ສະຫະລັດກ່າວວ່າ ຝຸງກໍາປັ່ນໂຈມຕີກຸ່ມນຶ່ງຂອງກອງທັບ
ເຮືອ ພາຍໃຕ້ການນໍາພາຂອງກໍາປັ່ນບັນທຸກເຮືອບິນລົບ
USS Ronald Reagan ໄດ້ເຂົ້າໄປໃນເຂດນ່ານນໍ້າທາງ
ພາກຕາເວັນຕົກຂອງມະຫາສະໝຸດປາຊີຟິກແລ້ວ ແລະຈະ
ເຂົ້າສົມທົບໃນການຊ້ອມລົບທີ່ກໍາລັງດໍາເນີນໄປໃນເວລານີ້
ກັບກອງທັບເກົາຫລີໃຕ້ນັ້ນ.
ກອງທັບສະຫະລັດກ່າວໃນວັນພຸດມື້ນີ້ວ່າ ກໍາປັ່ນບັນທຸກເຮືອບິນລົບຂະໜາດໃຫຍ່ຂອງສະຫະລັດແມ່ນຕິດຕາມໂດຍເຮືອລາດຕາເວນທີ່ມີລູກສອນໄຟນໍາວິຖີລໍານຶ່ງ ແລະເຮືອພິຄາດກຸ່ມນຶ່ງ. ພວກເຮືອລົບເຫລົ່ານີ້ຈະໄປຮ່ວມການຊ້ອມລົບປະຈໍາປີທີ່ມີຊື່ວ່າ Foal Eagle ຊຶ່ງໄດ້ເລີ້ມມາຕັ້ງແຕ່ສັບປະດາແລ້ວ ຊຶ່ງພົວພັນກັບພວກທະຫານເກົາຫລີໃຕ້ປະມານ 2 ແສນຄົນແລະທະຫານສະຫະລັດ 13 ພັນຄົນ.
ເກົາຫລີໃຕ້ໄດ້ບັນລະຍາຍການຊ້ອມລົບດັ່ງກ່າວວ່າ ເປັນການເຝິກຊ້ອມກ່ຽວກັບການປ້ອງກັນປະຈໍາປີ ແຕ່ທາງຝ່າຍເກົາຫລີເໜືອກ່າວວ່າ ຕົນຈະທໍາການຕອບໂຕ້ຕໍ່ການເກາະຜິດໃດໆ ໂດຍຈະເຮັດໃຫ້ກຸງໂຊນ ນະຄອນຫລວງຂອງເກົາຫລີໃຕ້ກາຍເປັນ”ທະເລໄຟ.”
ຈີນໄດ້ຄັດຄ້ານຢ່າງແຂງແຮງຕໍ່ການຊ້ອມລົບດັ່ງກ່າວໃນປີແລ້ວນີ້ ເວລາສະຫະລັດປະກາດແຜນການຕ່າງໆອອກມາທີ່ຈະສົ່ງກໍາປັ່ນບັນທຸກເຮືອບິນລົບອີກລໍານຶ່ງຄື USS George
Washington ເຂົ້າໄປໃນທະເລເຫລືອງ ເພື່ອເຂົ້າຮ່ວມການຊ້ອມລົບ ທີ່ໄດ້ປະກາດໄປ ກ່ອນໜ້ານັ້ນກັບເກົາຫລີໃຕ້.
