ສະຫະລັດໄດ້ເລີ່ມທໍາຄວາມສະອາດສິ່ງເປື້ອນເປິຈາກສານເຄມີເຮັດໃຫ້ໃບໄມ້ຫຼົ່ນສີໝາກກ້ຽງ ທີ່ກອງທັບສະຫະລັດໄດ້ພົ່ນລົງໃສ່ ໃນລະຫວ່າງປາງສົງຄາມສະຫະລັດກັບຫວຽດນາມ ປະມານເກືອບສີ່ສີບປີ ຫຼັງຈາກສົງຄາມ ດັ່ງກ່າວສິ້ນສຸດລົງ.
ບັນດາເຈົ້າໜ້າທີ່ຫວຽດນາມແລະສະຫະລັດໄດ້ລິເລີ່ມໂຄງການດັ່ງກ່າວໃນ ວັນພະຫັດມື້ນີ້ເພື່ອທໍາຄວາມສະອາດສານພິດ dioxin ທີ່ອະດີດຖານທັບ ສະຫະລັດແຫ່ງນຶ່ງທີ່ເມືອງດານັງ ບ່ອນທີ່ສານເຄມີສີໝາກກ້ຽງ ໄດ້ຖືກ ເກັບໄວ້ ແລະນໍາອອກໃຊ້ໃນລະຫວ່າງສົງຄາມ.
ໃນລະຫວ່າງສົງຄາມຫວຽດນາມ ທີ່ດໍາເນີນໄປຢ່າງດຸເດືອດ ໃນເວລານັ້ນ ສະຫະລັດໄດ້ພົ່ນ ສານເຄມີສີໝາກກ້ຽງ ໃນປະລິມານຫຼາຍລ້ານລິດ ລົງໃສ່ບໍລິເວນປ່າຕຶບດົງໜາເພື່ອເຮັດໃຫ້ໃບໄມ້ຫຼົ່ນໃນຄວາມພະຍາຍາມຊອກຫາກໍາລັງຄອມມີວນີສຫວຽດນາມນັ້ນ.
ແຕ່ສານເຄມີສີໝາກກ້ຽງດັ່ງກ່າວ ນອກຈາກຈະເຮັດໃຫ້ໃບໄມ້ຫຼົ່ນໃນເນື້ອທີ່ຫຼາຍລ້ານເຮັກຕາແລ້ວນັ້ນ ມັນຍັງໄດ້ພາໃຫ້ເກີດຜົນຮ້າຍຕາມມາຢ່າງບໍ່ໄດ້ເຈດຕະນານໍາ ເຊັ່ນການຖືກສໍາຜັດກັບສານພິດດັ່ງກ່າວ ມີສ່ວນເຊື່ອມໂຍງກັບການເປັນໂຣກມະເຮັງໃນລະບົບຫາຍໃຈ ເບົາຫວານ ແລະລູກເກີດມາບໍ່ສົມປະກອບ ເປັນຕົ້ນ.
ທ່ານ David Shear ເອກອັກຄະລັດຖະທູດສະຫະລັດປະຈໍາຫວຽດນາມ ກ່າວໃນພິທີເປີດໂຄງການດັ່ງກ່າວເມື່ອວັນພະຫັດມື້ນີ້ວ່າ ໂຄງການຮ່ວມ ທໍາຄວາມສະອາດນີ້ ຖືວ່າມີຄວາມສຳຄັນປະວັດສາດ ຊຶ່ງສະແດງໃຫ້ເຫັນວ່າ ຮ່າໂນ່ຍແລະວໍຊິງຕັນ ກໍາລັງພາກັນເອົາບາດກ້າວ ເທື່ອທໍາອິດເພື່ອກໍາຈັດມູນເຊື້ອສົງຄາມໃນອະດີດຂອງພວກເຮົາໃຫ້ໝົດໄປ.
ຄວາມພະຍາຍາມເພື່ອທໍາຄວາມສະອາດສານພິດເຄມີເປື້ອນເປີນີ້ ຊຶ່ງຈະດຳເນີນໄປຈົນເຖິງປີ 2016 ພາກປະຕິບັດກໍມີໂຮມທັງການກວດການທົດລອງ ແລະເກັບກໍາຕົວຢ່າງດິນ ໃນພື້ນທີ່ທີ່ໄດ້ຮັບຜົນກະທົບ ປະມານ 73,000 ແມັດກ້ອນ ແລະໃຊ້ຄວາມຮ້ອນສູງເພື່ອເຜົາໄໝ້ສານພິດທີ່ຍັງ ຕົກຄ້າງຢູ່ນັ້ນ ໃຫ້ໝົດສິ້ນຫຼືໝົດລິດໄປ.