ປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ອອກປະກາດ ໃຫ້ລັດໂຄໂລຣາໂດໃນ
ພາກຕາເວັນຕົກ ຂອງສະຫະລັດ ເປັນເຂດປະສົບໄພພິບັດ ຊຶ່ງໃນວັນສຸກມື້ນີ້ ທ່ານຈະເດີນ
ທາງໄປສຳຫຼວດເບິ່ງຄວາມເສຍຫາຍຈາກໄຟປ່າທີ່ໄດ້ໄໝ້ລາມຢ່າງຮຸນແຮງໃນບໍລິເວນກວ້າງ
ທີ່ໄດ້ທຳລາຍເຮືອນຊານໄປແລ້ວຫຼາຍ ຮ້ອຍຫຼັງແລະມີຜູ້ເສຍຊີວິດຢ່າງນ້ອຍນຶ່ງຄົນ.
ເຈົ້າໜ້າທີ່ກ່າວວ່າ ມີເຮືອນ 346 ຫຼັງໄດ້ຖືກທຳລາຍ ນັບແຕ່ວັນອັງຄານແລ້ວນີ້ ເປັນຕົ້ນມາ
ເວລາໄຟປ່າໃນເຂດໜ້າຜາ Waldo Canyon ເລີ່ມໄໝ້ລາມແບບບໍ່ສາມາດຄວບຄຸມໄດ້ຊຶ່ງ
ໄດ້ບັງຄັບໃຫ້ມີການຍົກຍ້າຍປະຊາຊົນ ປະມານ 36,000 ຄົນ ອອກຈາກເຮືອນຊານຂອງ
ພວກເຂົາເຈົ້າໃນເມືອງ Colorado Springs ຊຶ່ງເປັນຫົວເມືອງໃຫຍ່ອັນດັບ 2 ຂອງລັດໂຄ
ໂລຣາໂດ. ຜູ້ບັນຊາການຕຳຫຼວດ ໃນເມືອງດັ່ງກ່າວແຈ້ງໃຫ້ພວກນັກຂ່າວຊາບ ໃນວັນພະ
ຫັດວານນີ້ວ່າໄດ້ພົບເຫັນ ຊາກສົບຄົນຕາຍຜູ້ນຶ່ງໃນເຮືອນທີ່ຖືກໄຟໄໝ້ບ່ອນທີ່ມີລາຍງານ
ວ່າ 2 ຄົນໄດ້ຫາຍສາບສູນໄປນັ້ນ.
ການປະກາດທີ່ວ່ານີ້ຂອງທ່ານໂອບາມາ ເຮັດໃຫ້ປະຊາຊົນ ທີ່ໄດ້ຮັບຜົນກະທົບຈາກໄຟ
ປ່າໃນເຂດ Waldo Canyon ແລະໄຟປ່າຂະໜາດແຮງໃນເຂດພາກເໜືອຂອງລັດໂຄໂລ
ຣາໂດ ທີ່ໄດ້ທຳລາຍເຮືອນຊານຂອງປະຊາຊົນ 257 ຫຼັງ ແລະເຮັດໃຫ້ແມ່ຍິງຄົນນຶ່ງເສຍ
ຊີວິດ ໃນຕົ້ນເດືອນນີ້ ສາມາດຂໍການຊ່ອຍເຫຼືອ ຈາກກອງທຶນຄຸ້ມຄອງໄພພິບັດຂອງລັດ
ຖະບານກາງໄດ້.
ໄຟປ່າໃນເຂດ Waldo Canyon ເລີ່ມຂຶ້ນ ໃນມື້ວັນເສົາແລ້ວໃນເຂດປ່າສະຫງວນແຫ່ງ
ຊາດ Pike ແລະໄໝ້ລາມໃນບໍລິເວນ 6,000 ເຮັກຕາກວ່າໆ ແລະໃນຕອນນຶ່ງນັ້ນ ໄດ້
ຂົ່ມຂູ່ຕໍ່ໂຮງຮຽນນາຍຮ້ອຍ ກອງທັບອາກາດສະຫະລັດ. ສະພາບອາກາດຮ້ອນເອົ້າ ທີ່
ເຮັດໃຫ້ອຸນຫະພູມຖີບໂຕສູງຂຶ້ນກາຍ 37 ອົງສາແຊລຊຽສແລະລົມແຮງເປັນເວລາຫຼາຍ
ມື້ໄດ້ຊ່ອຍເຮັດໃຫ້ໄຟປ່າໄໝ້ລາມອອກໄປ. ໄຟປ່າດັ່ງກ່າວສາມາດຄວບຄຸມໄດ້ແລ້ວ 15%
ທັງນີ້ກໍຍ້ອນອຸນຫະພູມທີ່ຄ່ອຍເຢັນລົງ ແລະມີລົມພັດບໍ່ແຮງຊຶ່ງໄດ້ຊ່ອຍໃນການດຳເນີນ
ຄວາມພະຍາຍາມຂອງ ພວກມອດໄຟ.
ສາເຫດຂອງໄຟປ່າທີີ່ວ່ານີ້ແມ່ນຍັງບໍ່ທັນເປັນທີ່ຮູ້ກັນເທື່ອ. ອົງການສັນຕິບານກາງ FBI
ຂອງສະຫະລັດ ພວມທຳການສືບສວນຢູ່ວ່າມີການກະທຳຜິດທາງອາຍາພົວພັນຫຼືບໍ່.