ສະຫະລັດ ແລະ ເກົາຫຼີໃຕ້ ໄດ້ເລີ່ມການຝຶກຊ້ອມການທະຫານຮ່ວມປະຈຳປີໃນວັນຈັນມື້ນີ້, ຖ່າມກາງການຂົ່ມຂູ່ຢ່າງໂມໂຫຈາກ ເກົາຫຼີເໜືອ.
ທະຫານ ສະຫະລັດ ແລະ ເກົາຫຼີໃຕ້ ຫຼາຍ 80,000 ຄົນໄດ້ເຂົ້າຮ່ວມໃນການຝຶກຊ້ອມທີ່ສ້າງຂຶ້ນຈາກຄອມພິວເຕີ ຫຼື Ulchi Freedom, ເຊິ່ງຈຳລອງການຕອບສະໜອງຕໍ່ການຮຸກຮານໂດຍ ເກົາຫຼີເໜືອ.
ການຝຶກຊ້ອມແມ່ນຈັດຂຶ້ນຖ່າມກາງຄວາມເຄັ່ງຕຶງທີ່ສູງຢູ່ໃນແຫຼມເກົາຫຼີ ຫຼັງຈາກທະຫານ ເກົາຫຼີໃຕ້ ສອງຄົນໄດ້ຖືກເຮັດໃຫ້ເສຍຂາ ເມື່ອລະເບີດຝັງດິນໄດ້ແຕກໃນເວລາທີ່ພວກເຂົາຢ່າງລາດຕະເວນຕາມເຂດປອດທະຫານທີ່ໄດ້ແບ່ງແຍກທັງສອງປະເທດຂູ່ແຂ່ງ ອອກຈາກກັນ. ນະຄອນຫຼວງ ໂຊລ ໄດ້ກ່າວໂທດໃສ່ ນະຄອນຫຼວງ ພຽງຢາງ ສຳລັບການວາງລະເບີດດັ່ງກ່າວ, ແລະ ໄດ້ສືບຕໍ່ກະຈາຍສຽງໂຄສະນາຊວນເຊື່ອຜ່ານທາງໂທລະໂຄ່ງໃກ້ກັບເຂດຊາຍແດນທີ່ເຄັ່ງຕຶງຂອງສອງປະເທດ ເປັນຄັ້ງທຳອິດໃນຫຼາຍຫກວ່າໜຶ່ງທົດສະວັດໃນວັນເສົາທີ່ຜ່ານມາ.
ເກົາຫຼີເໜືອ ໄດ້ປະຕິເສດການກ່າວຫາຂອງ ເກົາຫຼີໃຕ້. ພວກເຂົາກ່າວວ່າ ການອອກອາກາດ ແລະ ການຝຶກຊ້ອມທັງສອງຢ່າງນີ້ສົ່ງຜົນຕໍ່ການປະກາດສົງຄາມ, ແລະ ສັນຍາວ່າຈະ “ຕອບໂຕ້ທາງທະຫານທີ່ຮຸນແຮງທີ່ສຸດ” .
ປະທານາທິບໍດີ ເກົາຫຼີໃຕ້ Park Guen-hye ວັນຈັນມື້ນີ້ ໄດ້ຮຽກຮ້ອງໃຫ້ມີການກຽມພ້ອມທະຫານຢ່າງຈິງຈັງໃນແຫຼມເກົາຫຼີ.
ທ່ານ ນາງ Park Guen Hye ກ່າວວ່າ “ຈັ່ງໃດກໍຕາມ ເກົາຫຼີເໜືອ ບິດເບືອນ ແລະ ກ່າວປະນາມຄວາມສຳຄັນຂອງການຝຶກຊ້ອມ Ulchi ທຸກໆປີ, ໂດຍການສືບຕໍ່ຂົ່ມຂູ່ທາງການທະຫານຕະຫຼອດມາ. ຕາບໃດທີ່ຍັງສະແດງທ່າທາງເປັນສັດຕູຢູ່ ແລະ ການຂົ່ມຂູ່ຍົວະອາລົມຂອງ ເກົາຫຼີເໜືອ ຍັງສືບຕໍ່ຢູ່ ພວກເຮົາກໍຈະຕ້ອງມີຄວາມພ້ອມກັບ ການຍັບຢັ້ງທີ່ແຂງແຮງເພື່ອຕອບໂຕ້ ເກົາຫຼີເໜືອ, ແລະ ການຝຶກຊ້ອມ Ulchi ແມ່ນໂອກາດທີ່ດີທີ່ສຸດເພື່ອກວດກາ ແລະ ກວດກາຖານະຄວາມພ້ອມຂອງພວກເຮົາ ເພື່ອຮັບປະກັນຄວາມປອດໄພຂອງປະຊາຊົນ ແລະ ຄວາມໝັ້ນຄົງຂອງປະເທດ.”
ນະຄອນຫຼວງ ໂຊລ ແລະ ວໍຊິງຕັນ ບັນຍາຍການຝຶກຊ້ອມທາງການທະຫານ ດັ່ງກ່າວວ່າເປັນພຽງການປ້ອງການຕົວຢ່າງສະອາດບໍລິສຸດ. ເກົາຫຼີເໜືອ ຄອມມູນິສ ແລະ ເກົາຫຼີໃຕ້ ປະຊາທິປະໄຕ ໂດຍທາງການແລ້ວແມ່ນຍັງຢູ່ໃນສົງຄາມ ພາຍໃຕ້ສັນຍາສະຫງົບເສິກທີ່ໄດ້ສິ້ນສຸດສົງຄາມເກົາຫຼີ 3 ປີ ໃນປີ 1953.
