ບົດລາຍງານກ່ຽວກັບສະພາບການດ້ານສິດທິມະນຸດໃນທົ່ວໂລກຂອງກຸ່ມສິ້ງຊອມສິດ
ທິມະນຸດ Human Rights Watch ທີ່ໄດ້ນໍາອອກເຜີຍແຜ່ໃນວັນອາທິດທີ່ຜ່ານມານີ້
ເວົ້າວ່າ ຫວຽດນາມໄດ້ດໍາເນີນ “ການກວາດລ້າງຢ່າງເປັນລະບົບ” ໃນປີ 2011 ນັ້ນ
ຊຶ່ງໄດ້ນໍາໄປສູ່ການດໍາເນີນຄະດີຕໍ່ພວກນັກເຄື່ອນໄຫວ 30 ກ່ວາຄົນ ທີ່ໄດ້ຖືກກ່າວຫາ
ພາຍໃຕ້ອັນທີ່ບົດລາຍງານດັ່ງກ່າວເອີ້ນວ່າ “ພວກມາດກາທີ່ໃຊ້ຄວາມເວົ້າແບບຄຸມເຄືອ” ຢູ່ໃນກົດໝາຍອາຍາຂອງຫວຽດນາມ ແລະການຕັດສິນຈໍາຄຸກພວກເຂົາເຈົ້າ.
ລາຍງານຍັງເວົ້າອີກວ່າ ພວກຂຽນຄໍາເຫັນລົງໃນອິນເຕີແນັດ, ນັກປະພັນ, ພວກປົກ
ປ້ອງສິດທິມະນຸດ, ພວກນັກເຄື່ອນໄຫວດ້ານປົກປ້ອງດິນດອນ, ກຸ່ມສາສະໜາຕ່າງໆ
ແລະກຸ່ມອື່ນໆ ແມ່ນໄດ້ຕົກເປັນເປົ້າໝາຍຂອງພວກເຈົ້າໜ້າທີ່ຫວຽດນາມ ແລະຖືກ
ລົບກວນຮາວີ, ນາບຂູ່, ຈັບກຸມ, ທໍລະມານ ແລະຖືກຈໍາຄຸກ.
ທ່ານ Phil Robertson ຮອງຫົວໜ້າ ກຸ່ມ Human Rights Watch ປະຈໍາພາກພື້ນ
ເອເຊຍ ກ່າວວ່າ ການຈັບກຸມດັ່ງກ່າວແມ່ນລະເມີດຕໍ່ຈຸດຢືນຂອງຫວຽດນາມ ກ່ຽວກັບ
ສິດທິພົນລະເຮືອນ ແລະສິດທິດ້ານການເມືອງ.
ທ່ານ Robertson ເວົ້າວ່າ “ຕາມທີ່ພວກເຮົາຮູ້ກັນ ຢ່າງໜ້ອຍມີ 33 ຄົນແລ້ວ ທີ່
ຖືກຈໍາຄຸກໃນປີນີ້ ຍ້ອນວ່າໄດ້ໃຊ້ສິດຂອງຕົນເອງໃນການປາກເວົ້າ, ການຄົບຄ້າ
ສະມາຄົມກັນ ຫລືໂຮມຊຸມນຸມກັນຢ່າງສັນຕິ. ນັບຕັ້ງແຕ່ການຖືປ້າຍປະທ້ວງ ຫລື
ຂຽນຄໍາເຫັນລົງໃນອິນເຕີແນັດ ຊຶ່ງສິ່ງຕ່າງໆເຫລົ່ານີ້ ຄວນໄດ້ຮັບການປົກປ້ອງ
ຢູ່ໃນຫວຽດນາມ ເພາະວ່າຫວຽດນາມໄດ້ໃຫ້ສັຕຕະຍາບັນ ຫລືລົງນາມຮັບຮອງ
ເອົາສົນທິສັນຍາສາກົນວ່າດ້ວຍສິດທິພົນລະເມືອງແລະສິດທິການເມືອງນັ້ນແລ້ວ."
ໃນຈໍານວນພວກທີ່ໄດ້ຖືກຈັບ
ກຸມເມື່ອໝໍ່ໆມານີ້ ລວມມີນັກ
ເຄື່ອນໄຫວຍິງ ນາງ Bui Thi
Minh Hang ທີ່ຖືກຕັດສິນໃຫ້
ໄປຢູ່ໃນສູນດັດສ້າງ ເປັນເວລາ
ສອງປີ.
ທ່ານ Robertson ໄດ້ຮຽກຮ້ອງ
ໃຫ້ລັດຖະບານສະຫະລັດ ສືບຕໍ່
ດໍາເນີນການກົດດັນຕໍ່ລັດຖະບານ
ຫວຽດນາມ ເພື່ອໃຫ້ປ່ອຍຕົວ
ພວກນັກເຄື່ອນໄຫວທັງຫລາຍ.
ບົດລາຍງານຂອງກຸ່ມປົກປ້ອງສິດທິມະນຸດໄດ້ນໍາອອກເຜີຍແຜ່ ນຶ່ງມື້ລຸນຫລັງທີ່ຄະນະ
ຜູ້ແທນສະຫະລັດ ທີ່ນໍາໂດຍສະມາຊິກສະພາສູງ John McCain ແລະ Joseph
Lieberman ໄດ້ຕັກເຕືອນຫວຽດນາມວ່າ ການເສີມຂະຫຍາຍສາຍພົວພັນ ທາງທະຫານ ສອງຝ່າຍກັບສະຫະລັດ ແມ່ນຂຶ້ນຢູ່ກັບການປັບປຸງປະຫວັດດ້ານການນັບຖືສິດທິມະນຸດ
ຂອງຫວຽດນາມ.
ໃນກອງປະຊຸມຖະແຫລງຂ່າວໃນທ້າຍອາທິດຜ່ານມານີ້ ທ່ານ McCain ກ່າວວ່າ ທ່ານ ໄດ້ເວົ້າເຖິງຈຸດຢືນຂອງສະຫະລັດຢ່າງຈະແຈ້ງ ໃນລະຫວ່າງການພົບປະກັບພວກເຈົ້າໜ້າ
ທີ່ຂັ້ນສູງຂອງຫວຽດນາມ ແລະກໍໄດ້ເວົ້າເຖິງຄວາມເປັນຫ່ວງຂອງສະຫະລັດ ນໍາການ
ເຊື່ອມໂຊມລົງ ໃນການປະຕິບັດດ້ານສິດທິມະນຸດຂອງຫວຽດນາມ.
ທ່ານ McCain ເວົ້າວ່າ: “ຂ້າພະເຈົ້າຄິດວ່າ ມັນເປັນຄວາມຈິງເຊ່ນກັນ ທີ່ວ່າ
ບໍ່ມີຄວາມກ້າວໜ້າໃນບັນຫາສິດທິມະນຸດ. ທີ່ຈິງແລ້ວ ແມ່ນ ໄດ້ມີການຖອຍ
ຫລັງຊໍ້າໃນດ້ານນີ້. ຂ້າພະເຈົ້າໄດ້ກ່າວຕໍ່ພວກເຈົ້າໜ້າທີ່ຫວຽດນາມຢ່າງສະ
ເພາະເຈາະຈົງວ່າ ສາຍພົວພັນດ້ານຄວາມໝັ້ນຄົງຂອງພວກເຮົາ ຈະໄດ້ຮັບ
ການກະທົບໂດຍກົງຍ້ອນບັນຫາດ້ານສິດທິມະນຸດນີ້. ບໍ່ຕ້ອງສົງໃສໃດໆເລີຍ. ແລະຂ້າພະເຈົ້າຄິດວ່າ ພວກເຂົາເຈົ້າກໍເຂົ້າໃຈເລື້ອງນີ້ເປັນຢ່າງດີ."
ຫວຽດນາມໄດ້ພະຍາຍາມທີ່ຈະຂະຫຍາຍສາຍພົວພັນທາງທະຫານກັບສະຫະລັດ ແລະໄດ້
ແຈ້ງໃຫ້ຊາບ ກ່ຽວກັບ “ລາຍການອາວຸດທີ່ຕົນຢາກໄດ້” ໃນການພົບປະກັບພວກຜູ້ແທນລັດ
ຖະສະພາສະຫະລັດໃນອາທິດແລ້ວນີ້. ແຕ່ບໍ່ມີການເປີດເຜີຍລາຍລະອຽດໃດໆກ່ຽວກັບລາຍ
ການດັ່ງກ່າວນັ້ນ. ຫວຽດນາມກໍາລັງປະເຊີນໜ້າກັບສະພາບເຄັ່ງຕຶງກັບຟີລິບປິນ, ໄຕ້ ຫວັນ
ແລະ ໂດຍສະເພາະກໍແມ່ນຈີນ ກ່ຽວກັບການກ່າວອ້າງທີ່ຂັດແຍ້ງກັນ ເອົາກໍາມະສິດໃນພາກ
ສ່ວນທີ່ອຸດົມສົມບູນໄປດ້ວຍຊັບພະຍາກອນ ທໍາມະຊາດ ໃນທະເລຈີນໃຕ້ນັ້ນ.
ທ່ານສະມາຊິກສະພາສູງ Lieberman ກ່າວວ່າ ໃນຂະນະທີ່ສາຍພົວພັນລະຫວ່າງສະຫະ
ລັດ ແລະຫວຽດນາມ ໄດ້ຮັບການປັບປຸງໃຫ້ດີຂຶ້ນ ແຕ່ວ່າປະຫວັດດ້ານນັບຖືສິດທິມະນຸດ
ຂອງຫວຽດນາມ ຍັງສືບຕໍ່ເປັນອຸປະສັກຂວາງກັ້ນຢູ່.
ທ່ານ Lieberman ເວົ້າວ່າ “ສິ່ງທີ່ບໍ່ຖືກຕ້ອງ ກໍຄືມີການຖອຍຫລັງ ໃນເລື່ອງສິດ
ທິມະນຸດ. ແລະພວກເຮົາກໍໄດ້ເວົ້າອອກມາຢ່າງເຈາະຈົງ. ຄືພວກເຮົາເວົ້າວ່າ
ມີລະບົບອາວຸດບາງຢ່າງ ທີ່ຫວຽດນາມຢາກຊື້ຈາກພວກເຮົາ ແລະພວກເຮົາກໍ
ຢາກຂາຍຢາກໂອນໃຫ້ພວກເຂົາເຈົ້າ. ແຕ່ວ່າ ສິ່ງນີ້ຈະບໍ່ເກີດຂຶ້ນ ເວັ້ນເສຍແຕ່ວ່າ ພວກເຂົາເຈົ້າຈະປັບປຸງປະຫວັດດ້ານສິດທິມະນຸດຂອງຕົນກ່ອນ. ເວົ້າໃນທາງ
ປະຕິບັດຕົວຈິງແລ້ວ ກໍແມ່ນວ່າລັດຖະສະພາຈະບໍ່ອະນຸມັດໃຫ້ຂາຍອາວຸດເຫລົ່າ
ນີ້ແກ່ຫວຽດນາມ ເວັ້ນເສຍແຕ່ວ່າ ຈະມີການປັບປຸງດ້ານສິດທິມະນຸດຢູ່ໃນຫວຽດ
ນາມໃຫ້ດີຂຶ້ນ."
ທ່ານ Carl Thayer ນັກວິ
ເຄາະກ່ຽວກັບພາກພື້ນເອເຊຍ
ຕາເວັນອອກ ທີ່ມະຫາວິທະຍາ
ໄລ New South Wales ໃນ
ອອສເຕຣເລຍ ກ່າວວ່າ ການທີ່
ທັງຄະນະລັດຖະບານຂອງປະ
ທານາທິບໍດີ ບາຣັກ ໂອບາມາ
ແລະລັດຖະສະພາສະຫະລັດ
ໃຫ້ການສະໜັບສະໜຸນແກ່ການ
ເອົາການຂາຍອາວຸດ ໄປພົວພັນ
ໃສ່ກັບເລື່ອງສິດທິມະນຸດນັ້ນ
ແມ່ນເປັນເພີ້ມນໍ້າໜັກໃສ່ການ
ກົດດັນຕໍ່ລັດຖະບານຫວຽດນາມ ໃຫ້ທໍາການປະຕິຮູບ.
ທ່ານ Carl Thayer ກ່າວວ່າ “ເວົ້າສຸດໆກໍຄືວ່າ ລັດຖະບານໂອບາມາມີນະໂຍບາຍ
ທີ່ຈະຂາຍອາວຸດ ແຕ່ວ່າສິ່ງທີ່ຜູ້ນໍາສອງທ່ານຢູ່ໃນສະພາສູງໄດ້ກ່າວອອກມາແທ້ໆ
ແລ້ວ ກໍແມ່ນວ່າ ເຖິງແມ່ນຝ່າຍລັດຖະບານຢາກຈະປ່ຽນໃຈ ບໍ່ເອົາການຂາຍອາວຸດ
ໄປພັວພັນໃສ່ກັບເລື່ອງສິດທິມະນຸດກໍຕາມ ແຕ່ລັດຖະສະພາກໍຈະຂັດຂວາງບໍ່ໃຫ້
ຂາຍອາວຸດນັ້ນ. ສະນັ້ນ ເວົ້າງ່າຍໆກໍຄືວ່າ ພວກຫວຽດນາມແມ່ນໄດ້ຖືກເຕືອນໃຫ້
ຮູ້ແລ້ວ."
ຢູ່ໃນບົດລາຍງານຂອງຕົນນັ້ນ ກຸ່ມ Human Rights Watch ຍັງໄດ້ປະນາມຫວຽດນາມ
ທີ່ນໍາໃຊ້ການຄຸມຂັງໃນດ້ານບໍລິຫານ ແລະບັງຄັບໃຊ້ແຮງງານຕໍ່ພວກທີ່ເອີ້ນວ່າ ພວກສັງຄົມ
ບໍ່ປາດຖະໜາ ຊຶ່ງ ລວມທັງພວກທີ່ຕິດຢາເສບຕິດນໍາ. ກຸ່ມສິ້ງຊອມສິດທິມະນຸດດັ່ງກ່າວ
ເວົ້າວ່າ ມາຮອດຕົ້ນປີ 2011 ນັ້ນ ມີປະມານ 40,000 ຄົນແລ້ວ ລວມທັງເດັກນ້ອຍອາຍຸ
ພຽງ 12 ປີ ທີ່ໄດ້ຖືກຂັງຢູ່ສູນຄຸມຂັງ 123 ແຫ່ງ ໃນທົ່ວຫວຽດນາມ.
ກຸ່ມດັ່ງກ່າວເວົ້າວ່າ ພວກຖືກຄຸມຂັງທີ່ລະເມີດກົດລະບຽບຂອງສູນນັ້ນ ແມ່ນຈະຖືກທຸບຕີ
ຖືກເອົາໄຟຟ້າຈີ້ ແລະຖືກຂັງໄວ້ໃນຫ້ອງໃສ່ລະບຽບວີໄນ ໂດຍບໍ່ໃຫ້ກິນເຂົ້າກິນນໍ້າ.
