ກະຊວງການຕ່າງປະເທດສະຫະລັດ ໄດ້ສ້າງຕັ້ງຄະນະປະຕິບັດງານພິເສດເພື່ອຮັບມືກັບວິກິດການຢູ່ໃນຊູດານ, ອີງຕາມໂຄສົກການຕ່າງປະເທດທີ່ໄດ້ຢືນຢັນຕໍ່ ວີໂອເອ ໃນວັນພຸດວານນີ້.
ໂຄສົກກະຊວງການຕ່າງປະເທດ ຍັງໄດ້ກ່າວວ່າ ກະຊວງການຕ່າງປະເທດໄດ້ສ້າງຕັ້ງຄະນະສະເພາະກິດ ດ້ານຄວາມຂັດແຍ້ງທາງທະຫານຂອງຊູດານ ເພື່ອກວດກາເບິ່ງການວາງແຜນ, ການຄຸ້ມຄອງ ແລະ ການຂົນສົ່ງຂອງກະຊວງ ທີ່ຕິດພັນກັບເຫດການຕ່າງໆຢູ່ໃນຊູດານ.
“ສະຫະລັດປະນາມຢ່າງແຮງ ຕໍ່ຄວາມຮຸນແຮງທີ່ຮ້າຍແຮງທີ່ສຸດ ລະຫວ່າງກອງ ກຳລັງປະກອບ ອາວຸດຊູດານ ຫລື SAF ແລະກອງກຳລັງທະຫານກອງໜູນ ເຄື່ອນຕົວຢ່າງວ່ອງໄວ ຫລື RSF. ການສູ້ລົບກັນຢ່າງຕໍ່ເນື່ອງລະຫວ່າງກອງ ກຳລັງ SAF ແລະກຳລັງທະຫານ RSF ເປັນໄພຂົ່ມຂູ່ຄວາມໝັ້ນຄົງ ແລະ ຄວາມປອດໄພຂອງພົນລະເຮືອນຊູດານ ແລະທໍາລາຍຄວາມພະຍາຍາມ ໃນການຟື້ນຟູ ການປ່ຽນຜ່ານໄປສູ່ລະບອບປະຊາທິປະໄຕຂອງຊູດານ."
ການປະທະກັນທີ່ເມືອງຄາຣ໌ທູມ (Khartoum) ໄດ້ເກີດຂຶ້ນໃນວັນເສົາຜ່ານມາ ລະຫວ່າງ ສະມາຊິກກອງກຳລັງປະກອບອາວຸດຊູດານ ແລະກຳລັງທະຫານກອງໜູນເຄື່ອນຕົວຢ່າງວ່ອງໄວ ແລະໄດ້ແຜ່ລາມເຂົ້າໄປໃນປະເທດຕື່ມອີກ, ໂດຍມີລາຍງານວ່າ ໄດ້ເຮັດໃຫ້ມີຜູ້ເສຍຊີວິດ ແລະ ບາດເຈັບຫລາຍຮ້ອຍຄົນ.
ຜູ້ນຳຂອງກຸ່ມຄູ່ສັດຕູກັນຄື ຫົວໜ້າ ກອງກຳລັງປະກອບອາວຸ SAF ນາຍພົນ ອັບແດລ-ແຟດຕາ ເບີຮານ (Abdel-Fattah Burhan) ແລະ ຫົວໜ້າກອງກຳລັງທະຫານກອງໜູນ RSF ນາຍພົນ ໂມຮາມເມັດ ແຮມດານ ດາກາໂລ (Mohammed Hamdan Dagalo), ທີ່ຮູ້ຈັກກັນໃນຊື່ ເຮເມັດຕີ (Hemedti) ໄດ້ຮ່ວມມືກັນກໍ່ລັດຖະປະຫານໃນປີ 2021 ເຊິ່ງເຮັດໃຫ້ປະເທດໄປສູ່ ການປົກຄອງຂອງທະຫານ.
ທັງສອງທ່ານໄດ້ຫັນໜ້າສູ້ກັນ ທ່າມກາງຄວາມຂັດແຍ່ງກ່ຽວກັບການແບ່ງປັນອຳນາດໃນລັດຖະບານໃໝ່.
ເຈົ້າໜ້າທີ່ການຕ່າງປະເທດກ່າວຕໍ່ວີໂອເອ ໃນຕອນແລງວັນອັງຄານທີ່ຜ່ານມາວ່າ ພວກເຂົາເຈົ້າບໍ່ຮູ້ຈັກເຖິງການເສຍຊີວິດ ຫຼືບາດເຈັບຂອງພົນລະເມືອງສະຫະລັດຄົນໃດໃນຊູດານໃນເວລານີ້.