ສະຫະລັດ ໂຈະໃຫ້ເງິນ ໃນການຊອກຄົ້ນຫາ ທະຫານຫວຽດນາມ ທີ່ຫາຍສາບສູນ

ສະມາຊິກສະພາສູງຂອງສະຫະລັດທ່ານນຶ່ງກ່າວວ່າ ກະຊວງການຕ່າງປະເທດສະຫະລັດໄດ້
ຕົກລົງທີ່ຈະຍຸຕິການໃຫ້ເງິນສະໜັບສະໜຸນ ໃນການຊອກຄົ້ນຫາທະຫານຫວຽດນາມທີ່ຫາຍ
ສາບສູນໃນປາງສົງຄາມຫວຽດນາມ ຈົນກວ່າຫວຽດນາມ ຈະຕົກລົງໃຊ້ເງິນດັ່ງກ່າວນີ້ ຊອກ
ຫາທະຫານຫວຽດນາມໃຕ້ທີ່ເສຍຊີວິດໃນປາງສົງຄາມດ່ັງກ່າວນຳດ້ວຍ.

ສະມາຊິກສະພາສູງ Jim Webb ປະທານອະນຸກຳມະການຮັບຜິດຊອບ ກ່ຽວກັບກິດຈະ
ການເອເຊຍຕາເວັນອອກແລະຍ່ານມະຫາສະມຸດປາຊີຟິກ ກ່າວໃນຖະແຫຼງຂ່າວສະບັບນຶ່ງ
ທີ່ນຳອອກເຜີຍແຜ່ ໃນວັນພະຫັດວານນີ້ວ່າ ລັດຖະສະພາສະຫະລັດ ໄດ້ອະນຸມັດເງິນ 1
ລ້ານໂດລາສຳລັບຊອກຄົ້ນຫາ ແລະເກັບກູ້ຊາກກະດູກທະຫານຫວຽດນາມ ຂອງທັງສອງ ຝ່າຍທີ່ຢູ່ໃນບັນຫາຂັດແຍ້ງ.

ແຕ່ອົງການຢູເສດ ຊຶ່ງເປັນຜູ້ກຳກັບນຳໂຄງການດັ່ງກ່າວເວົ້າວ່າ ລັດຖະບານຫວຽດນາມ
ສະແດງໃຫ້ວ່າເງິນຈຳນວນນີ້ຈະບໍ່ນຳໃຊ້ໃນການຊອກຫາເກັບກູ້ຊາກກະດູກຂອງທະຫານ ສາທາລະນະລັດຫວຽດນາມຫຼືຫວຽດນາມໃຕ້ທີ່ເສຍຊີວິດໄປນັ້ນແຕ່ປະການໃດ.

ໃນສັບປະດາແລ້ວນີ້ ທ່ານ Webb ຮຽກຮ້ອງໃຫ້ອົງການຢູເສດໂຈະໂຄງການດັ່ງກ່າວໄວ້
ຈົນກວ່າຫວຽດນາມຕົກລົງທີ່ຈະນຳໃຊ້ເງິນຈຳນວນທີ່ວ່ານີ້ສຳລັບທະຫານຫວຽດນາມເໜືອ
ພວກຫວຽດກົງ ແລະທະຫານຫວຽດນາມໃຕ້ ທີ່ເສຍຊີວິດ.

ທ່ານ Webb ເຄີຍສູ້ລົບຢູ່ຫວຽດນາມໃນນາມທະຫານມາຣີນແລະໄດ້ເດີນທາງໄປຢ້ຽມ
ຢາມປະເທດດັ່ງກ່າວເປັນປະຈຳ ນັບແຕ່ປີ 1991 ເປັນຕົ້ນມາ.