ສະພາສູງສະຫະລັດໄດ້ໃຫ້ການອະນຸມັດເງິນໃນມູນຄ່າ 1 ພັນ 100 ລ້ານໂດລາເພື່ອຮັບ ມືກັບເຊື້ອໄວຣັສ Zika ຄືຫລຸດຈາກ ທີ່ລັດຖະບານທ່ານໂອບາມາ ຮ້ອງຂໍ ເປັນຈຳນວນຫຼວງຫຼາຍ ໃນມູນຄ່າ 1 ພັນ 900 ລ້ານໂດລາ ແຕ່ກໍສູງເກືອບວ່າສອງເທົ່າ ຂອງຈຳນວນ ທີ່ທາງສະພາຕ່ຳສະຫະລັດໄດ້ພິຈາລະນາ.
ການລົງຄະແນນສຽງ 68 ຕໍ່ 29 ໄດ້ມີຂຶ້ນຫລັງຈາກສະພາສູງທີ່ຢູ່ພາຍໃຕ້ການຄວບຄຸມ
ຂອງພັກຣີພັບບລີກັນ ປະຕິເສດຕໍ່ການຮ້ອງຂໍໂດຍເຕັມຂອງທຳນຽບຂາວ ທີ່ໄດ້ຍື່ນໄປ ໃນເດືອນກຸມພາ ໃນຂະນະທີ່ພວກເຈົ້າໜ້າທີ່ສາທາລະນະສຸກຂອງສະຫະລັດເຕືອນວ່າ ເຊື້ອໄວຣັສ Zika ອາດຈະແຜ່ລາມ ໄປຍັງບໍລິເວນສ່ວນໃຫຍ່ຂອງປະເທດ.
ເຊື້ອໄວຣັສ ທີ່ແຜ່ຜາຍໂດຍຍຸງດັ່ງກ່າວ ສາມາດສ້າງຄວາມເສຍຫາຍຮ້າຍແຮງໃຫ້ແກ່ ພວກທາລົກທີ່ເກີດມາແບບບໍ່ສົມປະກອບແລະພົວພັນກັບໂຣກເສັ້ນປະສາດ.
ສະມາຊິກສະພາສູງ Patty Murray ຈາກລັດວໍຊິງຕັນ ຊຶ່ງເປັນຜູ້ຮ່ວມສະເໜີ ຮ່າງກົດ ໝາຍແບບປະນີປະນອມຂອງທັງສອງພັກ ກ່າວວ່າ ພວກເຮົາຈຳເປັນຕ້ອງໄດ້ຄວບຄຸມ ຍຸງທີ່ເປັນໂຕການແຜ່ເຊື້ອໄວຣັສ Zika ໃຫ້ດີກວ່າເກົ່າ ພວກເຮົາຕ້ອງໄດ້ປຸກລະດົມໃຫ້ ມີການຕື່ນຕົວ ເພື່ອໃຫ້ເປັນທີ່ແນ່ໃຈວ່າ ບັນດາຄອບຄົວທັງຫລາຍ ໄດ້ຮູ້ຈັກພະຍາດນີ້ ແລະເລັ່ງລັດໃນການພັດທະນາຢາວັກຊີນ.
ນັບເປັນເວລາຫລາຍໆອາທິດມາແລ້ວ ທີ່ສະມາຊິກພັກຣີພັບບລີກັນຫຼາຍໆທ່ານ ຢືນຢັດ ວ່າ ພວກທ່ານຕ້ອງການຂໍ້ມູນເພີ້ມຕື່ມກ່ຽວກັບວ່າເງິນທີ່ໄດ້ຮັບນັ້ນຈະຖືກນຳໄປໃຊ້ຈ່າຍ ແບບໃດ. ນອກນັ້ນຈຳນວນນຶ່ງຍັງຮຽກຮ້ອງໃຫ້ຕັດໂຄງການອື່ນໆ ເພື່ອກວມເອົາຄ່າໃຊ້ ຈ່າຍໃນການຮັບມືກັບເຊື້ອໄວຣັສ Zika.
ສະມາຊິກສະພາສູງ John Cornyn ຈາກລັດເທັກຊັສ ກ່າວວ່າ ພວກເຮົາມາຮັບມືກັບ ໄພຂົ່ມຂູ່ນີ້ ໃນວິທີທີ່ມີຄວາມຮັບຜິດຊອບໃນດ້ານງົບປະມານ. ບໍ່ມີເຫດຜົນໃດໆທີ່ຈະເພີ້ມການຂາດດຸນງົບປະມານແລະໜີ້ສິນຕື່ມ.
ທ່ານ Cornyn ໄດ້ສະເໜີທາງເລືອກ ໂດຍໃຫ້ນຳເອົາເງິນຈາກໂຄງການປ້ອງກັນພະຍາດ ອື່ນໆທີ່ໄດ້ອະນຸມັດໄປແລ້ວ ມາໃຊ້ຈ່າຍໃນການຕໍ່ສູ້ກັບເຊື້ອໄວຣັສ Zika. ສະມາຊິກພັກ ເດໂມແຄຣັດໄດ້ຮວມຕົວກັນເອົາຊະນະຂໍ້ສະເໜີຂອງທ່ານ Cornyn ດ້ວຍການເຂົ້າຮ່ວມ ຂອງທ່ານ Marco Rubio ທີ່ສັງກັດພັກຣີພັບບລີກັນ.
