ສະ​ຫະ​ລັດ ເຕືອນໄພສະພາບອາກາດປັ່ນປ່ວນທົ່ວປະ​ເທດ​ສຳ​ລັບສັບປະດາວັນຂອບໃຈພຣະເຈົ້າ

ພະຍາກອນອາກາດທ່ົວສະຫະລັດເຕືອນໄພອາກາດປັ່ນປ່ວນປົກຄຸມພື້ນທີ່ໃນອາເມຣິກາຊ່ວງສັບປະດາວັນຂອບໃຈພຣະເຈົ້າເຊີ່ງອາດຈະສ້າງບັນຫາໃຫ້ກັບການເດີນທາງໃນຊ່ວງເທດສະການນີ້.

ທີ່ລັດແຄລິຟຟໍເນັຍ ມີລາຍງານຜູ້ເສັຍຊີວິດໜຶ່ງຄົນໃນລົດທີ່ຈົມນໍ້າຫຼັງຈາກນໍ້າຖ້ວມເມື່ອວັນເສົາຂະນະທີ່ປະຊາຊົນຫຼາຍພັນຄອບຄົວຍັງຄົງປະເຊີນກັບໄຟຟ້າດັບຢ່າງຕໍ່ເນື່ອງຫຼາຍມື້.

ເມື່ອອາທິດທີ່ຜ່ານມາ ມີຜູ້ເສັຍຊີວິດສອງຄົນຈາກເຫດການພະຍຸ “ ບອມໄຊໂຄລນ” ພັດຖະລົ່ມຝັ່ງຕາເວັນຕົກຂອງສະຫະລັດເຮັດໃຫ້ປະຊາຊົນຫຼາຍແສນຄົນບໍ່ມີໄຟຟ້າໃຊ້, ສ່ວນຫຼາຍຢູ່ໃນເຂດນະຄອນຊີແອັດເທີລ ລັດວໍຊີງຕັນແລະມີບ້ານເຮືອນລວມທັງລົດໃຫຍ່ເສັຍຫາຍຈຳນວນຫຼາຍ.

ທີ່ລັດວໍຊີງຕັນປະຊາຊົນຫຼາຍກ່ວາ 185,000 ຄົນ ບໍ່ມີໄຟຟ້າໃຊ້ມາຕັ້ງແຕ່ວັນອັງຄານສືບເນື່ອງມາຈາກເຈົ້າໜ້າທີ່ກຳລັງນໍາເສົາໄຟຟ້າ, ຕົ້ນໄມ້ ແລະ ເສດຊາກຫັກພັງອອກຈາກພື້ນຖະໜົນແລະຄາດວ່າໄຟຟ້າຈະບໍ່ເຮັດວຽກໄປຈົນເຖີງວັນເສົາ.

ເມືອງຊານຕາໂຣຊາ ລັດແຄລິຟຟໍເນັຍ ປະເຊີນກັບຝົນຕົກໜັກສາມມື້ຕິດຕໍ່ກັນ, ປະລິມານນໍ້າຝນສູງເຖີງ 32 ຊັງຕີແມັດ, ເມື່ອວັນສຸກຂະນະທີ່ມີລາຍງານສວນອາງຸ່ນເສັຍຫາຍຈຳນວນຫຼາຍ.

ພະຍຸຮຸນແຮງຂື້ນຝັ່ງສະຫະລັດຄັ້ງນີ້ ເປັນປະກົດການ ທີ່ນັກອຸຕຸນິຍົມວິທະຍາເອີ້ນວ່າ

ບອມໂບເຈເນຊິສ ຫຼືທີ່ເອີ້ນກັນໃນຊື່ຫຼີ້ນວ່າ ບອມໄຊໂຄລນ ໝາຍເຖີງພາວະທີ່ຄວາມຮຸນແຮງຂອງພະຍຸໄຊໂຄລນເພີ່ມໃນໃນເວລາອັນວ່ອງໄວ.

ສຳນັກງານພູມີອາກາດແຫ່ງຊາດ ໃນລັດແຄລິຟຟໍເນັຍ ເຕືອນໄພລະດູໜາວໃນເຂດພູເຂົາເຊັຍຣາເນວາດາ ໃນອາທິດນີ້ໂດຍຄາດວ່າຈະມີຮິມະຕົກໜັກໃນເຂດພູເຂົາບາງພື້ນທີ່ອາດຈະມີຮິມະສູງປະມານ 1 ແມັດ.

ສ່ວນເຂດພາກກາງແລະພາກເໜືອອາດຈະມີຝົນຕົກໜັກແລະຮິມະໃນວັນຈັນ, ສ່ວນພາກຕາເວັນອອກຈາກປະເຊີນກັບພະຍຸຮິມະໃນວັນພະຫັດເປັນວັນຂອບໃຈພຣະເຈົ້າແລະວັນສຸກ ນະຄອນນີວຢ໋ອກ ແລະ ນະຄອນບອສຕັນອາດປະເຊີນໄພຝົນຕົກລົມພັດແຮງແລະຮິມະ.

ພະຍາກອນອາກາດຄາດວ່າຈະມີຮິມະຕົກໜັກທາງຕາເວັນອອກສຽງເໜືອຂອງລັດເພັນຊີນເວີເນັຍພື້ນທີ່ເຂດພູເຂົາອາດມີຮິມະສູງເຖີງ 43 ຊັງຕີແມັດ.