ລິ້ງ ສຳຫລັບເຂົ້າຫາ

ວັນອັງຄານ, ໑໖ ກໍລະກົດ ໒໐໒໔

ສະມາຊິກສະພາເຕືອນເຖິງໄພພິບັດດ້ານອະວະກາດ ເມື່ອສະຫະລັດ ບໍ່ຫົວຊາກັບສິ່ງທີ່ກຳລັງເກີດຂຶ້ນ


ສະມາຊິກສະພາຕໍ່າ ທ່ານ ໄມຄ໌ ເທີເນີ ກ່າວຄຳປາໄສຢູ່ສະໜາມບິນສາກົນ ເດຕັນ ເມືອງ ແວນດາເລຍ, ລັດ ໂອໄຮໂອ, 7 ພະຈິກ 2022
ສະມາຊິກສະພາຕໍ່າ ທ່ານ ໄມຄ໌ ເທີເນີ ກ່າວຄຳປາໄສຢູ່ສະໜາມບິນສາກົນ ເດຕັນ ເມືອງ ແວນດາເລຍ, ລັດ ໂອໄຮໂອ, 7 ພະຈິກ 2022

ສະ​ມາ​ຊິກ​ສະ​ພາ ສະ​ຫະ​ລັດ ທີ່​ສຳ​ຄັນ​ທ່ານ​ນຶ່ງ​ໄດ້​ເຕືອນ​ໃນ​ວັນ​ພະ​ຫັດ​ວານນີ້​ວ່າ ຣັດ​ເຊຍ ແມ່ນ​ໃກ້​ຈະ​ຮອດຈຸດສິ້ນສຸດ​ຂອງ​ຍຸກ​ອະ​ວະ​ກາດ​ດ້ວຍ​ອາ​ວຸ​ໃໝ່​ຂອງ​ເຂົາ​ເຈົ້າ​ ກໍຄື ອາ​ວຸດ​ນິວ​ເຄ​ລຍ​ຕໍ່​ຕ້ານ​ດາວ​ທຽມ.

ປະ​ທາ​ນ​ຄະ​ນະ​ກຳ​ມະ​ການ​ສືບ​ລັບ​ສະ​ພາ​ຕ່ຳ​ທ່ານ ໄມ​ຄ໌ ເທີ​ເນີ ໄດ້​ກ່າວ​ຕໍ່​ບັນ​ດາ​ຜູ້​ຟັງ​ໃນ​ນະ​ຄອນຫຼວງວໍ​ຊິງ​ຕັນ​ວ່າ ການ​ອະ​ນຸ​ຍາດ​ໃຫ້ ຣັດ​ເຊຍ ມີ​ຄວາມ​ໄດ້​ປຽບ​ດັ່ງ​ກ່າວ​ຈະ​ເປັນ​ໄພ​ຫາ​ຍະ​ນະ. ທ່ານ​ໄດ້​ຮຽກ​ຮ້ອງ​ປະ​ທາ​ນາ​ທິ​ບໍ​ດີ ໂຈ ໄບ​ເດັນ ໃຫ້​ທຳ​ການ​ຕອບ​ໂຕ້​ທີ່​ຮຸນ​ແຮງ.

ທ່ານ ເທີ​ເນີ ໄດ້​ກ່າວ​ວ່າ “ວິ​ກິດ​ການນີ້​ແມ່ນ​ວິ​ກິດ​ການ​ລູກ​ສອນ​ໄຟ ຄິວ​ບາ ໃນ​ອະ​ວະ​ກາດ,” ເຊິ່ງ​ເປັນ​ການ​ປຽບ​ທຽບ​ໃສ່​ການ​ປະ​ເຊີນ​ໜ້າ​ກັນ​ເມື່ອ​ປີ 1962 ລະ​ຫວ່າງ ສະ​ຫະ​ລັດ ແລະ ອະ​ດີດ​ສະ​ຫະ​ພາບ ໂຊ​ຫວຽດ, ເຊິ່ງ​ໄດ້​ເຮັດ​ໃຫ້​ທັງ​ສອງ​ຝ່າຍ​ເກືອບ​ມີ​ຄວາມ​ຂັດ​ແຍ້ງ​ດ້ານອາ​ວຸດ​ນິວ​ເຄ​ລຍ.

ແຕ່​ໃນ​ກໍ​ລະ​ນີນີ້, ທ່ານ ເທີ​ເນີ ໄດ້​ກ່າວ​ວ່າ, ຣັດ​ເຊຍ ອາດ​ສ້າງ​ຄວາມ​ເສຍ​ຫາຍ​ທີ່​ສູງ​ໂດຍ​ຝ່າຍ​ດຽວ​ຕໍ່ ສະ​ຫະ​ລັດ ດ້ວຍ​ການ​ລະ​ເບີດ​ອາ​ວຸດ​ນິວ​ເຄ​ລຍ​ຕໍ່​ຕ້ານ​ດາວ​ທຽມ​ທີ່​ທຳ​ການ​ໂຄ​ຈອນ​ຢູ່​ໃນ​ອະ​ວະ​ກາດ.

ທ່ານ​ກ່າວ​ວ່າ “ໄພ​ຂົ່ມ​ຂູ່ນີ້​ໝາຍ​ຄວາມ​ວ່າ​ເສດ​ຖະ​ກິດ​ຂອງ​ພວກ​ເຮົາ, ຄວາມ​ໝັ້ນ​ຄົງ​ສາ​ກົນ ແລະ ລະ​ບົບ​ສັງ​ຄົມ​ຕ່າງໆ​ຈະ​ຢຸດ​ຊະ​ງັກ. ນີ້​ຈະ​ເປັນ​ໄພ​ຫາ​ຍະ​ນະ ແລະ ເປັນ​ການ​ໂຈມ​ຕີ​ທີ່​ທຳ​ລາຍ​ລ້າງ ຕໍ່​ລະ​ບົບ​ເສດ​ຖະ​ກິດ ແລະ ປະ​ຊາ​ທິ​ປະ​ໄຕ​ຂອງ​ຕາ​ເວັນ​ຕົກ.”

ທ່ານ ເທີ​ເນີ, ຜູ້​ທີ່​ໄດ້​ກ່າວ​ຫາ​ທ່ານ ໄບ​ເດັນ ວ່າ “ຍ່າງ​ລະ​ເມີ​ໄປ​ສູ່​ວິ​ກິດ​ການ​ທີ່ບໍ່​ສາ​ມາດ​ຕ່າວປີ້ນ​ໄດ້” ນັ້ນ, ໄດ້​ຮຽກ​ຮ້ອງ​ທຳ​ນຽບ​ຂາວ​ໃຫ້​ເປີດ​ເຜີຍ​ຄວາມ​ລັບ​ທຸກ​ອັນ​ຂອງ​ເຂົາ​ເຈົ້າ​ ກ່ຽວ​ກັບ ໂຄງ​ການ​ຂອງ ຣັດ​ເຊຍ ເພື່ອ​ເຮັດ​ໃຫ້​ໂລກ​ຮູ້ ກ່ຽວ​ກັບຂອບ​ເຂດ​ທັງໝົດ​ຂອງ​ໄພ​ຂົ່ມ​ຂູ່.

ທຳ​ນຽບ​ຂາວ​ໄດ້​ປະ​ຕິ​ເສດ​ການ​ກ່າວ​ຫາ​ຂອງ​ທ່ານ ເທີ​ເນີ ໃນ​ວັນ​ພະ​ຫັດ​ວານນີ້.

ໂຄ​ສົກ​ດ້ານ​ຄວາມ​ໝັ້ງ​ຄົງ​ແຫ່ງ​ຊາດ​ຂອງ​ທຳ​ນຽບ​ຂາວ ທ່ານ ຈອນ ເຄີ​ບີ ໄດ້​ກ່າວ​ຕໍ່​ບັນ​ດາ​ນັກ​ຂ່າວ​ໃນ​ວັນ​ພະ​ຫັດ​ວານນີ້​ວ່າ “ລາວ​ເວົ້າ​ບໍ່​ຖືກ. ລາວ​ເວົ້າ​ບໍ່​ຖືກ​ຢ່າງ​ສິ້ນ​ເຊີງ.”

ອ່ານຂ່າວນີ້ຕື່ມເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG