ລິ້ງ ສຳຫລັບເຂົ້າຫາ

ວັນຈັນ, ໒໗ ພຶດສະພາ ໒໐໒໔

ສະຫະລັດ ແລະ ເກົາຫລີໃຕ້ ຊ້ອມລົບ ປະຈໍາປີ ຮ່ວມກັນ (ສະໄລດ໌)


ທະຫານເກົາຫລີໃຕ້ ເລີ້ມທໍາການຊ້ອມລົບກັບທະຫານສະຫະລັດ ໃກ້ກັບຊາຍແດນໝູ່ບ້ານ Panmunjorn ທີ່ເກົາຫລີໃຕ້ ໃນວັນຈັນມື້ນີ້ ທີ 11 ມີນາ 2013.
ທະຫານເກົາຫລີໃຕ້ ເລີ້ມທໍາການຊ້ອມລົບກັບທະຫານສະຫະລັດ ໃກ້ກັບຊາຍແດນໝູ່ບ້ານ Panmunjorn ທີ່ເກົາຫລີໃຕ້ ໃນວັນຈັນມື້ນີ້ ທີ 11 ມີນາ 2013.
ສະຫະລັດ ​ແລະ​ທະຫານ​ເກົາຫລີ​ໃຕ້ ​ໄດ້​ເລີ້ມ​ທໍາ​ການ​ຊ້ອມ​ລົບ
ປະ​ຈໍາປີ ທີ່​ມີ​ຫົວ​ຂໍ້​ວ່າ “ຄວາມ​ຕັ້ງ​ໃຈ​ທີ່​ສໍາຄັນ” ​ເຖິງ​ແມ່ນ​ວ່າ ​
ເກົາຫລີ​ເໜືອໄດ້​ຂົ່ມຂູ່ ທີ່​ຈະຕອບໂຕ້​ ໂດຍການ​ລົບ​ລ້າງສັນຍາ
​ສະຫງົບ​ເສິກ​ຊົ່ວຄາວ ທີ່​ຍຸດຕິສົງຄາມ​ເກົາຫລີນັ້ນ.

ກຸງ​ພຽງຢາງ ຍັງ​ໄດ້​ຂົ່ມຂູ່​ ​ທີ່​ຈະ​ຍິງ​ນິວ​ເຄລຍໂຈມ​ຕີ​ ສະຫະລັດ ​
ເຖິງ​ແມ່ນ​ວ່າບັນດາ​ນັກ​ວິເຄາະ​ເຊື່ອ​ວ່າ ​ ປັດຈຸບັນ​ນີ້ເກົາຫລີເໜືອ
ຍັງ​ບໍ່​ມີຄວາ​ມສາມາດທີ່​ຈະ​ທໍາ​ການ​ໂຈມ​ຕີ​ດັ່ງກ່າວ​ໄດ້ ​ກໍ​ຕາມ.

​ໃນ​ການ​ຕອບ​ໂຕ້ໂດຍ​ທັນທີ ຕໍ່​ການ​ເລີ້ມ​ຊ້ອມ​ລົບໃນ​ວັນ​ຈັນ​ມື້​ນີ້
ເກົາ​ຫລີ​ເໜືອ ​ໄດ້ປະຕິບັດ​ຕາມ​ຄໍາຂູ່ອີກ​ອັນນຶ່ງ ທີ່ວ່າ​ຈະ​ຕັດ
ໂທລະສັບ​ສາຍ​ດ່ວນ ລະ​ຫວ່າງ ກຸງ​ພຽງຢາງ ​ແລະ​ກຸງໂຊ​ລນັ້ນ.
ການ​ທົດ​ລອງຕິດ​ຕໍ່ ​ໃຊ້​ສາຍ​ດ່ວນ​ດັ່ງກ່າວ​ສອງ​ຄັ້ງ​ຈາກ​ກຸງ​ໂຊ​ລ ​
ໃນ​ວັນ​ຈັນ​ມື້​ນີ້ ບໍ່​ໄດ້​ຮັບ​ຄໍາ​ຕອບ​ໃດໆ.

ການ​ຊ້ອມ​ລົບ​ປີ​ນີ້ ທີ່ຈະ​ສີ້​ນສຸດ​ລົງ​ໃນ​ວັນ​ທີ 21 ​ເດືອນ​ມີນາ ​ແມ່ນ​ຕິດຕາມ​ມາ ​ຫລັງ​ຈາກ​ເກົາຫລີ​ເໜືອ ທໍາ​ການ​ທົດ​ລອງ​ນີວ​ເຄລຍຄັ້ງ​ທີ່​ສາມ ໃນ​ເດືອນ​ແລ້ວ​ນີ້ ທີ່ສົ່ງ​ຜົນໃຫ້ ສະພາ​ຄວາມ​ໝັ້ນຄົງ ສະຫະ​ປະຊາ​ຊາດ ​ຮັບຜ່ານ​ມະຕິ​ອີກ​ສະບັບ​ນຶ່ງ​ ​ລົງ​ໂທດ​ໜັກ​ຂື້ນ​ກ່ວາເກົ່າ​ຕໍ່ເກົາຫລີ​ເໜືອ.

ຄໍາຂູ່​ຈາກ​ເກົາຫລີ​ເໜືອ ​ໃນ​ລະຫວ່າງ​ການ​ຮ່ວມ​ຊ້ອມ​ລົບ​ກັນ ​ລະຫວ່າງ​ສະຫະລັດ​ກັບ​
ເກົາຫລີ​ໃຕ້ນັ້ນ ບໍ່ແມ່ນ​ເລື້ອງ​ໃໝ່ ​ແຕ່​ວ່າ ບັນດາ​ນັກວິ​ເຄາະ ​ມີ​ຄວາມ​ຢ້ານກົວ​ວ່າ ຖ້າຫາກ
​ເກີດອຸປະຕິ​ເຫດ​ໃດ​ນຶ່ງຂຶ້ນ​ມາ ມັນອາດ​ເຮັດ​ໃຫ້​ມີ​ການ​ປະ​ເຊີນ​ໜ້າ ທີ່​ສາມາດທະວີຂື້ນ
ໄປ​ສູ່​ການ​ຂັດ​ແຍ້​ງທີ່​ຮ້າຍ​ແຮງ. ໂດຍ​ທົ່ວ​ໄປ​ແລ້ວ ກຸງພຽງ​ຢາງຈະກ່າວ​ວ່າ ການຊ້ອມລົບ
ແມ່ນການ​ເຝິກ​ແອບ ເພື່ອບຸກ​ລຸກເກົາຫລີ​ເໜືອ.

​ຕາມ​ປົກກະຕິ​ແລ້ວ ​ເກົາຫລີ​ໃຕ້ຈະບໍ່​ມີ​ປະຕິກິ​ລິ​ຍາ​ ຕອບ​ໂຕ້​ຕໍ່​ຄໍາ​ຂູ່​ຈາກພຽງ​ຢາງ.
ແຕ່​ວ່າ ຫວ່າງ​ມໍ່ໆ​ມາ​ນີ້ ກຸງ​ໂຊ​ລ​ໄດ້​ໃຫ້​ຄໍາ​ໝັ້ນ​ສັນ​ຍາ ທີ່​ຈະຕອບ​ໂຕ້ ຕໍ່​ການ​ກໍ່ກວນໃດໆ
ຈາກ​ເກົາຫລີ​ເໜືອ.

XS
SM
MD
LG