ກຳລັງທີ່ໄດ້ຮັບການໜຸນຫລັງຈາກສະຫະລັດໄດ້ເຂົ້າຄວບຄຸມ 9 ບ້ານໃກ້ໆຊາຍແດນເທີກີໃນຊີເຣຍ ນັບແຕ່ມື້ວານນີ້ເປັນຕົ້ນມາ ໃນການບຸກໂຈມຕີໄປສູ່ເມືອງ Manbij ທີ່ຄວບຄຸມໂດຍກຸ່ມລັດອິສລາມ.
ນອກນັ້ນ ສະຫະລັດຍັງໄດ້ທຳການໂຈມຕີທາງອາກາດທີ່ເມືອງ Manbij ໃນໄລຍະ 24 ຊົ່ວໂມງຜ່ານມານີ້ ຊຶ່ງໄດ້ສັງຫານພົນລະເຮືອນ 15 ຄົນ 3 ຄົນໃນຈຳ ນວນດັ່ງກ່າວເປັນ ເດັກນ້ອຍ ອີງຕາມລາຍງານຂອງກຸ່ມສິ້ງຊອມສິດທິມະນຸດໃນ ຊີເຣຍ.
ກຳລັງປະຊາທິປະໄຕຊີເຣຍ ຫລື SDF ຊຶ່ງເປັນກຸ່ມພັນທະມິດພາຍໃຕ້ການນຳພາຂອງ ຊາວເຄີດ ທີ່ເຮັດວຽກຄຽງບ່າຄຽງໄຫລ່ກັບກຳລັງພິເສດຂອງອາເມຣິກັນ ຫລາຍກວ່າ 200 ຄົນໄດ້ເຄື່ອນເຂົ້າສູ່ບໍລິເວນທີ່ຄວບຄຸມໂດຍພວກລັດອິສລາມ ຫົວຮຸນແຮງຢູ່ທັງສອງຟາກ ຂອງແມ່ນ້ຳ Euphrates ຊຶ່ງໄດ້ສ້າງຄວາມຢ້ານກົວ ໃຫ້ແກ່ພວກຕໍ່ຕ້ານລັດຖະບານທີ່ ນັບຖືສາສະໜາອິສລາມນິກາຍຊຸນນີ່ ແລະເທີກີ ທີ່ມີຄວາມຢ້ານກົວວ່າ ຊາວເຄີດອາດຈະ ພະຍາຍາມສ້າງຕັ້ງລັດຂອງຕົນຂຶ້ນຢູ່ໃນ ບໍລິເວນຊາຍແດນ.
ແຕ່ເຂດດັ່ງກ່າວນີ້ໄດ້ຕົກເປັນເປົ້າໝາຍມານານແລ້ວສຳລັບວໍຊິງຕັນຊຶ່ງມອງເຫັນວ່າເປັນ ຈຸດເຂົ້າອອກທີ່ສຳຄັນຂອງພວກນັກລົບຕ່າງປະເທດ.
ການບຸກໂຈມຕີໃນຄັ້ງນີ້ ແມ່ນເປັນເທື່ອທີສອງ ໃນໄລຍະບໍ່ເທົ່າໃດອາທິດທີ່ຜ່ານມານີ້ ຫລັງຈາກກຳລັງປະຊາທິປະໄຕຊີເຣຍປະສົບຄວາມສຳເລັດໃນເດືອນແລ້ວ ໂດຍເຂົ້າຍຶດ ເອົາຫລາຍສິບບ້ານຢູ່ທາງເໜືອຂອງເມືອງ Raqqa ຊຶ່ງໃນຄວາມ ເປັນຈິງແລ້ວ ແມ່ນ ເມືອງຫລວງຂອງກຸ່ມລັດອິສລາມນັ້ນ.
