ໂຊລໄດ້ປະກາດໃນວັນອັງຄານມື້ນີ້ ວ່າ ສະຫະລັດ ແລະ ເກົາຫຼີໃຕ້
ຈະເລີ້ມ ການຊ້ອມລົບຮ່ວມທາງທະຫານປະຈຳປີ ໃນຕົ້ນເດືອນ
ໜ້ານີ້ ຊຶ່ງເປັນການເຄື່ອນໄຫວ ທີ່ຈະເຮັດໃຫ້ເກົາຫຼີເໜືອໂກດແຄ້ນ
ຢ່າງແນ່ນອນ.
ລັດຖະມົນຕີປ້ອງກັນປະເທດເກົາຫຼີໃຕ້ ກ່າວວ່າ ການຊ້ອມລົບທີ່ມີ
ຊື່ວ່າ Key Resolve ສ່ວນໃຫຍ່ແລ້ວຈະເປັນການເຝິກຊ້ອມ ທີ່
ຄອມຜິວເຕີ້ ຈຳລອງເຫດການຂຶ້ນມາ ແລະການຊ້ອມລົບ Foal
Eagle ນັ້ນ ເປັນການເຝິກຊ້ອມຂະໜາດໃຫຍ່ພາກສະໜາມ ຈະ
ເລີ້ມຕົ້ນຂຶ້ນໃນວັນທີ 2 ມີນາຈະມາເຖິງນີ້.
ການຊ້ອມລົບຕ່າງໆ ເປັນແຫລ່ງທີ່ກໍ່ໃຫ້ເກີດຄວາມເຄັ່ງຕຶງຕະຫລອດມາ ໃນແຫລມເກົາຫຼີ. ພຽງຢາງເຫັນການຊ້ອມລົບເຫຼົ່ານີ້ວ່າເປັນການກະກຽມເພື່ອຮຸກຮານຕົນ. ແຕ່ໂຊລ ແລະ ວໍຊິງຕັນ ຢືນຢັດວ່າ ການການຊ້ອມເຫຼົ່ານີ້ ແມ່ນຢູ່ໃນລັກສະນະ ເພື່ອເປັນການສະກັດກັ້ນເທົ່ານັ້ນ.
ເມື່ອຕົ້ນເດືອນນີ້ ພຽງຢາງ ໄດ້ສະເໜີ ຈະຢຸດການທົດລອງອາວຸດນິວເຄລຍຂອງຕົນຊົ່ວຄາວ ຖ້າຫາກສະຫະລັດ ແລະ ເກົາຫຼີໃຕ້ ຍົກເລີກການຊ້ອມລົບທາງທະຫານຕ່າງໆ.
ໂຄສົກກະຊວງປ້ອງກັນປະເທດເກົາຫຼີໃຕ້ ທ່ານ Kim Min-seok ໄດ້ກ່າວຕໍ່ກອງປະຊຸມ
ຖະແຫລງຂ່າວ ໃນວັນອັງຄານມື້ນີ້ວ່າ “ທ່າທີ ແລະຄຳຖະແຫລງຕ່າງໆ ທີ່ເປັນການ
ທ້າທາຍເກາະຜິດ ຂອງເກົາຫຼີເໜືອນັ້ນ ຈະບໍ່ມີຜົນເລີຍ” ທ່ານເວົ້າຕື່ມວ່າ “ການ
ຊ້ອມລົບ Key Resolve ແລະ Foal Eagle ນັ້ນ ໄດ້ວາງແຜນໄວ້ ມາຕັ້ງແຕ່
ປີແລ້ວນີ້ ແລະ ພວກເຮົາກຳລັງຈະດຳເນີນການຕາມແຜນ ຊຶ່ງບໍ່ກ່ຽວພັນກັບທ່າທີ
ຂອງເກົາຫຼີເໜືອ. ມັນເປັນການເຝິກແອບປະຈຳປີ ໃນລັກສະນະແບບປ້ອງກັນ.”
ທ່ານ Kim ກ່າວວ່າ ໂຊລ ໄດ້ແຈ້ງໃຫ້ເກົາຫຼີເໜີຊາບແລ້ວ ກ່ຽວກັບແຜນການຊ້ອມລົບ
ແຕ່ຍັງບໍ່ໄດ້ຮັບຄຳຕອບໃດໆເລີຍ.
