ລິ້ງ ສຳຫລັບເຂົ້າຫາ

ຫົວໜ້າ NSA ກ່າວປ້ອງກັນ ການປະຕິບັດງານ ຂອງຕົນ (ວີດິໂອ)


ນາຍພົນ Keith Alexander ຫົວໜ້າອົງການ NSA ຂອງ​ສະຫະລັດ ໃຊ້ເວລາເປັນມື້ທີ​ສອງລຽນຕິດກັນ ​ໃນວັນພະຫັດມື້ນີ້ ເພື່ອໃຫ້ການໃນລັດຖະສະພາ ກ່ຽວກັບ​ໂຄງການ​​ເຝົ້າຕິດຕາມການ​ໃຊ້​ໂທລະສັບ​ແລະ​ອິນ​ເຕີ​ແນັດ​ຂອງ​ປະຊາຊົນ
ຫົວໜ້າອົງການຮັກສາຄວາມປອດໄພ​ແຫ່ງຊາດ ຫລື NSA
ຂອງ​ສະຫະລັດຈະໃຊ້ເວລາເປັນມື້ທີ​ສອງລຽນຕິດ ​ໃນວັນພະ
ຫັດມື້ນີ້ ເພື່ອໃຫ້ການຕໍ່ຄະນະກຳມະການລັດຖະສະພາ ກ່ຽວ
ກັບ​ໂຄງການເຝົ້າຕິດຕາມການ​ໃຊ້​ໂທລະສັບ​ແລະ​ອິນ​ເຕີ​ແນັດ​
ຂອງ​ປະຊາຊົນ ທີ່ເປັນບັນຫາໂຕ້ແຍ້ງກັນນັ້ນ.

ນາຍພົນ Keith Alexander ຈະປະເຊີນກັບຄໍາຖາມຕ່າງໆ
ນາໆຈາກບັນດາສະມາຊິກ ຄະນະກໍາມະການສືບລັບຂອງ
ສະພາຕໍ່າ ກ່ຽວກັບການເປີດເຜີຍ​ເມື່ອ​ໄວໆ​ມານີ້ ​ໃນ​ການຕິດ
ຕາມ​ກວດກາ​ເບິ່ງການ​ໃຊ້ໂທລະສັບແລະອິນເຕີແນັດຂອງ​ປະ
ຊາຊົນ. ທ່ານ Robert Mueller ຫົວໜ້າອົງການສັນຕິບານກາງ
ຫລື FBI ກໍເບິ່ງຄືວ່າ ຈະຖືກຊັກ​ຖາມ​ຫຼາຍໆ ຢ່າງເຊັ່ນກັນ ເມື່ອທ່ານໄປປະກົດໂຕ ຢູ່ຕໍ່
ໜ້າຄະນະກໍາມະການດ້ານຕຸລາການຂອງສະ ພາຕໍ່າສະຫະລັດ.

ໃນການໃຫ້ການໃນວັນພຸດວານນີ້ ຕໍ່ໜ້າຄະນະກໍາມະການດ້ານຈັດສັນງົບປະມານຂອງ ສະພາສູງນັ້ນ ທ່ານ Alexander ເວົ້າວ່າ ອົງການຂອງທ່ານກໍາລັງສອບສວນເບິ່ງວ່າ ທ້າວ Edward Snowden ຊຶ່ງ​ເປັນພະນັກງານສັນຍາຈ້າງທີ່ມີລະດັບການສຶກສາແລະ ປະສົບ
ການທີ່ຈໍາກັດນັ້ນໄດ້ຮັບອະນຸຍາດໃຫ້ເຂົ້າເຖິງລາຍລະອຽດອັນສໍາຄັນກ່ຽວກັບໂຄງການ
ແລະຫຼັງຈາກນັ້ນກໍ​ເປີດ​ເຜີຍຂໍ້ມູນ​ເຫຼົ່ານີ້ ໃຫ້ແກ່ໜັງສືພິມສອງ​ສະບັບ ໄດ້ແນວໃດ.

ເບິ່ງວີດິໂອກ່ຽວກັບຂ່າວນີ້:



ທ່ານ Alexander ສະແດງຄໍາເຫັນວ່າ “ຂ້າພະເຈົ້າມີຄວາມເປັນຫ່ວງຫຼາຍກ່ຽວກັບ
ການເຂົ້າເຖິງຂໍ້ມູນ ທີ່ລາວມີ ຊຶ່ງເປັນຂັ້ນຕອນທີ່ພວກເຮົາເຮັດ. ສິ່ງເຫລົ່ານັ້ນ
ເປັນສິ່ງທີ່ພວກເຮົາຕ້ອງໄດ້ເບິ່ງຄືນ ແລະແກ້ໄຂ.”


ແຕ່ທ່ານ Alexander ກໍໄດ້ກ່າວປ້ອງກັນໂຄງການເຝົ້າຕິດຕາມຂອງອົງການທ່ານວ່າ
ມັນໄດ້ທໍາລາຍ “ການກໍ່ການຮ້າຍຫລາຍໆສິບຄັ້ງ” ຢູ່ໃນສະຫະລັດ ແລະຢູ່ໃນປະເທດ
ອື່ນໆ ໃນ​ໄລຍະຫລາຍປີຜ່ານມານີ້.

ການໃຫ້ການຂອງທ່ານ Alexander ໄດ້ມີຂຶ້ນພາຍຫລັງຈາກທ້າວ Snowden ອາຍຸ
29 ປີ ຊຶ່ງ​ໃນປັດຈຸບັນ ອາໄສຢູ່ໃນສະຖານທີ່ປິດລັບແຫ່ງນຶ່ງ ໃນຮົງກົງ ໄດ້ກ່າວຕໍ່ໜັງສື
ພິມ South China Morning Post ວ່າ ລາວຈະຢູ່ໃນດິນ​ແດນຈີນ​ແຫ່ງ​ນີ້ ແລະຕໍ່ສູ້
ກັບ​ການດໍາເນີນຄວາມພະຍາຍາມ​ໃດໆ​ກໍ​ຕາມ ທີ່​ຢາກ​ໃຫ້ສົ່ງຕົວລາວ​ກັບ​ຄືນ​ມາ​ຍັງ​ສະ
ຫະລັດ ​ເພື່ອ ປະເຊີນກັບຂໍ້ກ່າວຫາກະທໍາຜິດດ້ານອາດຊະຍາກໍາທີ່​ອາດ​ມີ​ຂຶ້ນນັ້ນ.

ລາວກ່າວຕໍ່ໜັງສືພິມດັ່ງກ່າວເຖິງເຈດຈໍານົງຂອງລາວວ່າ ຢາກຮ້ອງຂໍໃຫ້ສານ ແລະ ປະຊາຊົນຮົງກົງ ເປັນຜູ້ຕັດສິນກ່ຽວກັບຊະຕາກໍາຂອງລາວ.

ເບິ່ງວີດິໂອອີກເລື້ອງນຶ່ງກ່ຽວກັບຂ່າວນີ້:


XS
SM
MD
LG