ລັດຖະບານຂອງທ່ານ Obama ມີກຳນົດທີ່ຈະປະກາດໃຫ້ເງິນລາງວັນຈໍານວນ 33 ລ້ານໂດລາ ສໍາລັບຂໍ້ມູນທີ່ນຳໄປສູ່ບ່ອນຫຼົບລີ້ຂອງພວກຜູ້ນໍາກຸ່ມຫົວຮຸນແຮງ al-Shabab ຊຶ່ງເປັນເຄືອຂ່າຍຂອງກໍ່ການຮ້າຍ al-Qaida ໃນໂຊມາເລຍ.
ສື່ມວນຊົນຂອງສະຫະລັດລາຍງານວ່າ ກະຊວງການຕ່າງປະເທດຂອງສະຫະລັດ ຈະປະກາດໃຫ້ລາງວັນດັ່ງກ່າວຜ່ານໂຄງການໃຫ້ເງິນລາງວັນເພື່ອຍຸຕິທໍາຂອງຕົນ ໃນວັນພະຫັດມື້ນີ້ ຊຶ່ງນີ້ເປັນຄັ້ງທໍາອິດທີ່ໄດ້ມີການຕັ້ງເງິນຄ່າຫົວ ຂອງພວກຜູ້ນຳ ອະວຸໂສຂອງກຸ່ມ al-Shabab.
ສະຫະລັດຈະຕັ້ງເງິນລາງວັນຫຼາຍເຖິງ 7 ລ້ານໂດລາ ສໍາລັບຫົວໂປ່ຜູ້ກໍ່ຕັ້ງກຸ່ມ al-Shabab ເງິນລາງວັນຫຼາຍເຖິງ 5 ລ້ານໂດລາ ສໍາລັບຫົວໜ້າຊັ້ນນໍາຂອງກຸ່ມ 4 ຄົນ ແລະຫຼາຍເຖິງ 3 ລ້ານໂດລາ ສໍາລັບສະມາຊິກຂັ້ນສູງຂອງກຸ່ມອີກ 2 ຄົນ.
ສະຫະລັດໄດ້ຈັດເອົາກຸ່ມ al-Shabab ເຂົ້າໄວ້ໃນບັນຊີລາຍຊື່ຂອງກຸ່ມກໍ່ການຮ້າຍ ໃນປີ 2008.
ກຸ່ມຫົວຮຸນແຮງດັ່ງກ່າວນີ້ແມ່ນມີສ່ວນພົວພັນກັບການໂຈມຕີ ໃນໂຊມາເລຍ ແລະ ອູການດາ.
