ເຈົ້າໜ້າທີ່ຕໍ່ຕ້ານການກໍ່ການຮ້າຍຂອງສະຫະລັດ ກຳລັງທຳການສືບສວນ ໃນອັນທີ່ພວກເຂົາ
ເຈົ້າເອີ້ນວ່າ ໄພຂົ່ມຂູ່ຈາກພວກກໍ່ການຮ້າຍທີ່ໜ້າເຊື່ອຖື ແຕ່ຍັງບໍ່ທັນໄດ້ຮັບການຢືນຢັນເທື່ອ ທີ່ວາງແຜນຈະໃຫ້ມີຂຶ້ນພ້ອມໆກັນກັບວັນຄົບຮອບ 10 ປີ ໃນການໂຈມຕີຂອງພວກກໍ່ການ
ຮ້າຍຢູ່ສະຫະລັດ ໃນວັນທີ 11 ກັນຍາປີ 2001 ນັ້ນ.
ພວກເຈົ້າໜ້າທີ່ກ່າວໃນວັນພະຫັດວານນີ້ວ່າ ຕົນໄດ້ພົບເຫັນຂໍ້ມູນທີ່ແນະໃຫ້ຮູ້ວ່າ ການຂົ່ມຂູ່
ທີ່ໜ້າເຊື່ອຖືໄດ້ດັ່ງກ່າວອາດແນເປົ້າໝາຍໃສ່ນະຄອນຫຼວງວໍຊິງຕັນຫຼືນະຄອນນິວຢອກ. ເຈົ້າ
ໜ້າທີ່ເວົ້າວ່າ ຜູ້ຕ້ອງສົງໄສ 3 ຄົນຮວມທັງພົນລະເມືອງອະເມຣິກັນຄົນນຶ່ງໄດ້ເຂົ້າມາໃນສະ
ຫະລັດເມື່ອເດືອນສິງຫາຜ່ານມານີ້ ໂດຍຕັ້ງໃຈທີ່ຈະທຳການໂຈມຕີດ້ວຍລະເບີດລົດ.
ໃນຕອນແລງຂອງວັນພະຫັດວານນີ້ ທ່ານ Michael Bloomberg ເຈົ້າຄອງນະຄອນນິວ
ຢອກກ່າວວ່າ ນະຄອນນິວຢອກໄດ້ຍົກລະດັບກ່ຽວກັບການຮັກສາຄວາມປອດໄພເພື່ອຮັບມື
ກັບການຂົ່ມຂູ່ທີ່ວ່ານີ້. ເຖິງແມ່ນອາດຈະຕົກຢູ່ໃນໄພອັນຕະລາຍກໍຈິງແຕ່ທ່ານກໍໄດ້ຊຸກຍູ້ໃຫ້
ປະຊາຊົນໃນນະຄອນນິວຢອກສືບຕໍ່ການດຳລົງຊີວິດຂອງພວກເຂົາເຈົ້າຕາມປົກກະຕິ.
ຫົວໜ້າອົງການສັນຕິບານກາງ FBI ເຂດນະຄອນນິວຢອກທ່ານນາງ Jan Fedarcyk ຍັງ
ໄດ້ປະຕິເສດ ບໍ່ຍອມບົ່ງຊື່ກຸ່ມໃດນຶ່ງຢ່າງເປັນການສະເພາະທີ່ຢູ່ເບື້ອງຫຼັງການຂົ່ມຂູ່ໃນເທື່ອນີ້.
ແຕ່ທ່ານນາງເວົ້າວ່າ ຂໍ້ມູນທີ່ສະຫະລັດຮວບຮວມມາໄດ້ ໃນບຸກເຂົ້າໄປໂຈມຕີບ້ານພັກຂອງ
ນາຍ Osama bin-Laden ທີ່ປາກິສຖານໃນເດືອນພຶດສະພາຜ່ານມາ ສະແດງໃຫ້ເຫັນວ່າ
ກຸ່ມຕ່າງໆເຊັ່ນກຸ່ມອາລກາຍດາແມ່ນມີຄວາມສົນໃຈກ່ຽວກັບວັນທີທີ່ສະເພາະເຈາະຈົງ.
ທີ່ກຸງວໍຊິງຕັນເຈົ້າຄອງນະຄອນ Vincent Gray ກ່າວວ່າພວກເຈົ້າໜ້າທີ່ໃນນະຄອນຫຼວງ
ຂອງສະຫະລັດ ໄດ້ເອົາມາດຕະການລະມັດລະວັງດຳເນີນງານຮ່ວມກັບບັນດາພະແນກການ
ຕ່າງໆຂອງລັດຖະບານກາງ ເພື່ອຮັບມືກັບການຂົ່ມຂູ່ທີ່ວ່ານີ້. ທ່ານບໍ່ຍອມໃຫ້ລາຍລະອຽດທີ່
ສະເພາະເຈາະຈົງໃດໆ ແຕ່ກໍຮຽກຮ້ອງໃຫ້ປະຊາຊົນສືບຕໍ່ເຝົ້າລະວັງ.
ເຈົ້າຄອງນະຄອນທັງສອງກ່າວວ່າ ການຂົ່ມຂູ່ກ່ຽວກັບການໂຈມຕີທີ່ວ່ານີ້ອາດຈະ ລົບກວນ
ພິທີໃນມື້ວັນອາທິດ ເພື່ອລະລຶກເຖິງວັນຄົບຮອບໃນການໂຈມຕີໃນວັນທີ 11 ກັນຍານັ້ນ.
ຂະນະດຽວກັນທຳນຽບຂາວກ່າວວ່າ ປະທານາທິບໍດີບາຣັກໂອບາມາສືບຕໍ່ໄດ້ຮັບລາຍງານ ຂ່າວກ່ຽວກັບການຂົ່ມຂູ່ທີ່ວ່ານີ້ຕະຫຼອດເວລາ.
ເຈົ້າໜ້າທີ່ຄົນນຶ່ງຂອງທຳນຽບຂາວ ກ່າວຕໍ່ພວກນັກຂ່າວວ່າ ປະທານາທິບໍດີໄດ້ຂໍຮ້ອງໃຫ້
ພວກເຈົ້າໜ້າທີ່ຕໍ່ຕ້ານການກໍ່ການຮ້າຍ ເພີ່ມການດຳເນີນຄວາມພະຍາຍາມ ຂຶ້ນເປັນສອງ ເທົ່າເພື່ອປ້ອງກັນບໍ່ໃຫ້ມີການໂຈມຕີໃດໆເກີດຂຶ້ນຢູ່ໃນສະຫະລັດ.
