ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ພົບປະກັບປະທານາທິບໍດີເມັກຊິໂກ ທ່ານອານເດຣັສ ມານູແອລ ໂລເປັສ ໂອບຣາດໍ ໃນວັນຈັນວານນີ້ ເພື່ອປົວແປງຄວາມສຳພັນ ລະຫວ່າງປະເທດເພື່ອນບ້ານທັງສອງ ຍ້ອນບັນຫາເລື້ອງຄົນເຂົ້າເມືອງ ແລະອື່ນໆອີກ.
ທ່ານບລິງເກັນກ່າວໃນລະຫວ່າງກອງປະຊຸມຖະແຫຼງຂ່າວວ່າ “ພວກເຮົາໄດ້ຫາລືກ່ຽວກັບການດຳເນີນຄວາມພະຍາຍາມຮ່ວມກັນເພື່ອແກ້ໄຂບັນຫາຄົນເຂົ້າເມືອງທີ່ບໍ່ທຳມະດາໃນທະວີບອາເມຣິກາ ຮວມທັງໂດຍຜ່ານນະໂຍບາຍການຄຸ້ມຄອງຄົນເຂົ້າເມືອງແບບມີມະນຸດສະທຳໃນເຂດຊາຍແດນ ແລະໂດຍຜ່ານການຂະຫຍາຍເສັ້ນທາງໃນດ້ານກົດໝາຍ.”
ທ່ານບລິງເກັນ ທີ່ຢືນຄຽງຂ້າງເຈົ້າໜ້າທີ່ອະວຸໂສຂອງເມັກຊິໂກ ກ່າວຕື່ມວ່າ “ພວກເຮົາໄດ້ເວົ້າເຖິງບັນຫາຮາກເຫງົ້າເລື້ອງຄົນເມືອງ ອັນເປັນເລື້ອງທີ່ເມັກຊິໂກແລະສະຫະລັດໃຫ້ການຮ່ວມມືກັນໃນຫຼາຍໆດ້ານ ທີ່ພວກເຮົາບໍ່ເຄີຍເຫັນມາກ່ອນ.”
ລັດຖະມົນຕີກະຊວງການຄ້າຂອງສະຫະລັດ ຈີນາ ໄຣມອນໂດ ແລະຮອງຜູ້ຕາງໜ້າທາງດ້ານການຄ້າຂອງສະຫະລັດ ເຈມີ ໄວທ໌ ກໍໄດ້ຕິດຕາມຫົວໜ້ານັກການທູດຂອງສະຫະລັດ ໄປຮ່ວມການເຈລະຈາໃນລະດັບສູງທາງດ້ານເສດຖະກິດທີ່ນະຄອນເມັກຊິໂກຊີຕີ້.
ເມັກຊິໂກແມ່ນນຶ່ງໃນສາມປະເທດຄູ່ການຄ້າທີ່ສຳຄັນສຸດຂອງສະຫະລັດ. ກ່ອນເກີດໂຣກລະບາດໄວຣັສໂຄໂຣນາ, ເມັກຊິໂກແມ່ນຕະຫຼາດສົ່ງອອກໃຫຍ່ອັນດັບ 2 ຂອງສະຫະລັດ ໃນປີ 2020.
ເຈົ້າໜ້າທີ່ສະຫະລັດ ກ່າວວ່າ ການຫຼັ່ງໄຫຼເຂົ້າມາຂອງພວກຄົນເຂົ້າເມືອງຜິດກົດໝາຍ ຢູ່ຕາມຊາຍແດນສະຫະລັດຕິດກັບເມັກຊິໂກ ໄດ້ກໍ່ໃຫ້ເກີດຄວາມເຄັ່ງຕຶງຢູ່ໃນສະຫະລັດ. ໃນໄລຍະສອງສາມເດືອນຜ່ານມານີ້ ລັດເທັກຊັສໄດ້ສົ່ງຄົນເຂົ້າເມືອງໂດຍທາງລົດໄປຍັງນິວຢອກແລະວໍຊິງຕັນ ໂດຍເວົ້າວ່າ ການເຄື່ອນໄຫວນີ້ແມ່ນມີຄວາມຈຳເປັນ ເພື່ອຊ່ວຍບັນເທົາປະຊາຄົມຢູ່ຕາມເຂດຊາຍແດນທີ່ຮັບມືກັບບັນຫານີ້ບໍ່ໄຫວ.
ສະຫະລັດແລະເມັກຊິໂກຍັງບໍ່ລົງລອຍກັນກ່ຽວນະໂຍບາຍພະລັງງານ. ສະຫະລັດໄດ້ຕັ້ງຄຳຖາມກ່ຽວກັບການໃຫ້ຄວາມສະໜັບສະໜຸນຂອງລັດຖະບານເມັກຊິໂກ ຕໍ່ບັນດາບລິສັດພະລັງງານທີ່ຄວບຄຸມໂດຍລັດຖະບານ ໂດຍກ່າວວ່າ ລະເມີດຕໍ່ຂໍ້ຕົກລົງການຄ້າແລະຈຳກັດບໍ່ໃຫ້ບໍລິສັດຂອງອາເມຣິກາສາມາດເຂົ້າໄປແຂ່ງຂັນໃນເມັກຊິໂກໄດ້.
ໃນວັນຈັນວານນີ້ ທ່ານໂລເປັສ ໂອບຣາດໍ ໄດ້ສະແດງຄວາມຍິນດີ ກັບ “ນ້ຳສຽງ” ຂອງວໍຊິງຕັນ ກ່ຽວກັບບັນຫາຂັດແຍ້ງໃນດ້ານພະລັງງານກັບເມັກຊິໂກຢູ່ໃນກອງປະຊຸມຖະແຫຼງຂ່າວທີ່ຈັດຂຶ້ນຕ່າງຫາກ.