕາເວັນອອກຂອງຖານທັບອາກາດນັ້ນ.

ທ່ານຍັງໄດ້ກ່າວອີກວ່າ ການປ້ອງກັນຂອງຖານທັບ ທີ່ລວມມີ ລະບົບຕໍ່ຕ້ານຈະຫຼວດ ໄດ້ເປີດໃຊ້ງານ ເຖິງຢ່າງໃດກໍຕາມ ມັນຍັງບໍ່ເປັນທີ່ຈະແຈ້ງວ່າ ລະບົບດັ່ງກ່າວ ຍິງສະກັດອາວຸດໃດໆທີ່ກຳລັງເຂົ້າມາ ໄດ້ຫຼືບໍ່.

ເຫດການທີ່ເກີດຂຶ້ນຄັ້ງຫຼ້າສຸດໃນວັນພຸດວານນີ້ຢູ່ທີ່ ອາລ ອາຊາດ ແມ່ນເປັນການໂຈມຕີດ້ວຍຈະຫຼວດ ຕິດຕໍ່ກັນຫຼາຍບັ້ນໂດຍພວກທະຫານບ້ານທີ່ໜຸນຫຼັງໂດຍອີຣ່ານ ແນໃສ່ຖານທັບຕ່າງໆຢູ່ໃນອີຣັກ ອັນທີ່ເປັນສະຖານທີ່ພັກຂອງທັງກຳລັງສະຫະລັດ ແລະພັນທະມິດ. ມັນຍັງເກີດຂຶ້ນບໍ່ເຖິງນຶ່ງອາທິດ ຫຼັງຈາກທີ່ປະທານາທິບໍດີ ສະຫະລັດ ໂຈ ໄບເດັນ ໄດ້ສັ່ງໃຫ້ໂຈມຕີທາງອາກາດຕໍ່ ສະ ຖານທີ່ແຫ່ງນຶ່ງໃນພາກຕາເວັນອອກຂອງຊີເຣຍ ຊຶ່ງບັນດາເຈົ້າໜ້າທີ່ສະຫະລັດ ໄດ້ກ່າວວ່າ ເປັນບ່ອນນຳໃຊ້ໂດຍພວກທະຫານບ້ານ ເພື່ອດຳເນີນການໂຈມຕີທັງຫຼາຍເຫຼົ່ານັ້ນ.

ໃນເວລານັ້ນ ທ່ານໄບເດັນ ໄດ້ກ່າວວ່າ ການໂຈມຕີທາງອາກາດນັ້ນແມ່ນໝາຍເຖິງເປັນການເຕືອນຕໍ່ອີຣ່ານວ່າ ຕົນ “ບໍ່ສາມາດປະຕິບັດໂດຍບໍ່ໄດ້ຮັບໂທດ.”

[[ https://www.voanews.com/middle-east/be-careful-biden-warns-iran-after-striking-tehran-backed-militias-syria ]]

ອ່ານຂ່າວນີ້ຕື່ມ ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG