ແມ່ຍິງລອຍນໍ້າທົນຫຼືມາຣາທອນ
ໄວກາງຄົນ ຄົນນຶ່ງ ໄດ້ຍຸຕິຄວາມ
ພະຍາຍາມຂອງລາວເພື່ອໃຫ້ໄດ້
ເປັນຄົນທໍາອິດທີ່ສາມາດລອຍ
ຂ້າມນໍ້າ ຈາກເກາະຄິວບາມາຍັງ
ສະຫະລັດ ໂດຍບໍ່ໃຊ້ກະຊັງປ້ອງ
ກັນປາສະຫຼາມ.
ໜ້າເຄືອຂ່າຍສັງຄົມ Twitter ຂອງ Penny Palfrey ເວົ້າວ່າ ລາວຕ້ອງໄດ້ຂຶ້ນຈາກນໍ້າ
ໃນຕອນເຊົ້າວັນອາທິດມື້ນີ້ ຍ້ອນກະແສນໍ້າໄຫຼແຮງຈາກທາງຕາເວັນອອກສຽງໃຕ້ ທີ່
ເປັນອຸບປະສັກບໍ່ໃຫ້ລາວສາມາດລອຍ ຕໍ່ໄປອີກໄດ້.
ແມ່ຍິງໄວ 49 ປີ ທີ່ມີຫລານແລ້ວຄົນນີ້ ໄດ້ລອຍນໍ້າມາ ເປັນຫຼາຍກວ່າ 40 ຊົ່ວໂມງກ່ອນ
ຖືກດຶງຂຶ້ນຈາກນໍ້າ.
ທີມງານຄຸ້ມກັນດູແລລາວກ່າວວ່າ ກ່ອນໜ້ານີ້ ນາງ Palfrey ລອຍນໍ້າໄດ້ດີ ແຕ່ກໍຖືກ
ແມງກະພຸນຕອດຫຼາຍເທື່ອ ແລະກໍປາກົດເຫັນປາສະຫຼາມຊະນິດ Hammerhead ຫຼື
ຫົວຄ້ອນຕີ ນໍາ. ນາງ Palfrey ໄດ້ໃຊ້ເຄື່ອງອຸບປະກອນທີ່ປ່ອຍກະແສໄຟຟ້າອ້ອມໂຕ
ເພື່ອໄລ່ປາສະຫຼາມ ບໍ່ໃຫ້ເຂົ້າມາໃກ້.
ມາຮອດວັນເສົາວານນີ້ ນາງ Palfrey ຊຶ່ງເປັນແມ່ຂອງລູກສາມຄົນ ແລະມີຫຼານນ້ອຍ
ສອງຄົນ ລອຍນໍ້າມາໄດ້ຫຼາຍກວ່າ 140 ກິໂລແມດ ຂອງໄລຍະທາງທັງໝົດ 166 ກິໂລ
ແມດ ຈາກຄິວບາ ຫາສະຫະລັດນັ້ນ.
ແມ່ຍິງຊາວອອສເຕຣເລຍເຊື້ອສາຍອັງກິດຄົນນີ້ ໄດ້ຄາດໝາຍວ່າ ການລອຍຂ້າມຊ່ອງ
ແຄບຟລໍຣິດາ ທີ່ເຕັມໄປດ້ວຍປາສະຫຼາມນັ້ນ ຈະຕ້ອງໃຊ້ເວລາດົນເຖິງ 50 ຊົ່ວໂມງ.
ນາງ Palfrey ຢາກຈະທໍາລາຍສະຖິຕິໂລກ ສໍາລັບການລອຍຂ້າມນໍ້າທະເລ ໂດຍບໍ່ຕ້ອງ
ອາໄສຕົວຊ່ວຍໃດໆໄດ້ໄກທີ່ສຸດ ຊຶ່ງສະຖິຕິດັ່ງກ່າວລາວໄດ້ສ້າງໄວ້ເອງເມື່ອປີຜ່ານມາ ເວລາ
ລາວລອຍໄດ້ 109 ກິໂລແມັດ ໂດຍບໍ່ໃຊ້ກະຊັງກັນປາສະຫຼາມ ຫຼືຊຸດກັນປຽກຢູ່ເຂດໝູ່ເກາະ
Cayman ທາງທິດໃຕ້ຂອງເກາະຄິວບານັ້ນ.
ການລອຍນໍ້າທີ່ບໍ່ເຖິງຈຸດໝາຍຂອງນາງ Palfrey ມີຂຶ້ນຫຼັງຈາກ ນາງ Diana Nyad ນັກ
ລອຍນໍ້າຊາວອາເມຣິກັນອາຍຸ 62 ປີ ໄດ້ພະຍາຍາມສອງເທື່ອ ເພື່ອລອຍຂ້າມຊ່ອງແຄບຟລໍຣິ
ດາ ໂດຍບໍ່ໃຊ້ກະຊັງກັນປາສະຫຼາມ ໃນປີກາຍນີ້ ແຕ່ກໍບໍ່ສໍາເລັດ.
ຜ່ານມາ ນາງ Susie Maroney ຊາວອອສເຕຣເລຍ ໄດ້ລອຍຂ້າມຊ່ອງແຄບດັ່ງກ່າວ ໃນປີ
1997 ເວລານາງອາຍຸໄດ້ 22 ປີ ໂດຍໄດ້ໃຊ້ກະຊັງປ້ອງກັນປາສະຫຼາມ.