ປ. ໂອບາມາ ເຕືອນ ຈີນ ກ່ຽວກັບ ສາຍລັບ ຂອງຈີນ ທີ່ຢູ່ໃນ ສຫລ ແບບລັບໆ

ໜັງສື​ພິມ The New York Times ສະບັບ​ວັນ​ອາທິດວານ​ນີ້
ລາຍ​ງານ​ວ່າ ລັດຖະບານ​ທ່ານ ​ໂອ​ບາ​ມາ ​ໄດ້ເຕືອນ​ຈີນ​ ກ່ຽວ​ກັບ
​ການ​ມີ​ບັນດາ​ສາຍ​ລັບ​ຮັກສາ​ກົດ​ໝາຍຂອງຕົນ ຢູ່​ໃນ​ສະຫະລັດ
ຢ່າງ​ລັບໆ​ ​ເພື່ອ​ກົດ​ດັນ​ໃຫ້​ພົນລະ​ເມືອງ​ ທີ່​ຜູ້​ມີ​ຊື່ສຽງຂອງ​ຕົນ ກັບ
​ຄືນ​ປະ​ເທດອັນ​ເປັນ​ສ່ວນ​ໜຶ່ງ​ ຂອງການ​ປຸກລະດົມຕໍ່ຕ້ານ​ການ​
ສໍ້​ລາດ​ບັງຫຼວງຂອງ​ປັກ​ກິ່ງນັ້ນ. ​ຜູ້​ສື່​ຂ່າວ​ວີ​ໂອ Victor Beattie
ລາຍງານ ​ເລື້ອງ​ນີ້​ ທ່າມກາງ​ຄວາມ​ເຄັ່ງ​ຕຶງ​ ທີ່​ເພີ້​ມສູງ​ຂຶ້ນ
ລະຫວ່າງ​ສອງ​ຝ່າຍ ​ແລະ ພຽງ​ບໍ່​ເທົ່າ​ໃດ​ອາທິດ​ ກ່ອນ​ໜ້າ
ການ​ຢ້ຽມຢາມ​ຢ່າງ​ເປັນ​ທາງ​ການໂດຍ ປະທານ​ປະ​ເທດ​ຈີນ
ທ່ານ Xi Jinping.

ໜັງສື​ພິບດັ່ງກ່າວ ​ອ້າງ​ອີງ​ເຖິງ​ບັນດາ​ເຈົ້າໜ້າ​ທີ່​ອາ​ເມ​ຣິກັນຜູ້​ບໍ່ປະສົງ​ ​ອອກ​ຊື່ ທີ່ກ່າວ​ວ່າ
ປັກ​ກິ່ງ ​ໄດ້​ເອີ້ນ​ພາລະກິດ ປະຕິ​ບັດ​ການ​ດັ່ງກ່າວ​ນັ້ນວ່າ ລ່າ​ໝາ​ໄນ ຫຼື Fox Hunt ​ແລະ
​ເປັນ​ສ່ວນ​ໜຶ່ງ​ ຂອງ​ການ​ຕໍ່ຕ້ານ​ການ​ສໍ້​ລາດ​ບັງຫຼວງ ທີ່​ກວ້າງຂວາງ​ ອອກ​ໄປ​ຕື່ມ​ອີກ ຂອງ
ທ່ານ ​ສີ ປະທານ​ປະ​ເທດຈີນ ຊຶ່ງເປັນອັນ ​ທີ່​ນິຍົມ​ຊົມ​ຊື່ນ ໂດຍ​ສາທາລະນະ​ຊົນຈີນ.
ໜັງສື​ພິບ The Times ກ່າວ​ອີກ​ວ່າ ບັນດາ​ສາຍ​ລັບ ທີ່​ກ່ຽວຂ້ອງ ​ແມ່ນ​ມາ​ຈາກ​ກະຊວງ​
ຮັກສາ​ຄວາມ​ປອດ​ໄພ​ສາທາລະນະ​ຊົນ ​ແລະ ບໍ່​ໄດ້​ເຂົ້າມາ​ໃນ​ປະ​ເທດ ເພື່ອທຸລະ​ກິດ
​ທາງ​ລັດຖະການ​ ​ແລະ ອາດ​ເປັນ​ໄປ​ໄດ້​ວ່າ ​ເຂົ້າມາ​ໃນ​ສະຫະລັດ ​ໃນ​ຖານະ​ນັກ​ທ່ຽວ ຫຼື
ດ້ວຍວີ​ຊາດ້ານ​ການ​ຄ້າ.

ໜັງສື​ພິບ The Times ​ກ່າວ​ຕື່ມ​ວ່າ ນັບ​ຕັ້ງ​ແຕ່ 2014 ​ເປັນ​ຕົ້ນ​ມາ ຜູ້ຕ້ອງ​ສົງ​ໄສຫຼາຍ
ກວ່າ 930 ຄົນ​ ​ໄດ້​ຖືກ​ສົ່ງ​ກັບ​ຄືນ​ປະ​ເທດລວມທັງ ຜູ້​ທີ່​ສະໝັກ​ໃຈ​ກັບ​ຄືນ​ປະ​ເທດ​ເອງ
ຫຼາຍກວ່າ 70 ຄົນ ​ໃນ​ປີ​ນີ້. ໜັງສື​ພິບນັ້ນ ກ່າວ​ວ່າ ມັນ​ເປັນ​ສ່ວນ​ໜຶ່ງ​ຂອງ​ປະຕິບັດ​ການ​
ຂ້າມ​ຊາດ ​ເພື່ອ​ຕາມ​ລ່າ​ຫາ​ພວກລົບ​ໜີຄະດີ​ເສດຖະກິດ ​ແລະ ຊັກ​ຊວນ​ໃຫ້​ພວກ​ກ່ຽວ
ກັບ​ຄືນ​ປະ​ເທດ.

ທ່ານ Liu Dong ຊ່ຶງ ຄຳ​ເວົ້າຂອງ​ທ່ານ ຜູ້ອຳ​ນວຍການ ຂອງ​ໜ່ວຍປະຕິບັດ​ການ​ດັ່ງກ່າວ
​ໄດ້​ຖືກ​ອ້າງ​ເຖິງ​ ​ທີ່​ວ່າ​ພວກ​ສາຍ​ລັບ ​ແມ່ນ​ໄດ້​ຖືກ​ແນະນຳ​ໃຫ້​ເຄົາລົບ​ຕໍ່​ກົດໝາຍຂອງ​ທ້ອງ​ຖິ່ນ
​ແຕ່​ທ່ານ​ກ່າວ​ວ່າ “ຕາບ​ໃດ ທີ່​ມີ​ຂໍ້​ມູນ​ວ່າ ມີ​ຜູ້​ຕ້ອງ​ສົງ​ໄສ ເປັນອາ​ຊະ​ຍາ​ກອນ ພວກ​
ເຮົາ​ ຈະ​ຕິດຕາມ​ຫາ​ພວກ​ເຂົາ​ ພວກ​ເຮົາ​ຈະປະຕິບັດ​ວຽກ​ງານ​ຂອງ​ພວກ​ເຮົາ​ໄປ ​
ແລະ​ຕາມ​ຫາ​ພວກ​ເຂົາ ຢູ່​ທຸກ​ຫົນ​ແຫ່ງ.”

ທ່ານ Scott Harold ນັກລັດຖະສາດ ຈາກ ບໍລິສັດ RAND ກ່າວ​ວ່າ ການປະຕິບັດ​ການ
ທີ່​ກ່ຽວຂ້ອງ​ກັບ​ການ​ຕາມ​ລ່າ ອັນ​ທີ່​ບັນດາ​ເຈົ້າໜ້າ​ທີ່​ຈີນ ​ເອີ້ນ​ວ່າ ​ພວກ​ເສືອ ນັ້ນ ຫຼືວ່າ
ບັນດາ​ເຈົ້າໜ້າ​ທີ່​ຂັ້ນສູງ ທີ່​ໄດ້​ຖືກ​ກ່າວ​ຫາວ່າ​ສໍ້​ລາດ​ບັງຫຼວງ ​ແລະ ພວກ​ແມງວັນ ຫຼື ບັນດາ
​ເຈົ້າໜ້າ​ທີ່​ຂັ້ນຕ່ຳ. ທ່ານ​ກ່າວ​ວ່າ ບັນດາ​ເຈົ້າໜ້າ​ທີ່​ ຜູ້​ທີ່ສືບ​ຕໍ່​ທຳ​ງານ​ຢູ່​ໃນ​ຈີນ ​ແຕ່​ສົ່ງພວກ​
ຍາດຕິ​ພີ່ນ້ອງ​ທີ່​ຮັ່ງມີ​ ໄປ​ຍັງ​ປະ​ເທດ​ນອກ ​ເຊັ່ນ​ສະຫະລັດ ກາ​ນາ​ດາ ອອສ​ເຕຣ​ເລຍ ​ແລະ
ນິວຊີ​ແລນ ​ແມ່ນ​ຖືກອ້າງ​ເຖິງ​ຄື ພວກ​ງູ ​ໃນ​ຂະນະ​ທີ່​ບັນດາ​ເຈົ້າໜ້າ​ທີ່ ຜູ້​ທີ່​ອອກ​ຈາກ​ປະເທດ
​ພ້ອມ​ດ້ວຍ​ຊັບ​ສິນ​ຂອງ​ພວກ​ເຂົາ ​ແມ່ນ​ຮູ້ຈັກ​ກັນ​ຄື ພວກ​ໝາ​ໃນ.