ເຈົ້າໜ້າທີ່ສະຫະລັດໃນຫວຽດນາມກ່າວວ່າຕົນໄດ້ຍື່ນໜັງສື
ປະທ້ວງຢ່າງເປັນທາງການ ຫຼັງຈາກເຈົ້າໜ້າທີ່ຮັກສາຄວາມ
ສະຫງົບຂອງຫວຽດນາມ ໄດ້ປະຕິບັດຢ່າງຮຸນແຮງ ຕໍ່ນັກ
ການທູດອະເມຣິກັນທ່ານນຶ່ງ ຂະນະທີ່ທ່ານພະຍາຍາມຈະ
ໄປຢ້ຽມ ຜູ້ຄັດຄ້ານລັດຖະບານທີ່ມີຊື່ສຽງຄົນນຶ່ງ.
ເຈົ້າໜ້າທີ່ສະຖານທູດສະຫະລັດກ່າວໃນວັນພະຫັດມື້ນີ້ວ່າ
ການປະຕິບັດທີ່ບໍ່ຖືກຕ້ອງດັ່ງກ່າວ ແມ່ນເປັນການລະເມີດ
ຢ່າງຈະແຈ້ງ ຕໍ່ສັນຍາເຈນີວາ ທີ່ໃຫ້ການປົກປ້ອງຄຸ້ມຄອງ
ພວກນັກການທູດຢູ່ໃນຕ່າງປະເທດ.
ພວກເຈົ້າໜ້າທີ່ສະຫະລັດບໍ່ໄດ້ໃຫ້ລາຍລະອຽດໃດໆກ່ຽວກັບເຫດການຊຶ່ງໄດ້ເກີດຂຶ້ນທີ່ເມືອງ
Hue ໃນມື້ວັນພຸດວານນີ້. ແຕ່ລາຍງານຂ່າວເວົ້າວ່າເຈົ້າໜ້າທີ່ກຳກັບນຳເລື່ອງສິດທິມະນຸດ
ຂອງສະຖານທູດ ທ່ານ Christian Marchant ໄດ້ເດີນທາງໄປຍັງເມືອງ Hue ໃນພາກ
ກາງຂອງຫວຽດນາມ ເພື່ອໄປຢ້ຽມຢາມຄຸນພໍ່ຫງຽນ-ວັນ-ລີຊຶ່ງເປັນພະຂອງສາສະໜາໂຣມັນ
ກາໂຕລິກທີ່ໄດ້ຖືກປ່ອຍອອກຈາກຄຸກເປັນການຊົ່ວຄາວຍ້ອນເຫດຜົນທາງດ້ານການແພດ.
ລາຍງານເວົ້າວ່າ ຕໍາຫຼວດໄດ້ຢຸດທ່ານ Marchant ຢູ່ນອກເຮືອນຂອງຄຸນພໍ່ແລະໄດ້ປໍ້າເພິ່ນ
ລົງພື້ນດິນ ກ່ອນທີ່ຈະນຳເອົາທ່ານ ຂຶ້ນລົດຕຳຫຼວດໄປ.
ໂຄສົກຄົນນຶ່ງຂອງກະຊວງການຕ່າງປະເທດສະຫະລັດທີ່ກຸງວໍຊິງຕັນກ່າວຕໍ່ VOA ວ່າ ນອກ
ນັ້ນຍັງໄດ້ມີການຍື່ນໜັງສືປະທ້ວງຢ່າງເປັນທາງການໄປຍັງທ່ານ Le Cong Phung ເອກ
ອັກຄະລັດຖະທູດຫວຽດນາມ ປະຈຳສະຫະລັດ.
