ລິ້ງ ສຳຫລັບເຂົ້າຫາ

ລັດຖະບານທ່ານ​ໂອ​ບາ​ມາ ​ໄດ້ຕຳ​ໜິຕິຕຽນ​ຈີນ​ອີກ​ຄັ້ງ​ໃໝ່ ​ທີ່​ຕັ້ງ
ຄ່າເງິນຕາ​ຂອງ​ຕົນຕໍ່າ​ເກີນ​ໄປ ​ແຕ່​ບໍ່ເຖິງ​ກັບ​ຂັ້ນທີ່ເອີ້ນ​ກຸງ​ປັກ​
ກິ​ງວ່າ​ເປັນ​ຜູ້​ຄວບ​ຄຸມ​ເງິນຕານັ້ນ.

ຢູ​ໃນ​ລາຍ​ງານປີ​ນຶ່ງ​ສອງ​ເທື່ອ​ຕໍ່​ລັດຖະສະພາ​ສະຫະລັດ ​ໃນ
​ວັນ​ພຸດ​ວານ​ນີ້ ກະຊວງ​ການ​ເງິນ​ສະຫະລັດ​ຮັບ​ຮູ້​ວ່າ ​ຄ່າ​ຂອງ
​ເງິນຢວນ ຂອງ​ຈີນ​ກຳລັງ​ສູງ​ຂຶ້ນ ​ແຕ່​ບໍ່​ເພີ່ມ​ຂຶ້ນ​ໄວຫຼື​ບໍ່​ສູງ​ຂຶ້ນ
ຫຼາຍ​ເທົ່າ​ທີ່​ຕ້ອງການ​.

ໃນ​ການ​ຕອບຕໍ່​ລາຍ​ງານ​ສະບັບ​ນີ້ທ່ານນາງ Hua Chunying
​ໂຄສົກ​ປະຈຳ​ກະຊວງການ​ຕ່າງປະ​ເທດ​ຈີນ ກ່າວ​ໃນ​ວັນ​ພະຫັດ​
ມື້​ນີ້​ວ່າ ກຸງ​ປັກ​ກິ​ງ​ໄດ້​ທຳ​ຄວາມ​ຄືບ​ໜ້າກ່ຽວກັບ​ເລື້ອງ​ເງິນຕາ​ຂອງ​ຕົນ ​ແລະ​ທ່ານ​ນາງ
ຮຽກຮ້ອງ​ໃຫ້​ສະ​ຫະລັດ​ບໍ່​ໃຫ້​ລົບກວນສາຍ​ພົວພັນ​ດ້ານ​ການ​ຄ້າ​ລະຫວ່າງ​ສອງ​ປະ​ເທດ
​ທີ່​ມີເສດຖະກິດ​ໃຫຍ່​ທີ່​ສຸດ​ຂອງ​ໂລກ.

ລັດຖະບານ​ກຸງ​ວໍ​ຊິງ​ຕັນ​ໄດ້​ກ່າວ​ຫາ​ກຸງ​ປັກ​ກິ​ງມາ​ເປັນ​ເວລາ​ດົນ​ນານແລ້ວວ່າ​ ກຸງ​ປັກ​ກິ​ງ
ຮັກສາຄ່າ​ເງິນຕາ​ຂອງ​ຕົນ​ໃຫ້​ຢູ່​ໃນ​ລະດັບ​ຕໍ່າ​ກວ່າ​ຄວາມ​ເປັນ ​ເຮັດ​ໃຫ້​ພວກ​ບໍລິສັດ​ຂອງ​
ຈີນ​ໄດ້​ປຽບ​ຢ່າງບໍ່​ຍຸຕິ​ທຳ​ຕໍ່​ພວກ​ບໍລິສັດ​ຂອງ​ສະຫະລັດ.

ຄ່າ​ເງິນຕາ​ທີ່​ມີລາຄາ​ຕໍ່າ​ຂອງ​ຈີນ​ເຮັດ​ໃຫ້​ລາຄາສິນຄ້າຂອງ​ຈີນ​ຖືກ​ກວ່າ​ຢູ່​ໃນ​ສະຫະລັດ ແລະ
​ເຮັດ​ໃຫ້​ສິນຄ້າ​ອາ​ເມຣິກັນໃນ​ຈີນ​ມີ​ລາຄາ​ແພງ​ກວ່າ.

ລາຍ​ງານ​ຂອງ​ກະຊວງ​ການ​ເງິນສະຫະລັດ​ເອີ້ນ​ເງິນຢວນວ່າ ມີຄ່າ​ຕໍ່າ​ຢ່າງ​ຫຼວງ​ຫຼາຍ ​ແລະ
ສະ​ເໜີ​ແນະ​ວ່າ ຈີນ​ໄດ້​ຮັກສາ​ບໍ່​ໃຫ້​ຄ່າ​ເງິນຕາ​ຂອງ​ຕົນ​ເພີ່ມ​ຂຶ້ນໂດຍ​ເລີ້ມ​ຕົ້ນ​ໃໝ່​ນະໂຍບາຍ
​ແຊກ​ແຊງ​ຂອງ​ລັດຖະບານ ​ໂດຍ​ສະ​ເພາະ​ໃນ​ການ​ຮັບ​ຊື້​ເງິນຕາ​ຕ່າງປະ​ເທດ​ຢ່າງ​ຫຼວງຫຼາຍ
​ໃນ​ປີ​ນີ້.

​ແຕ່​ລາຍ​ງານ​ສະບັບ​ນີ້​ບໍ່​ໄດ້​ລະບຸ​ຈີນ​ວ່າ ​ເປັນຜູ້​ເຂົ້າ​ຄວບ​ຄຸມ​ເງິນຕາ ຊຶ່ງ​ເປັນ​ການ​ລະບຸ​ທີ່​ສາມາດ
ນຳພາ​ໃຫ້​ມີ​ການ​ລົງ​ໂທດ​ດ້ານ​ການ​ຄ້າ​ຕໍ່​ຈີນ​ໄດ້​ໃນ​ອະນາ​ຄົດ ​ແລະ​ຈະ​ກະ​ຕຸ້ນ​ໃຫ້ກຸງ​ປັກ​ກິ​ງ​ສະ​
ແດງ​ປະຕິກິລິຍາ​ແບບ​ໂມ​ໂຫ​ໂທ​ໂສໄດ້ ​ແລະ​ເວົ້າ​ຕໍ່​ໄປ​ວ່າ ສະຫະລັດ​ຈະ​ສືບ​ຕໍ່​ຕິດຕາມ​ເບິ່ງ​ຄ່າ
​ຂອງ​ເງິນຢວນ ​ແລະ​ກົດ​ດັນ​ໃຫ້​ຈີນ​ທຳ​ການ​ປ່ຽນ​ແປງ​ນະ​ໂຍບາຍດ້ານ​ເງິນຕາຂອງ​ຕົນ​ຕໍ່​ໄປ.

ປະທານາທິບໍດີ ບາຣັກ ​ໂອ​ບາ​ມາ​ໄດ້​ໂຕ້​ແຍ້​ງວ່າ ຈີນເບິ່ງ​ຄື​ວ່າ​ຈະ​ທຳ​ການ​ປະຕິ​ຮູບທາງດ້ານ​
ເສດຖະກິດ​ຂອງ​ຕົນຖ້າ​ຫາກ​ສະຫະລັດ​ໃຊ້​ວິທີ​ການ​ທີ່​ເປັນ​ປໍ​ລະ​ປັກ​ນ້ອຍ​ລົງ. ​ເທື່ອ​ຫຼ້າ​ສຸດ​ທີ່​
ສະຫະລັດ​ຕັ້ງ​ເອີ້ນ​ຈີນ​ວ່າ ​ເປັນ​ຜູ້​ເຂົ້າ​ຄວບ​ຄຸມ​ເງິນຕາ ​ແມ່ນ​ໃນ​ປີ 1994 ພາຍ​ໃຕ້ລັດຖະບານ​
ຂອງ​ອະດີດ​ປະທານາທິບໍດີ ບີ​ລ ຄລິນ​ຕັນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG