ລິ້ງ ສຳຫລັບເຂົ້າຫາ

ສະຫະລັດ ໂຈມຕີ ສະຖານທີ່ແຫ່ງຕ່າງໆໃນ ເຢເມນ


ພາບນີ້ໄດ້ມາຈາກວິດີໂອ ທີ່ສະໜອງໃຫ້ໂດຍ ທະຫານເຮືອ ສະຫະລັດ ທີ່ສະແດງໃຫ້ເຫັນເຫດການຫຼັງຈາກ ລູກສອນໄຟ Tomahawk ຂອງ ສະຫະລັດ ໄດ້ຍິງຖືກສະຖານທີ່ຕັ້ງເຣດາ ໃນເຂດແດນທີ່ຖືກຄວບຄຸມໂດຍພວກກະບົດ Houthi ຕາມຊາຍຝັ່ງທະເລແດງ. 13 ຕຸລາ 2016.

ກອງທັບ​ສະຫະລັດ ກ່າວ​ໃນ​ວັນ​ພະຫັດ​ມື້​ນີ້​ວ່າ ​ຕົນ​ໄດ້​ໂຈມ​ຕີ​ທີ່​ຕັ້ງ​ເຣດາ​ສາມ​ແຫ່ງ ​ໃນ​ເຢ​ເມນ​ ໃນ​ການ​ຕອບ​ໂຕ້​ຕໍ່​ການ​ຍິງລູກ​ສອນ​ໄຟ​ຈາກ​ດິນ​ແດນ​ທີ່​ຄວບຄຸມ​ໂດຍ​ພວກ​ກະບົດ Houthi ທີ່​ແນ​ເປົ້າ​ໝາຍ​ໃສ່ເຮືອ​ພິຄາດ​ສະຫະລັດ.

ຖະ​ແຫລ​ງການ​ທຳນຽບຫ້າ​ແຈ​ກ່າວ​ວ່າ ​ເຮືອ​ພິຄາດສະຫະລັດ USS Nitze ​ໄດ້​ຍິງ​ລູກ​ສອນ​ໄຟນຳ​ວິຖີ Tomahawk ​ໃສ່​ບັນດາ​ທີ່​ຕັ້ງ​ເຣດາ​ຢູ່​ເລາະ​ລຽບ​ຝັ່ງ​ທະ​ເລ​ແດງ​ຂອງ​ເຢ​ເມນ ຢູ່​ທາງ​ພາກ​ເໜືອ​ຂອງ​ສ່ອງ​ແຄບ Bab-el-Mandeb. ຖະ​ແຫລ​ງການນັ້ນ​ກ່າວ​ວ່າ ການທຳ ລາຍ​ທີ່​ຕັ້ງ​ເຣດາ​ຈະ​ຫລຸດຜ່ອນ​ຄວາມ​ສາມາດ​ຂອງ​ພວກເຂົາ​ທີ່ຈຳຕິດຕາມ ​ແລະ​ ແນ​ເປົ້າ ໝາຍໃສ່​ພວກ​ກຳ​ປັ່ນ​ໃນ​ອະນາ​ຄົດ.

​ໂຄສົກ​ທຳນຽບຫ້າ​ແຈ ທ່ານ Peter Cook ບັນ​ລະ​ຍາຍ​ການ​ໂຈມ​ຕີນີ້ວ່າ ເປັນການ “ປ້ອງ​ກັນ​ໂຕ” ​ເພື່ອ​ປ້ອງ​ກັນ​ທະ​ຫານສະຫະລັດ ​ແລະກຳ​ປັ່ນທ່ັງ​ຫລາຍ.

ທ່ານ​ກ່າວ​ອີກ​ວ່່າ “ສະຫະລັດ​ຈະ​ຕອບໂຕ້ຕໍ່​ການ​ຂົ່ມຂູ່​ໃດໆ​ຕໍ່ກຳ​ປັ່ນ​ຂອງ​ພວກເຮົ​າ ​ແລະ​ ການ​ສັນຈອນ​ທາງ​ການ​ຄ້າ ​ເທົ່າ​ທີ່ເໜາະ​ສົມ ​ທັງ​ຈະ​ດຳ​ເນີນ​ຮັກສາ​ເສລີພາບ​ຂອ​ງກາ​ນ​ເດີນ​ເຮືອ​ໄວ້ ໃນ​ລະ​ເລ​ແດງ ສ່ອງແຄບ Bab el-Mandeb ​ແລະ​ແຫ່ງ​ອຶ່ນໆ​ຢູ່​ທົ່ວ​ໂລກ.

ເຮືອພິຄາດ ສະຫະລັດ USS Mason ເດີນທາງຜ່ານຄອງ Suez ໃນເມືອງ Ismailia ປະເທດ ອີຈິບ, ວັນທີ 12 ມີນາ 2011.
ເຮືອພິຄາດ ສະຫະລັດ USS Mason ເດີນທາງຜ່ານຄອງ Suez ໃນເມືອງ Ismailia ປະເທດ ອີຈິບ, ວັນທີ 12 ມີນາ 2011.


ບັນດາ​ເຈົ້າ​ໜ້າ​ທີ່​ກ່າວ​ໃນ​ສັນ​ພຸດ​ວານ​ນີ້​ວ່າ ລູກ​ສອນ​ໄຟ​ທີ່​ຍິງ​ຢູ່ໃນ​ທະ​ເລ​ແດງ ແມ່ນ​ແນ​ໃສ່​ເຮື​ອພິຄາດ USS Mason ທີ່​ໄດ້​ຕິດຕາມ​ດ້ວຍ​ກຳ​ປັ່ນລົບ USS San Antonio ​ໃນ​ເວລາ​ນັ້ນ. ລູກ​ຈະຫຼວດດັ່ງກ່າວໄດ້​ພາດເປົ້າໝາຍ ບໍ່ໄດ້​ໄປ​ເຖິງ​ບັນດາກຳ​ປັ່ນ ​ຊຶ່ງ​ເຈົ້າ​ໜ້າ​ທີ່​ສະຫະລັດ ທີ່​ບໍ່ປະສົງ​ອອກ​ຊື່​ໄດ້​ກ່າວ​ຕໍ່​ວີ​ໂອ​ເອ.

​ເຮືອ​ພິຄາດດັ່ງກ່າວ ​ຖືກ​ສົ່ງ​ອອກ​ໄປ​ປະຕິບັດ​ງານ​ເວລາ​ໃດ​ທີ່​ພົບ​ເຫັນ​ວ່າມີການ​ຍິງ​ລູກ​ສອນ​ໄຟ ​ເຈົ້າ​ໜ້າ​ທີ່​ສະຫະລັດ​ອີກ​ຄົນ​ນຶ່ງ​ກ່າວ​ວ່າ ​ແຕ່​ມັນ​ບໍ່​ແຈ່ມ​ແຈ້ງວ່າ ການ​ປະຕິບັດ​ປ້ອງ​ກັນໂຕເທື່ອນີ້ ​ໄດ້​ເຮັດ​ໃຫ້​ລູກ​ສອນ​ໄຟຫັນເຫ​ອອກ​ນອກ​ເສັ້ນທາງ ຫລື​ມັນ​ຕົກລົງ​ສູ່​ທະ​ເລ​ແດງ​ດ້ວຍ​ເຫດ​ຜົນອື່ນ. ບັນດາ​ເຈົ້າ​ໜ້າ​ທີ່​ໄດ້​ຢືນຢັນ​ວ່າ ບໍ່​ມີ​ໃຜ​ຢູ່​ເທິງ​ເຮືອ​ພິຄາດ​ໄດ້​ຮັບ​ບາດ​ເຈັບ ​ແລະ​ເຮືອ​ກໍ​ບໍ່​ໄດ້​ຮັບ​ຄວາມ​ເສຍ​ຫາຍ​ໃດໆ.

ພວກ​ເຈົ້າ​ໜ້າ​ທີ່​ກ່າວ​ວ່າ ການ​ຍິງ​ລູກ​ສອນ​ໄຟ ​ເທື່ອ​ທີສອງ​ໃນ​ສີ່​ມື້​ທີ່​ຜ່ານ​ມາ ​ໄດ້ຍິງມາ​ຈາກ​ເຂດຄວບ​ຄຸມ​ຂອງ Houthi ທາງ​ພາກ​ໃຕ້​ຂອງ Al Hudaydah.

​ໃນ​ວັນ​ອັງຄານ​ທີ່​ຜ່ານ​ມາທຳນຽບຫ້າ​ແຈ​ໄດ້​ໃຫ້​ຮ່ອງ​ຮອຍກ່ຽວ​ກັບ​ການ​ອາດ​ເປັນ​ໄປ​ໄດ້ໃນ​ການຕອບ​ໂຕ້ໂຈ​ມຕີ​ຄືນ ດ້ວຍ​ຖະ​ແຫລ​ງການຂອງ​ໂຄສົກ​ທຳນຽບຫ້າ ​ແ​ຈ ຮ້ອຍ​ເອກ​ກອງ ທັບ​ເຮືອ ທ່ານ Jeff Davis ກ່າວ​ວ່າ ຜູ້ໃດ​ຍິງ​ໃ​ສ່ເຮືອ​ກອງທັບ ​ສະຫະລັດ ຢູ່​ນ່ານນໍ້າ​ສາກົນກໍແມ່ນວ່າຜູ້ນັ້ນ​ “ສ່ຽງ​ຕໍ່​ອັນຕະລາຍ."​

ອ່ານຂ່າວນີ້ຕື່ມເປັນພາສາອັງກິດ

ຖ່າຍທອດສົດ ປ. ດໍໂນລ ທຣຳ ກ່າວຄຳປາໄສ ຕໍ່ ອົງການສະຫະປະຊາຊາດ

XS
SM
MD
LG