ລັດຖະມົນຕີກະຊວງການເງິນຂອງສະຫະລັດ ທ່ານນາງເຈແນັດ ແຢລເລັນ ມີກຳນົດທີ່ຈະເດີນທາງໄປຈີນ ໃນວັນພະຫັດມື້ນີ້ ເພື່ອພົບປະກັບເຈົ້າໜ້າທີ່ອະວຸໂສ ໃນຄວາມພະຍາຍາມເທື່ອຫຼ້າສຸດແກ້ໄຂບັນຫາຄວາມສຳພັນທີ່ເຄັ່ງຕຶງລະປະເທດທັງສອງ.
ກະຊວງການເງິນສະຫະລັດ ກ່າວຢູ່ໃນຖະແຫຼງການ ໃນຕົ້ນອາທິດນີ້ວ່າ ການຢ້ຽມຢາມຂອງທ່ານນາງແຢລເລັນ ຈະມີຂຶ້ນໄປຈົນຮອດວັນອາທິດ ພາຍໃຕ້ຄຳສັ່ງຂອງປະທານາທິບໍດີໂຈ ໄບເດັນ ເພື່ອລົງເລິກການຕິດຕໍ່ສື່ສານກ່ຽວກັບບັນຫາຕ່າງໆ ຮວມທັງການພັດທະນາດ້ານການເງິນແລະເສດຖະກິດມະຫາພາກ.
ຖະແຫຼງການກ່າວວ່າ “ໃນຂະນະຢູ່ທີ່ປັກກິ່ງ ລັດຖະມົນຕີແຢລເລັນຈະປຶກສາຫາລືກັບເຈົ້າໜ້າທີ່ຈີນ ກ່ຽວກັບຄວາມສຳຄັນ ຂອງປະເທດພວກເຮົາ ການຕິດຕໍ່ສື່ສານໂດຍກົງກ່ຽວກັບຫຼາຍໆຂົງເຂດທີ່ມີຄວາມເປັນຫ່ວງແລະການເຮັດວຽກຮ່ວມກັນເພື່ອແກ້ໄຂບັນຫາທ້າທາຍຕ່າງໆ.”
ເຈົ້າໜ້າທີ່ກະຊວງການເງິນກ່າວຕໍ່ພວກນັກຂ່າວໃນວັນອາທິດແລ້ວນີ້ວ່າ ສະຫະລັດຕ້ອງການຢາກມີຄວາມສຳພັນທາງດ້ານເສດຖະກິດທີ່ເຂັ້ມແຂງກັບຈີນ ແລະການຍຸຕິການຄ້າແລະການລົງທຶນ ຢ່າງເຕັມອັດຕານັ້ນ “ຈະເຮັດໃຫ້ບໍ່ມີສະຖຽນລະພາບ ສຳລັບປະເທດຂອງພວກເຮົາທັງສອງ ແລະເສດຖະກິດຂອງໂລກນຳດ້ວຍ.”