ຜູ້ບໍລິຫານລະດັບສູງຂອງກະຊວງບໍລິການລາຍຮັບພາຍໃນສະຫະລັດ (U.S. Internal Revenue Service) ຫຼື IRS ກ່າວຕໍ່ບັນດາພະນັກງານດ້ວຍນໍ້າຕາທີ່ໄຫລອອກມາ ໃນວັນພະຫັດວານນີ້ວ່າ ມີພະນັກງານປະມານ 6,000 ຄົນຈະຖືກໄລ່ອອກ, ອີງຕາມບຸກຄົນທີ່ຮູ້ກ່ຽວກັບເລື້ອງນີ້ກ່າວ, ເຊິ່ງການຕັດສິນໃຈໃນຄັ້ງນີ້ ຈະເຮັດໃຫ້ພະນັກງານຂອງກະຊວງດັ່ງກ່າວ ປະມານ 6 ເປີເຊັນ ຕ້ອງຖືກປົດອອກຈາກງານ ໃນຊ່ວງກາງລະດູການຍື່ນໜັງສືຄິດໄລ່ພາສີ ໂດຍເປັນຊ່ວງໄລຍະທີ່ມີຄວາມຫຍຸ້ງຍາກທີ່ສຸດ.
ການຕັດພະນັກງານຈໍານວນດັ່ງກ່າວລົງ ເປັນສ່ວນນຶ່ງຂອງຄວາມພະຍາຍາມຫຼຸດຂະໜາດຂອງກະຊວງຄັ້ງໃຫຍ່ຂອງປະທານາທິບໍດີ ດໍໂນລ ທຣຳ ເຊິ່ງໄດ້ແນເປົ້າໝາຍໃສ່ເຈົ້າໜ້າທີ່ຄວບຄຸມເບິ່ງແຍງທະນາຄານ, ພະນັກງານປ່າໄມ້, ນັກວິທະຍາສາດດ້ານຈະຫຼວດ ແລະ ພະນັກງານລັດຖະບານອີກຫຼາຍສິບພັນຄົນ. ຄວາມພະຍາຍາມດັ່ງກ່າວ ຖືກນໍາພາໂດຍມະຫາເສດຖີດ້ານເທັກໂນໂລຈີ ທ່ານ ອີລອນ ມັສຄ໌, ຜູ້ທີ່ໄດ້ໃຫ້ທຶນໃນການໂຄສະນາຫາສຽງຂອງ ທ່ານ ທຣໍາ ຫຼາຍທີ່ສຸດ.
ທ່ານ ມັສຄ໌ ເຂົ້າຮ່ວມກອງປະຊຸມການປະຕິບັດງານທາງດ້ານການເມືອງແບບອະນຸລັກນິຍົມ ຢູ່ທີ່ National Harbor, ໃນລັດ ແມຣີແລນ, ເມື່ອປະທານາທິບໍດີ ອາເຈນຕິນາ ທ່ານ ຮາເວຍ ມາເລ (Javier Milei), ເຊິ່ງຮູ້ຈັກກັນໃນຖານະຜູ້ທີ່ໃຊ້ ເລື່ອຍໂສ້ ເພື່ອສະແດງໃຫ້ເຫັນເຖິງມາຕະການທີ່ເດັດຂາດ ແລະນະໂຍບາຍທີ່ເຂັ້ມງວດຂອງລາວ ໃນການຫຼຸດຜ່ອນການໃຊ້ຈ່າຍຂອງລັດຖະບານລົງ.
ທ່ານ ມັສຄ໌ ກ່າວວ່າ “ນີ້ຄືເລື່ອຍໂສ້ສໍາລັບລະບົບລາດຊະການ,” ໃນຂະນະທີ່ມືຂອງລາວ ຍົກອຸປະກອນທີ່ມີພະລັງຂຶ້ນເພື່ອປະກອບເນື້ອໃນ ສໍາລັບສື່ເຖິງການຫຼຸດຈໍານວນຂອງພະນັກງານຂອງລັດຖະບານລົງ ຢ່າງຫຼວງຫຼາຍ.
ສະຫະພັນແຮງງານ ໄດ້ທໍາການຟ້ອງຮ້ອງເພື່ອພະຍາຍາມຢຸດການໄລ່ພະນັກງານອອກຢ່າງຫຼວງຫຼາຍ, ໃນນັ້ນ ມີພະນັກງານຂອງລັດຖະບານກາງຫຼາຍສິບພັນຄົນ ໄດ້ຖືກບອກວ່າ ພວກເຂົາເຈົ້າບໍ່ມີວຽກເຮັດອີກຕໍ່ໄປແລ້ວ, ແຕ່ຜູ້ພິພາກສາຂອງລັດຖະບານກາງໃນນະຄອນຫຼວງວໍຊິງຕັນ ໄດ້ທໍາການຕັດສິນໃນວັນພະຫັດວານນີ້ວ່າ ພວກເຂົາເຈົ້າສາມາດດຳເນີນການຕໍ່ໄປໄດ້ນະເວລານີ້.
ທ່ານນາງ ຄຣິສຕີ້ ອາມສ໌ຕຣອງ (Christy Armstrong), ຜູ້ອຳນວຍການຝ່າຍບຸກຄະລາກອນທີ່ມີຄວາມສາມາດຂອງ IRS, ກ່າວດ້ວຍນໍ້າຕາທີ່ໄຫລອອກມາ ໃນຂະນະທີ່ທ່ານນາງບອກພະນັກງານທາງໂທລະສັບວ່າ ເພື່ອນຮ່ວມງານຂອງພວກເຂົາເຈົ້າ ປະມານ 6,000 ຄົນ ຈະຖືກປົດອອກຈາກວຽກ ແລະຊຸກຍູ້ໃຫ້ພວກເຂົາເຈົ້າສະໜັບສະໜູນເຊິ່ງກັນແລະກັນ, ອີງຕາມການກ່າວທາງໂທລະສັບຂອງພະນັກງານຄົນນຶ່ງ.
ພະນັກງານຄົນນັ້ນ ກ່າວວ່າ “ທ່ານນາງສະແດງອອກມາທາງອາລົມທີ່ສຸດ.”
ຄາດວ່າ ຈະມີການປົດຕໍາແໜ່ງທັງໝົດ 6,700 ຄົນ, ອີງຕາມບຸກຄົນທີ່ລື້ງເຄີຍກ່ຽວກັບເລື້ອງນີ້, ແລະສ່ວນໃຫຍ່ ຈະແນເປົ້າໝາຍໃສ່ບັນດາພະນັກງານ ທີ່ຖືກຈ້າງມາເປັນສ່ວນນຶ່ງຂອງການຂະຫຍາຍໂຕ ພາຍໃຕ້ປະທານາທິບໍດີຈາກພັກເດໂມແຄຣັດ ທ່ານ ໂຈ ໄບເດັນ, ຜູ້ທີ່ມີຄວາມພະຍາຍາມໃນການບັງຄັບໃຊ້ກົດໝາຍຕໍ່ຜູ້ເສຍພາສີທີ່ຮັ່ງມີ.
ຟໍຣັມສະແດງຄວາມຄິດເຫັນ