ຮອງລັດຖະມົນຕີການຕ່າງປະເທດສະຫະລັດ ທ່ານ ເຄີດ ແຄັມເບລ (Kurt Campbell) ຈະຕ້ອນຮັບຮອງລັດຖະມົນຕີການຕ່າງປະເທດຈີນ ທ່ານ ໝ່າ ຈ້າວຊູ (Ma Zhaoxu) ໃນນະຄອນຫຼວງ ວໍຊິງຕັນ ໃນວັນພະຫັດມື້ນີ້. ການເຈລະຈາແມ່ນມີຈຸດປະສົງເພື່ອຮັກສາຊ່ອງທາງການສື່ສານທີ່ເປີດກວ້າງ ເພື່ອປ້ອງກັນການເຂົ້າໃຈຜິດ ແລະຄວາມຂັດແຍ່ງໂດຍບໍ່ໄດ້ຕັ້ງໃຈ, ໂດຍສະເພາະຢ່າງຍິ່ງແມ່ນໃນຊ່ວງເວລາທີ່ມີຄວາມເຄັ່ງຕຶງ.
ຫຼັງຈາກການສົນທະນາກັນແບບໂຕຕໍ່ໂຕ ເປັນເວລາສອງຊົ່ວໂມງ, ເຈົ້າໜ້າທີ່ຈາກສະຫະລັດ ແລະສາທາລະນະລັດ ປະຊາຊົນ ຈີນ ຈະຈັດງານລ້ຽງອາ ຫານທ່ຽງເພື່ອເຮັດວຽກ ຢູ່ທີ່ກະຊວງການຕ່າງປະເທດ. ຫຼັງຈາກນັ້ນໃນຕອນບ່າຍ, ຮອງທີ່ປຶກສາດ້ານຄວາມໝັ້ນຄົງແຫ່ງຊາດຂອງສະຫະລັດ ທ່ານ ຈອນ ໄຟເນີ (Jon Finer) ຈະສືບຕໍ່ສົນທະນາກັບທ່ານ ໜ່າ (Ma).
ການຢ້ຽມຢາມຂອງທ່ານ ໝ່າ ຈ້າວຊູ (Ma Zhaoxu) ແມ່ນມີຂຶ້ນຫຼັງຈາກການເດີນທາງໄປຍັງ ນະຄອນ ຊຽງໄຮ່ ແລະນະຄອນຫຼວງ ປັກກິ່ງ ໃນເດືອນເມສາ ຂອງລັດຖະມົນຕີການຕ່າງປະເທດສະຫະລັດ ທ່ານ ແອນໂທນີ ບລິງເກັນ. ບັນດາເຈົ້າໜ້າທີ່ກ່າວວ່າ ມັນເປັນການເສີມຂະຫຍາຍການພົວພັນທາງດ້ານການທູດທີ່ເຂັ້ມຂຸ້ນ ຂອງສະຫະລັດກັບ ສປ ຈີນ ເພື່ອຈັດການກັບການແຂ່ງຂັນໃນ ຄວາມສຳພັນຢ່າງມີຄວາມຮັບຜິດຊອບ, ແມ່ນແຕ່ໃນບັນດາພື້ນທີ່ ທີ່ທັງສອງ ປະເທດບໍ່ເຫັນດີນຳກັນກໍຕາມ.
“ຂະນະທີ່ພວກເຮົາສືບຕໍ່ດຳເນີນການເຄື່ອນໄຫວເພື່ອປົກປັກຮັກສາຜົນປະໂຫຍດ ແລະ ຄຸນຄ່າຂອງບັນດາພັນທະມິດ ແລະ ບັນດາຄູ່ຮ່ວມມືຂອງພວກເຮົາ, ພວກເຮົາຍັງໄດ້ນຳໃຊ້ການພົວພັນທາງການທູດແບບປະເຊີນໜ້າ ກັບ ສປ ຈີນ ເພື່ອສື່ສານ ກ່ຽວກັບຈຸດຢືນ ແລະ ຄວາມຕັ້ງໃຈຂອງພວກເຮົາຢ່າງຈະແຈ້ງ ແລະ ໂດຍກົງ ແລະສ້າງຄວາມຄືບໜ້າໃຫ້ກັບບັນຫາໃນລະດັບສອງຝ່າຍ, ພາກພື້ນ, ແລະລະດັບໂລກທີ່ສຳຄັນຕໍ່ປະຊາຊົນຊາວອາເມຣິກັນ ແລະໂລກ,” ໂຄສົກກະຊວງການຕ່າງປະເທດກ່າວຕໍ່ວີໂອເອ.
ໂຄສົກກະຊວງການຕ່າງປະເທດ ຂອງ ສປ ຈີນ ກ່າວວ່າ ທ່ານ ໜ່າ ຍັງຈະ “ພົວພັນ ແລະ ສື່ສານກັບບັນດາຜູ້ຕາງໜ້າຈາກຂະແໜງການຕ່າງໆ ໃນສະຫະລັດ.” ໃນໄລຍະການຢ້ຽມຢາມສະຫະລັດ ຈາກວັນທີ 30 ພຶດສະພາຫາວັນທີ 2 ມິຖຸນານີ້.
ຟໍຣັມສະແດງຄວາມຄິດເຫັນ