ສະຫະລັດ ໄດ້ສົ່ງລະບົບຕໍ່ຕ້ານລູກສອນໄຟ Patriot ເພີ້ມຕື່ມ
ໄປປະຈຳການເປັນການຊົ່ວຄາວຢູ່ເກົາຫຼີໃຕ້. ການເຄື່ອນໄຫວ
ດັ່ງກ່າວມີຂຶ້ນເພື່ອເປັນການຕອບໂຕ້ຕໍ່ການທົດລອງນິວເຄລຍ
ແລະການຍິງລູກສອນໄຟ ໄລຍະໄກ ຂອງເກົາຫຼີເໜືອ ຫວ່າງບໍ່
ດົນມານີ້.
ຜູ້ບັນຊາການກອງກຳລັງສະຫະລັດໃນເກົາຫຼີໃຕ້ຫຼືກອງທັບບົກ
ທີແປດ ພົນໂທThomas Vandal ກ່າວວ່າ ການເຄື່ອນໄວນີ້
ແມ່ນເພື່ອຄ້ຳປະກັນວ່າ ພວກເຮົາກຽມພ້ອມສະເໝີ ທີ່ຈະປ້ອງ
ກັນການໂຈມຕີຈາກເກົາຫລີເໜືອ.
ການສົ່ງລະບົບຕໍ່ຕ້ານລູກສອນໄຟໄປປະຈຳການຊົ່ວຄາວດັ່ງກ່າວມີຂຶ້ນກ່ອນການເຈລະ
ຈາລະຫວ່າງສະຫະລັດແລະເກົາຫລີໃຕ້ ຊຶ່ງມີກຳນົດຈະໄຂຂຶ້ນໃນອາທິດຈະມາກ່ຽວກັບ
ການສົ່ງ ລະບົບຕໍ່ຕ້ານລູກສອນໄຟ ທີ່ກ້າວໜ້າທັນສະໄໝ ໄປປະຈຳການ ຊຶ່ງເຈົ້າໜ້າທີ່
ປ້ອງກັນປະເທດຂອງເກົາຫລີໃຕ້ໄດ້ໃຫ້ການຢືນຢັນກ່ຽວກັບເລື້ອງນີ້.
ສະຫະລັດແລະເກົາຫຼີໃຕ້ ປະກາດຢ່າງເປັນທາງການໃນອາທິດແລ້ວນີ້ວ່າ ຕົນມີຄວາມ
ຕັ້ງໃຈທີ່ຈະສົ່ງລະບົບປ້ອງກັນລູກສອນໄຟ ໃນລະດັບສູງ ທີ່ຮູ້ກັນໃນນາມTHAAD ນັ້ນ
ໄປປະຈຳການຢູ່ເກົາຫຼີໃຕ້ ໂດຍໄວເທົ່າທີ່ຈະໄວໄດ້.
ວັນເວລາທີ່ແນ່ນອນກ່ຽວກັບການຈັດສົ່ງລະບົບປ້ອງກັນລູກສອນໄຟດັ່ງກ່າວໄປນັ້ນແມ່ນ
ຈະຂຶ້ນຢູ່ກັບການເຈລະຈາຢ່າງເປັນທາງການທີ່ຈະມາຂຶ້ນໃນອາທິດຈະມານີ້ອີງຕາມເຈົ້າ
ໜ້າທີ່ກະຊວງປ້ອງກັນປະເທດ ຂອງເກົາຫລີໃຕ້ ທີ່ໄດ້ໃຫ້ການຊີ້ແຈງ ໂດຍຂໍສະຫງວນຊື່
ໃນວັນສຸກວານນີ້.
