ສະຫະລັດ ໄດ້ຮຽກຮ້ອງໃຫ້ທັງອັຟການິສຖານ ແລະປາກິສຖານ ເຮັດວຽກຮ່ວມກັນເພື່ອເອົາຊະນະພວກຫົວຮຸນແຮງ, ໂດຍຫວັງວ່າການໂຈມຕີຂອງພວກຕາລີບານ ເມື່ອບໍ່ດົນມານີ້ຈະບໍ່ເຮັດໃຫ້ ການດຳເນີນຄວາມພະຍາຍາມທີ່ແນໃສ່ເພື່ອຊຸກຍູ້ສັນຕິພາບ ແລະ ຄວາມປອງດອງຊາດ ຢູ່ໃນອັຟການິສຖານນັ້ນຢຸດຊະງັກລົງ.
ໂຄສົກກະຊວງການຕ່າງປະເທດ ທ່ານ John Kirby ໄດ້ກ່າວຕໍ່ບັນດານັກຂ່າວວ່າ ວໍຊິຕັນ ບໍ່ມີ “ຂໍ້ມູນລັບສະເພາະໃດໆ” ເພື່ອສະຫຼຸບວ່າ ປາກິສຖານ ໄດ້ມີສ່ວນຮ່ວມໃນການໂຈມຕີ ຢູ່ໃນເຂດຊາຍແດນຟາກຂອງອັຟການິສຖານ ຫຼື ບໍ່.
ທ່ານໄດ້ກ່າວພຽງບໍ່ເທົ່າໃດຊົ່ວໂມງຫຼັງຈາກປະທານາທິບໍດີ ອັຟການິສຖານ ທ່ານ Ashraf Ghani ໄດ້ຖິ້ມໂທດໂດຍກົງໃສ່ ປາກິສຖານວ່າ ພົວພັນຢູ່ເບື້ອງຫຼັງຂອງການໂຈມຕີດ້ວຍ ລະເບີດສະຫຼະຊີບ ໃນທ້າຍອາທິດອາທິດທີ່ຜ່ານມາ ແລະ ວັນຈັນວານນີ້ ຢູ່ນະຄອນຫຼວງ ກາບູລ.
ທ່ານ Kirby ກ່າວວ່າ “ມັນເປັນສິ່ງທີ່ຕ້ອງເອົາໃຈໃສ່ຢ່າງຮິີບດ່ວນ ສຳລັບປະເທດ ທັງສອງ ເພື່ອກຳຈັດບ່ອນຫຼົບລີ້ ແລະ ຫຼຸດຜ່ອນຄວາມສາມາດໃນການປະຕິບັດ ງານຂອງພວກ ຕາລີບານ ຢູ່ເຂດຊາຍແດນຂອງ ທັງສອງຝ່າຍ.”
ທ່ານໄດ້ກ່າວເພີ່ມເຕີມວ່າ ວໍຊິງຕັນ ຫວັງວ່າຄວາມ ຮຸນແຮງຂອງພວກ ກະບົດຈະບໍ່ທັບມ້າງ ຄວາມພະຍາຍາມ ເພື່ອຊອກຫາຊ່ອງທາງເຮັດໃຫ້ ບັນຫາຂັດແຍ້ງໃນ ອັຟການິສຖານ ສິ້ນສຸດລົງ ດ້ວຍການເຈລະຈາແບບ ສັນຕິວິທີ.
ທ່ານ Kirby ໄດ້ກ່າວວ່າ “ພວກເຮົາແນ່ນອນ ຢາກເຫັນຂັ້ນຕອນການສ້າງຄວາມ ປອງດອງ ທາງດ້ານການເມືອງກ້າວຕໍ່ໄປອີກ. ພວກເຮົາຢາກເຫັນຄວາມ ສັນຕິພາບ. ແລະ ການເຂົ້າ ຮ່ວມເມື່ອບໍ່ດົນມານີ້ ໃນການ ເຈລະຈາປອງດອງຊາດນັ້ນເມື່ອສອງ ສາມທິດທີ່ຜ່ານມາ ແນ່ນອນເປັນສັນຍານທີ່ເຮັດໃຫ້ມີກຳລັງໃຈ. ພວກເຮົາຢາກ ເຫັນສິ່ງນີ້ມີຄວາມກ້າວໜ້າຕໍ່ໄປ.”
ເຈົ້າໜ້າທີ່ ຈີນ ແລະ ສະຫະລັດ ໄດ້ເຂົ້າຮ່ວມໃນຖານະເປັນ “ຜູ້ສັງເກດການ” ໃນການ ເຈລະຈາສັນຕິພາບຄັ້ງທຳອິດຈັດໂດຍປາກິສຖານ ລະຫວ່າງ ລັດຖະບານ ອັຟການິສຖານ ແລະ ຜູ້ແທນ ຕາລິບານ ໃນວັນທີ 7 ກໍລະກົດທີ່ຜ່ານມາ.
