ຕຳແໜ່ງຜູ້ນຳໃນສະພາສູງ ສະຫະລັດ ແມ່ນຖືກແຕ່ງຕັ້ງແລ້ວສຳລັບສະໄໝປະຊຸມໃໝ່ທີ່ ຈະເລີ່ມຂຶ້ນໃນຕົ້ນເດືອນມັງກອນປີໜ້ານີ້, ເຊິ່ງສະທ້ອນໃຫ້ເຫັນຄວາມດຸ່ນດ່ຽງຂອງອຳ ນາດ ທີ່ໄດ້ຖືກພິຈາລະນາໃນ ການເລືອກຕັ້ງຈັດຂຶ້ນທົ່ວປະເທດ ໃນສັບປະດາທີ່ຜ່ານມາ.
ສະມາຊິກສະພາສູງອາວຸໂສຂອງພັກເດໂມແຄຣັດ ຈາກນະຄອນ ນິວຢອກ ທ່ານ Chuck Schumer ໄດ້ຖືກເລືອກໃຫ້ເປັນຜູ້ນຳສຽງສ່ວນນ້ອຍຢ່າງເປັນເອກະສັນໃນວັນພຸດວານ ນີ້. ທ່ານຈະສືບທອດຕຳແໜ່ງແທນ ສະມາຊິກສະພາສູງ ຈາກລັດ Nevada ທ່ານ Harry Reid, ຜູ້ທີ່ກຳລັງຈະອອກບຳນານ.
ທ່ານກ່າວວ່າ ທ່ານຮູ້ສຶກ “ຕ່ຳຕ້ອຍ ແລະ ເປັນກຽດ” ໂດຍຕຳແໜ່ງ ດັ່ງກ່າວ, ແລະ ໄດ້ຊີ້ ໃຫ້ເຫັນຄວາມແຕກຕ່າງຫຼາກຫຼາຍຂອງລະດັບ ສະພາສູງພັກເດໂມແຄຣັດ, ທ່ານ Schumer ໄດ້ກ່າວວ່າ ພັກຂອງ ທ່ານແມ່ນພ້ອມແລ້ວທີ່ຈະເຮັດວຽກກັບທ່ານ Trump ແຕ່ກໍຈະ “ຄັດຄ້ານຕໍ່ປະທານາທິບໍດີທີ່ຖືກເລືອກໃໝ່ເຊັ່ນກັນ ເມື່ອໃດທີ່ຄຸນຄ່າ ຫຼື ຄວາມກ້າວໜ້າທີ່ພວກເຮົາໄດ້ເຮັດມາ ຕົກຢູ່ພາຍໃຕ້ການໂຈມຕີ.”
ນອກຈາກການເລືອກຕັ້ງທ່ານ Schumer ແລ້ວ, ພັກເດໂມແຄຣັດຍັງໄດ້ເລືອກເອົາສະ ພາຊິກສະພາສູງ Dick Durbin ຈາກລັດ ອີລີນອຍ ເປັນຮອງຫົວໜ້າສຽງສ່ວນນ້ອຍ, ເຊິ່ງ ປັນຕຳແໜ່ງໝາຍເລກ 2 ໃນສະພາສູງຂອງພັກ.
ສະມາຊິກສະພາສູງ ຈາກລັດວໍຊິງຕັນ ທ່ານນາງ Patty Murray ຈະດຳລົງຕຳແໜ່ງເປັນ ຜູ້ນຳໝາຍເລກ 3 ຂອງພັກເດໂມແຄຣັດ, ໃນການຍອມສະຫຼະການແຂ່ງຂັນ ໃຫ້ທ່ານ Durbin ແຕ່ຈະຮັບຜິດຊອບຕຳແໜ່ງໃໝ່ ເປັນຜູ້ຊ່ວຍຫົວໜ້າພັກເດໂມແຄຣັດ.
ໃນການສະແດງອອກຕໍ່ກຸ່ມຫົວກ້າວໜ້າໃນພັກເດໂມແຄຣັດນັ້ນ, ທ່ານ Schumer ໄດ້ ເພີ້ມຊື່ສະມາຊິກສະພາສູງຈາກລັດ Vermont ທ່ານ Bernie Sanders ແລະ ທ່ານນາງ Elizabeth Warren ຈາກລັດ Massachusetts ເຂົ້າໃນກຸ່ມຜູ້ນຳທີ່ຖືກຂະຫຍາຍອອກ ໃໝ່ນີ້.
ທ່ານນາງ Warren ຈະເປັນຮອງປະທານຂອງກອງປະຊຸມຫຼວງ ແລະ ທ່ານ Sanders ຈະຮັບຕຳແໜ່ງເປັນປະທານກອງປະຊຸມເຜີຍແຜ່. ທ່ານ Sanders ແມ່ນຜູ້ທີ່ບໍ່ສັງກັດພັກ ແຕ່ເຂົ້າຮ່ວມກອງປະຊຸມ ກັບບັນດາສະມາຊິກພັກເດໂມແຄຣັດ ແລະ ໄດ້ລົງແຂ່ງຂັນກັບ ອະດີດລັດ ຖະມົນຕີການຕ່າງປະເທດ ທ່ານນາງ Hillary Clinton ໃນການຖືກສະເໜີຊື່ເປັນຜູ້ສະໝັກເອົາຕຳແໜ່ງປະທານາທິບໍດີ.
ທ່ານ Sander ໄດ້ອະທິບາຍຕຳແໜ່ງຂອງທ່ານວ່າ ເປັນຜູ້ຮັບຜິດ ຊອບໃນ “ການເຕົ້າ ໂຮມເອົາປະຊາຊົນຜູ້ໃຊ້ແຮງງານ, ຊາວໜຸ່ມຫຼາຍລ້ານຄົນມາລວມຕົວກັນ, ສະແດງ ໃຫ້ເຫັນວ່າ ລັດຖະບານໄດ້ເຮັດວຽກເພື່ອພວກເຮົາໝົດທຸກຄົນ.”
ສຳລັບພັກຣີພັບບລີກັນນັ້ນ, ສະມາຊິກສະພາສູງຈາກລັດ Kentucky ທ່ານ Mitch McConnell ຈະສືບຕໍ່ດຳລົງຕຳແໜ່ງຜູ້ນຳພັກຂອງທ່ານ ຕໍ່ໄປ.
