ເຖິງແມ່ນຈະມີຄວາມກົດດັນ ຈາກພາຍໃນປະເທດ ແລະ ສາກົນ ເພື່ອຍືດເວລາອອກໄປກໍຕາມ, ປະທານາທິບໍດີ ໂຈ ໄບເດັນ ແມ່ນໄດ້ຍຶດໝັ້ນກັບຂີດເສັ້ນຕາຍວັນທີ 31 ສິງຫາຂອງທ່ານ ເພື່ອສຳເລັດການຖອນ ສະຫະລັດ ອອກຈາກ ອັຟ ການິສຖານ.
ລັດຖະບານຂອງທ່ານຈະຢຸດການປະຕິບັດການເພື່ອຍົກຍ້າຍຊາວ ອາເມຣິກັນ, ອັຟການິສຖານ ແລະ ຄົນຈາກປະເທດທີສາມອອກຈາກ ອັຟການິສຖານ ໄວກວ່າຂີດເສັ້ນຕາຍເພື່ອທີ່ຈະອະນຸຍາດໃຫ້ມີການຖອນກອງທະຫານ ອາເມຣິກັນ ແລະ ອຸປະກອນທາງທະຫານ, ອີງຕາມການກ່າວຂອງທຳນຽບຂາວ.
ທ່ານ ໄບເດັນ ໄດ້ກ່າວຈາກທຳນຽບຂາວ ເມື່ອຕອນບ່າຍວັນອັງຄານວານນີ້ວ່າ “ຕອນນີ້ພວກເຮົາຢູ່ໃນໄລຍະທີ່ຈະສິ້ນສຸດພາຍໃນວັນທີ 31 ສິງຫາ. ຍິ່ງພວກເຮົາແລ້ວໄວເທົ່າໃດ, ມັນກໍຍິ່ງດີກວ່າ. ການປະຕິບັດການໃນແຕ່ລະວັນຈະເພີ່ມຄວາມສ່ຽງຕໍ່ກອງທະຫານຂອງພວກເຮົາ.”
ທ່ານ ໄບເດັນ ໄດ້ກ່າວໃນຕອນບ່າຍ ຂອງວັນອັງຄານວານນີ້ວ່າ, ສະຫະລັດ ໄດ້ຊ່ວຍຍົກຍ້າຍປະ ຊາຊົນ 70,700 ຄົນນັບຕັ້ງແຕ່ວັນທີ 14 ສິງຫາເປັນຕົ້ນ ມາ. ແຕ່ໄດ້ຍອມຮັບວ່າ ການສຳເລັດການປະຕິບັດການພາຍໃນຂີດເສັ້ນຕາຍແມ່ນຂຶ້ນກັບການຮ່ວມມືຂອງກຸ່ມຕາລີບານ ໃນການອະນຸຍາດໃຫ້ຜູ້ອົບພະຍົບເຂົ້າໄປໃນສະໜາມບິນ. ທ່ານໄດ້ກ່າວວ່າ ທ່ານໄດ້ຖາມທຳນຽບຫ້າແຈ ແລະ ກະຊ່ວງການຕ່າງປະເທດ ສຳລັບແຜນການສຸກເສີນ ເພື່ອປັບປ່ຽນຕາຕະລາງ, ຖ້າມັນມີຄວາມຈຳ ເປັນ.
ໃນຄຳປາໄສຂອງທ່ານ, ທ່ານ ໄບເດັນ ບໍ່ໄດ້ກ່າວເຖິງການສິ້ນສຸດຖ້ຽວບິນຍົກຍ້າຍຖິ່ນຖານໄວກວ່າຂີດເສັ້ນຕາຍ, ແຕ່ໂຄສົກທຳນຽບຂາວ ທ່ານນາງ ເຈັນ ຊາກີ ໄດ້ຢືນຢັນຕໍ່ບັນດານັກຂ່າວໃນວັນອັງຄານວານນີ້ວ່າ “ມັນຈະຕ້ອງມີເວລາເພື່ອຄ່ອຍໆສິ້ນສຸດລົງ.”
ໂດຍປະຕິເສດທີ່ຈະສະໜອງ “ລາຍລະອຽດ ກ່ຽວກັບ ການປະຕິບັດການນັ້ນ,” ທ່ານນາງ ຊາກີ ໄດ້ກ່າວວ່າກຳລັງທະຫານ ອາເມຣິກັນ ໃນນະຄອນຫຼວງ ກາບູລ ແມ່ນໄດ້ປະເຊີນກັບໄພຂົ່ມຂູ່ຍິ່ງຂຶ້ນຈາກພວກ ISS-K, ເຊິ່ງອ້າງເຖິງເຄືອຂ່າຍ ໂຄຣາຊານ, ທີ່ອ້າງຕົນເອງວ່າເປັນສາຂາຂອງກຸ່ມຫົວຮຸນແຮງ ລັດອິສລາມ ທີ່ປະຕິບັດງານໃນເອເຊຍກາງ ແລະ ໃຕ້.
ໃນຕອນເຊົ້າຂອງວັນອັງຄານວານນີ້, ໂຄສົກກະຊວງປ້ອງກັນປະເທດ ທ່ານ ຈອນ ເຄີບີ ໄດ້ຢືນຢັນວ່າ ກອງທັບຈະຕ້ອງການເວລາເພື່ອຜ່ອນເບົາລົງກ່ອນຂີດເສັ້ນຕາຍ.
ທ່ານ ເຄີບີ ໄດ້ກ່າວໃນກອງປະຊຸມລາຍງານຕໍ່ບັນດານັກຂ່າວວ່າ “ຈະເວົ້າໂດຍ ລວມແລ້ວ, ເຈົ້າຕ້ອງການຢ່າງໜ້ອຍຫຼາຍມື້ ເພື່ອນຳເອົາຈຳນວນກອງກຳລັງ ແລະ ອຸປະກອນທີ່ພວກເຮົາມີຢູ່ທີ່ສະ ໜາມບິນ, ໄປສູ່ບ່ອນທີ່ປອດໄພ ແລະ ຖອນອອກຢ່າງມີປະສິດທິຜົນ. ຂ້າພະເຈົ້າຈະບໍ່ເວົ້າເຖິງເວ ລາທີ່ສະເພາະເຈາະຈົງ.”