ເວລານີ້ປະທານາທິບໍດີ ບາຣັກ ໂອບາມາ ກໍາລັງຮຽກຮ້ອງໃຫ້ລັດຖະບານຊູດານ ຈົ່ງຍຸ
ຕິການນາບຂູ່ຮາວີຂອງຕົນ ຢູ່ໃນເຂດຊາຍແດນທາງພາກໃຕ້ຂອງປະເທດ ຖ້າບໍ່ດັ່ງນັ້ນ ຊູດານຈະຖືກໂດດດ່ຽວໂດຍນານາຊາດ.
ໃນຖະແຫລງການທີ່ບັນທຶກສຽງໄວ້ນັ້ນ ທ່ານໂອບາມາ ກ່າວວ່າລັດຖະບານຊູດານຈະ
ຕ້ອງຍຸຕິການປະຕິບັດການທາງທະຫານໃດໆກໍຕາມ ຂອງຕົນ ໃນເຂດພາກໃຕ້ຂອງ
ຊູດານໂດຍທັນທີ ໂຮມທັງການໂຈມຕີທາງ ອາກາດ ແລະບັງຄັບໃຫ້ພວກພົນລະເຮືອນ
ຍົກຍ້າຍບ່ອນຢູ່ອາໄສນັ້ນ.
ທ່ານໂອບາມາ ໄດ້ເອົາບາດກ້າວພິເສດເພື່ອ ທໍາການບັນທຶກສຽງຂໍ້ຄວາມເມື່ອວັນອັງ
ຄານວານນີ້ທີ່ເຈາະຈົງໃສ່ພວກຜູ້ນໍາຊູດານ ທັນທີຫລັງຈາກທ່ານກັບຈາກໄປຢ້ຽມຢາມ
Puerto Ricoດິນແດນທີ່ຢູ່ພາຍໃຕ້ການຄວບຄຸມຂອງສະຫະລັດ.
ທ່ານກ່າວວ່າ ພວກຜູ້ນຳທັງຂອງພາກເໜືອແລະພາກໃຕ້ຊູດານຈະຕ້ອງຮັບເອົາຄວາມ
ຮັບຜິດຊອບແລະຕົກລົງກັນຢຸດເຊົາການກໍ່ຄວາມຮຸນແຮງ.
ທ່ານໂອບາມາ ກ່າວອີກວ່າ ຖ້າຫາກວ່າພວກຜູ້ນໍາຊູດານ ປະຕິບັດຕາມ ພັນທະຂອງ
ຕົນຢ່າງເຕັມເມັດເຕັມໜ່ວຍ ແລະເລືອກເອົາສັນຕິພາບແລ້ວສະຫະລັດກໍຈະກະທໍາຕາມ
ທີ່ໄດ້ໃຫ້ຄໍາໝັ້ນສັນວ່າໄວ້ວ່າຈະສ້າງຕັ້ງຄວາມສໍາພັນແບບເປັນປົກກະຕິກັນລະຫວ່າງ
ສອງປະເທດ ແຕ່ແນວໃດກໍດີ ທ່ານໂອບາມາກ່າວຕໍ່ໄປວ່າ ຖ້າຫາກພວກຜູ້ນໍາຊູດານ
ບໍ່ເອົາຫົວຊາຫລືບໍ່ປະຕິບັດ ຕາມພັນທະຂອງພວກເຂົາເຈົ້າແລ້ວນັ້ນ ພວກເຂົາເຈົ້າກໍ
ຈະຖືກກົດດັນແລະຖືກໂດດດ່ຽວແລະຈະຕ້ອງເປັນຜູ້ຮັບຜິດຊອບຕໍ່ການກະທໍາໃດໆ
ຂອງ ພວກເຂົາເຈົ້າ.
ປະທານາທິບໍດີສະຫະລັດກ່າວວ່າ ສະຫະລັດ ແມ່ນມີຄວາມເປັນຫ່ວງຢ່າງເລິກເຊິ່ງຕໍ່
ວິກິດການທີ່ກໍາລັງເກີດຂຶ້ນຢູ່ເຂດພາກໃຕ້ຂອງຊູດານໃນຂະນະນີ້ ໂຮມທັງການສູ້
ລົບກັນຢູ່ໃນລັດ Kordofan ທາງພາກໃຕ້ຂອງປະເທດ ແລະພ້ອມກັບການໂຈມຕີ
ປະຊາຊົນທີ່ບໍ່ຄວາມຜິດໃດໆນັ້ນນໍາ.
