ປະທານາທິບໍດີ ຄົນໃໝ່ ໂຊມາເລຍ ພົບປະ ທ່ານໂອບາມາ (ວີດີໂອ)

ສະຫະລັດໄດ້ເປີດສັກກະລາດໃໝ່ໃນຄວາມສຳພັນທາງດ້ານ
ການທູດ ຫລັງຈາກໄດ້ຮັບຮູ້ ລັດຖະບານໂຊມາເລຍຢ່າງເປັນ
ທາງການເທື່ອທໍາອິດ ໃນຮອບສອງທົດສະວັດ.

ປະທານາທິບໍດີຄົນໃໝ່ຂອງໂຊມາເລຍ ທ່ານ Hassan Sheikh
Mohamud ໄດ້ພົບປະທີ່ກຸງວໍຊິງຕັນ ກັບປະທານາທິບໍດີບາຣັກ
ໂອບາມາຊຶ່ງໄດ້ຢຸດແວ່ໄປຢ້ຽມການເຈລະຈາລະຫວ່າງທ່ານ Mo-
hamud ແລະຮອງທີ່ປຶກສາດ້ານຄວາມໝັ້ນຄົງແຫ່ງຊາດ ຂອງ
ສະຫະລັດ.

ທ່ານໂອບາມາໄດ້ກ່າວເຖິງອັນທີ່ທຳນຽບຂາວເອີ້ນວ່າ ຄວາມປະ ທັບໃຈທາງດ້ານການເມືອງ ຂອງໂຊມາເລຍ ຕະຫຼອດທັງຄວາມ
ໝັ້ນຄົງທີ່ໄດ້ຮັບແລະເວົ້າວ່າ ທ່ານມີຄວາມຫວັງໄປໃນແງ່ດີກ່ຽວ
ກັບອະນາຄົດຂອງໂຊມາເລຍ.

ຫລັງຈາກນັ້ນ ທ່ານ Mohamud ກໍໄປຍັງກະຊວງການຕ່າງປະເທດສະຫະລັດເພື່ອແລກ ປ່ຽນບົດບັນທຶກທາງດ້ານການທູດກັບລັດຖະມົນຕີການຕ່າງປະເທດສະຫະລັດທ່ານນາງ Hillary Clinton ຊຶ່ງເປັນບາດກ້າວທີ່ໃຫ້ການຢືນຢັນໃນການຮັບຮູ້ຂອງສະຫະລັດຕໍ່ລັດ ຖະບານໃໝ່ໂຊມາເລຍ.

ທ່ານນາງ Clinton ກ່າວເຖິງການເຄື່ອນໄຫວດັ່ງກ່າວນີ້ວ່າ ເປັນເຫດການສຳຄັນທາງປະ ຫວັດສາດໂດຍເວົ້າວ່າ ມັນບໍ່ແມ່ນການສິ້ນສຸດລົງ ໃນການເດີນທາງ ແຕ່ຫາກເປັນບາດ ກ້າວສຳຄັນໄປສູ່ການສິ້ນສຸດດັ່ງກ່າວ.

ໃນການໃຫ້ສຳພາດແກ່ວີໂອເອພະແນກພາສາໂຊມາເລຍໃນວັນພະຫັດວານນີ້ປະທານາ ທິບໍດີ Mohamud ກ່າວວ່າ ການຮັບຮູ້ຂອງສະຫະລັດ ແມ່ນບາດກ້າວໄປຂ້າງໜ້າ ແລະ ການບັນລຸຄວາມສຳເລັດທາງດ້ານການທູດ ສຳລັບລັດຖະບານຂອງທ່ານແລະປະຊາຊົນ ຊາວໂຊມາເລຍທົ່ວໄປ.

ທ່ານກ່າວຕື່ມວ່າ ມັນຈະແຜ້ວທາງໃຫ້ໂຊມາເລຍ ໄດ້ກັບຄືນເຂົ້າໄປຮ່ວມອົງການຕ່າງໆ ຂອງນາໆຊາດ ແລະອຳນວຍຄວາມສະດວກ ໃຫ້ແກ່ການບູລະນະສ້າງສາປະເທດຊາດ ຄືນໃໝ່.