ສຫລ ຈະ​ຊ່ວຍອີຣັກ ​ຕີ​​ໂຕ້ ການ​ຟື້ນໂຕຄືນ ຂອງ al-Qaida (ວີດີໂອ)

ປະທານາທິບໍດີ Barack Obama ກ່າວ​ວ່າ ສະຫະລັດຈະ​ດຳ​
ເນີນ​ງານ​ຮ່ວມ​ກັບອີຣັກ ​ເພື່ອ​ຕີໂຕ້ການ​ຟື້ນ​ໂຕ​ຄືນ​ຂອງພວກ​ກໍ່​
ການ​ຮ້າຍ al-Qaida.

ທ່ານ Obama ​ໄດ້​ເຈລະຈາ​ຫາລືຢູ່​ທີ່ທໍານຽບຂາວ​ໃນ​ວັນ​ສຸກ
​ວານ​ນີ້ ກັບນາຍົກລັດຖະມົນຕີອີຣັກ ທ່ານ Nouri al-Maliki
​ທີ່​ກໍາລັງ​ດີ້ນ​ລົນ ຢາກ​ຮັກສາ​ຄວາມເປັນ​ປຶກ​ແຜ່ນ​ຂອງ​ປະ​ເທດ​
ທ່ານ​ໄວ້ ​ໃນ​ຂະນະ​ທີ່​ຄວາມ​ຮຸນ​ແຮງ​ລະຫວ່າງພວກ​ທີ່​ນັບຖື​
ສາສະໜາ​ອິສລາມນິກາຍ Sunni ​ແລະ​ນິກາຍ Shiites ຂົ່ມ​
ຂູ່​ທີ່​ຈະກາຍ ​ເປັນສົງຄາມ​ກາງເມື​ອງ.

ກຸ່ມກໍ່​ການ​ຮ້າຍ ​al-Qaida ທີ່​ສະໜັບສະໜຸນພວກ Sunni
ກໍາລັງ​ເຮັດ​ໃຫ້​ສະຖານະ​ການຊຸດ​ໂຊມ​ລົງແລະທ່ານ Obama
ກ່າວ​ວ່າ ກຸ່ມ al-Qaida ​ແມ່ນຂົ່ມຂູ່ຕໍ່ຂົງ​ເຂດດັ່ງກ່າວທັງ​ໝົດ
ພ້ອມ​ທັງສະຫະລັດນຳ​ດ້ວຍ.

ທ່ານ Maliki ກ່າວ​ວ່າ ອີຣັກມີ​ຄວາມ​ໝັ້ນໝາຍ ​ທີ່​ຈະຈັດ​ໃຫ້​ມີ​
ການເລືອກ​ຕັ້ງ ຕາມກຳນົດ​ເວລາ​ໃນ​ປີໜ້າ ​ເພາະທ່ານ​ກ່າວວ່າ ການ​ເສີມ​ສ້າງ​ຄວາມ​ເຂັ້ມ
​ແຂງໃຫ້​ແກ່ປະຊາທິປະ​ໄຕນັ້ນ ຈະ​ອຳນວຍ​ໃຫ້ລັດຖະບານ ຕໍ່ສູ້​ກັບພວກກໍ່​ການ​ຮ້າຍ.

ການ​ຢ້ຽມຢາມ​ຂອງນາຍົກລັດຖະມົນຕີອີຣັກ​ ໄດ້​ມີຂຶ້ນ​ສອງ​ປີ​ ຫລັງ​ຈາກກໍາລັງທະຫານສະ
ຫະລັດໄດ້​ຖອນ​ອອກ​ຈາກປະ​ເທດ​ດັ່ງກ່າວ ສ່ວນ​ນຶ່ງ​ກໍ​ເປັນ​ຍ້ອນວ່າ ທ່ານ Maliki ​ໄດ້ຮຽກ
ຮ້ອງ​ໃຫ້​ຖອນ​ທະຫານ​ເຫຼົ່ານີ້ອອກ​ໄປ.

ທໍານຽບຂາວ​ກ່າວ​ວ່າ ​ການສືບ​ຕໍ່ໃຫ້​ຄວາມຊ່ວຍ​ເຫຼືອ​ແກ່ອີຣັກແມ່ນມີ​ຄວາມ​ຈໍາ​ເປັນຮວມ​
ທັງ​ແຜນ​ການຈັດ​ສົ່ງເຮືອບິນ​ລົບອາຍ​ພົ່ນ F-16 ​ໄປ​ໃຫ້ ​ໃນ​ປີໜ້າ​ນີ້. ​

ແຕ່ສະມາຊິກ​ລັດຖະສະພາ​ຈໍານວນ​ນຶ່ງ​ ໄດ້​ຕັ້ງຄຳ​ຖາມ ​ກ່ຽວ​ກັບການໃຫ້​ຄວາມຊ່ວຍ​ເຫຼືອ
ທາງ​ດ້ານ​ທະຫານ​ດັ່ງ​ກ່າວ.