ລິ້ງ ສຳຫລັບເຂົ້າຫາ

ກອງ​ກຳລັງ​ ສຫລ ​ແລະ ​ເກົາຫຼີ​ໃຕ້ ເຝິກຊ້ອມບຸກຂຶ້ນຝັ່ງ ໃນການຮ່ວມຊ້ອມລົບ Foal Eagle ປະຈຳປີ


ເຮືອສະເທີນນ້ຳສະເທີນບົກ ຂອງທະຫານນາວິກາໂຍທິນ ເກົາຫຼີໃຕ້ ແລ່ນມຸ່ງໜ້າເຂົ້າຝັ່ງ ທ່າມກາງຄວັນປົກປິດ ໃນການເຝິກຊ້ອມບຸກຂຶ້ນຝັ່ງ ໃນລະຫວ່າງການຊ້ອມລົບ ຮ່ວມກັນ ຂອງສະຫະລັດ ແລະ ເກົາຫຼີໃຕ້ ປະຈຳປີ ທີ່ເອີ້ນວ່າ Foal Eagle.

ທີ່ເກົາຫລີ​ໃຕ້ ກອງ​ກຳລັງ​ຂອງ ສະຫະລັດ ​ແລະ ​ເກົາຫຼີ​ໃຕ້ ​ໄດ້
​ທຳການ​ເຝິກ​ແອບ​ການ​ບຸກຂຶ້ນຝັ່ງ ​ໃນ​ວັນ​ຈັນ​ມື້​ນີ້ ​ໃກ້ໆ​ກັບ​ເມືອງ​
ທ່າ Pohang ຊຶ່ງ​ເປັນ​ພາກສ່ວນ​ນຶ່ງ​ຂອງ​ການ​ຊ້ອມ​ລົບປະຈຳ​ປີ
ທີ່​ເອີ້ນ​ວ່າ Foal Eagle ນັ້ນ.

ຮ້ອຍ​ໂທນາ​ວິ​ກະ​ໂຍທິນສະຫະລັດ Justin Whitaker ທີ່​ປະຈຳ
ການ​ຢູ່ຄ້າຍທະຫານ ​ທີ່​ເກາະ Okinawa ຂອງ​ຍີ່ປຸ່ນ ​ກ່າວ​ເຖິງ​
ເປົ້າໝາຍ​ໃນ​ການ​ຊ້ອມ​ລົບ​ນີ້​ວ່າ “​ໃນ​ກໍລະນີ​ທີ່​ເກີດ​ວິ​ກິດການ​
ຂຶ້ນ ຊຶ່ງກອງທັບ​ເກົາຫຼີ​ໃຕ້ ຕະຫລອດ​ທັງກອງທັບ​ສະຫະລັດ
ກໍຄົງຈະ​ໄດ້ເຂົ້າ​ໄປ​ພົວພັນ​ ​ແນ່ນອນວ່າ ເພື່ອ​ຮັບ​ມື​ກັບການ​
ຂົ່ມຂູ່​ໃດໆ​ກໍ​ຕາມນັ້ນ ຕະຫລອດ​ທັງ​ປົກ​ປ້ອງ​ຊາວ​ເກົາ​ຫຼີ​ໃຕ້​
ໃຫ້​ປອດ​ໄພ ກໍ​ຄື​ເຮັດໃຫ້​ດີ​ທີ່​ສຸດ​ ທີ່​ພວກ​ເຮົາ​ເຮັດ​ໄດ້ ເພື່ອສະໜອງ​ການປົກ​ປ້ອງ ​
ແລະ ​ອີກ​ຄັ້ງນຶ່ງ ​ເພື່ອ​ຮັບ​ມືກັບວິ​ກິດ​ການ​ເທົ່າ​ນັ້ນ.”

​ບັນດາເຈົ້າໜ້າ​ທີ່​ກອງທັບເກົາຫຼີ​ໃຕ້ ກ່າວ​ວ່າ ການ​ເຝິກ​ແອບ ​ໄດ້​ລະດົມ​ເອົາ ທະຫານ​ຈາກ
ກອງທັບ​ເຮືອ ​ແລະ ນາ​ວິ​ກະ​ໂຍທິນ ຫລື Marines ປະມານ 7,600 ຄົນ ມາ​ປະກອບສ່ວນ ​ແລະ ​ເຮືອ​ 30 ​ລຳ ພ້ອມ​ທັງ ​ເຮືອຍົກ​ພົນ​ຂຶ້ນຝັ່ງ​ ​ອີກຫຼາຍໆລຳ.

​ເມື່ອ​ຕົ້ນ​ເດືອນ​ນີ້ ​ເກົາຫຼີ​ເໜືອ ​ໄດ້​ຍິງ​ລູກ​ສອນ​ໄຟຂີປະ​ນາ​ວຸດ ລະຍະ​ສັ້ນສອງ​ລູກ ອອກ​
ຈາກ​ແຄມ​ຝັ່ງ​ຕາ​ເວັນ​ອອກ​ຂອງ​ປະ​ເທດ ຫຼາຍໆ​ຊົ່ວ​ໂມງ ກ່ອນ​ໜ້າການ​ເຝິກຊ້ອມ​ຮ່ວມ​ກັນ
ທາງທະຫານຂອງ​ສະຫະລັດ​ ​ແລະ ​ເກົາຫຼີ​ໃຕ້ ຈະ​ເລີ້ມ​ຕົ້ນຂຶ້ນ.

​ເກົາຫຼີ​ເໜືອ ທຳ​ການປະ​ທ້ວງເປັນ​ປະຈຳ ຕໍ່​ການຊ້ອມລົບ​ຮ່ວກກັນ​ດັ່ງກ່າວ ຊຶ່ງ​ຕົນ​ເອີ້ນ​ວ່າ
ເປັນ​ການ​ເຝິກຊ້ອມສຳ​ຫລັບ​ການບຸກລຸກຕົນ.

ການ​ຊ້ອມລົບ Foal Eagle ຈະດຳ​ເນີນ​ໄປ​ຈົນຮອດ ວັນ​ທີ 24 ​ເມສາ.

ຖ່າຍທອດສົດ ປ. ດໍໂນລ ທຣຳ ກ່າວຄຳປາໄສ ຕໍ່ ອົງການສະຫະປະຊາຊາດ

XS
SM
MD
LG