ກຳລັງທີ່ໄດ້ຮັບການໜຸນຫລັງຈາກສະຫະລັດໄດ້ເຂົ້າຄວບຄຸມ 9 ບ້ານ ໃກ້ໆຊາຍແດນເທີກີໃນຊີເຣຍ ນັບແຕ່ວັນອັງຄານເປັນຕົ້ນມາ ໃນການບຸກຄືບໜ້າໄປສູ່ເມືອງ Manbij ທີ່ຄວບຄຸມໂດຍກຸ່ມລັດອິສລາມ.
ພ້ອມກັນນີ້ ສະຫະລັດຍັງໄດ້ທຳການໂຈມຕີທາງອາກາດທີ່ເມືອງ Manbij ໃນໄລຍະ 24 ຊົ່ວໂມງຜ່ານມານີ້ ຊຶ່ງເຮັດໃຫ້ພົນລະເຮືອນ 15 ຄົນເສຍຊີວິດ 3 ຄົນໃນຈຳນວນດັ່ງກ່າວເປັນເດັກນ້ອຍ ອີງຕາມລາຍງານຂອງກຸ່ມສິ້ງຊອມສິດທິມະນຸດໃນຊີເຣຍ.
ແຫລ່ງຂ່າວທາງທະຫານທີ່ພົວພັນໃນການປະຕິບັດງານຢູ່ໃນເຂດເມືອງ Manbij ແຈ້ງໃຫ້ວີໂອເອຊາບວ່າ ພວກຫົວຮຸນແຮງລັດອິສລາມໄດ້ຍົກຍ້າຍສະມາຊິກໃນ ຄອບຄົວຂອງພວກເຂົາອອກໄປຈາກເມືອງແລ້ວ ແຕ່ໃນຂະນະດຽວກັນກໍບັງຄັບ ໃຫ້ພົນລະເຮືອນຈຸອື່ນໆ ຢູ່ໃນເມືອງດັ່ງກ່າວຕໍ່ໄປ ເພື່ອເປັນເຄື່ອງກຳບັງ. ກຳລັງ ທີ່ໄດ້ຮັບການໜຸນຫລັງຈາກສະຫະລັດ ກ່າວວ່າ ຊາວບ້ານຫລາຍສິບຄົນຢູ່ນອກ ເມືອງ Manbij ໄດ້ຮັບການປົດປ່ອຍແລ້ວ ໂດຍມີການຕ້ານຢັນຈາກກຸ່ມລັດອິສ ລາມແຕ່ພຽງເລັກນ້ອຍເທົ່ານັ້ນ.
ກຳລັງປະຊາທິປະໄຕຊີເຣຍ ຫລື SDF ຊຶ່ງເປັນກຸ່ມພັນທະມິດພາຍໃຕ້ການນຳພາຂອງຊາວ ເຄີດ ທີ່ເຮັດວຽກຄຽງບ່າຄຽງໄຫລ່ກັບກຳລັງພິເສດຂອງອາເມຣິກັນ ຫລາຍກວ່າ 200 ຄົນໄດ້ເຄື່ອນເຂົ້າສູ່ບໍລິເວນທີ່ຄວບຄຸມໂດຍພວກລັດອິສລາມ ຫົວຮຸນແຮງ ຢູ່ທັງສອງຟາກຂອງແມ່ນ້ຳ Euphrates ຊຶ່ງໄດ້ສ້າງຄວາມບໍ່ພໍໃຈໃຫ້ແກ່ພວກຕໍ່ຕ້ານລັດຖະບານທີ່ນັບຖືສາສະໜາອິສລາມນິກາຍຊຸນນີ່ ແລະເທີກີ ທີ່ມີຄວາມຢ້ານກົວວ່າ ຊາວເຄີດອາດຈະພະຍາຍາມສ້າງ ຕັ້ງລັດຂອງຕົນຂຶ້ນຢູ່ໃນ ບໍລິເວນຊາຍແດນ.
ແຕ່ເຂດດັ່ງກ່າວນີ້ໄດ້ຕົກເປັນເປົ້າໝາຍມານານແລ້ວສຳລັບວໍຊິງຕັນຊຶ່ງມອງເຫັນວ່າເປັນຈຸດເຂົ້າອອກທີ່ສຳຄັນຂອງພວກນັກລົບຕ່າງປະເທດ.
ການບຸກໂຈມຕີໃນຄັ້ງນີ້ ແມ່ນເປັນເທື່ອທີສອງ ໃນໄລຍະບໍ່ເທົ່າໃດອາທິດທີ່ຜ່ານມານີ້ ຫລັງຈາກກຳລັງປະຊາທິປະໄຕຊີເຣຍປະສົບຄວາມສຳເລັດໃນເດືອນແລ້ວ ໂດຍເຂົ້າຍຶດເອົາ ຫລາຍ ສິບບ້ານຢູ່ທາງເໜືອຂອງເມືອງ Raqqa ຊຶ່ງໃນຄວາມ ເປັນຈິງແລ້ວ ແມ່ນເມືອງ ຫລວງຂອງກຸ່ມລັດອິສລາມນັ້ນ.
ໃນຂະນະດຽວກັນ ຂະບວນລົດລຳລຽງເຄື່ອງບັນເທົາທຸກມະນຸດສະທຳຈຸທຳອິດ ນັບແຕ່ປີ 2012 ເປັນຕົ້ນມາໄດ້ແລ່ນເຂົ້າໄປ ໃນເມືອງ Daraya ທີ່ຍັງຖືກປິດລ້ອມ ຊຶ່ງຕັ້ງຢູ່ໃນເຂດ ຊານເມືອງຂອງນະຄອນຫຼວງດາມັສກັສ ໃນວັນພຸດວານນີ້. ການຊ່ອຍເຫຼືອຈຳນວນນຶ່ງຍັງ ໄດ້ຫລັ່ງໄຫລເຂົ້າໄປສູ່ຄຸ້ມ Mouadhimiyeh ທີ່ຕັ້ງຢູ່ໃກ້ຄຽງ.
