ສຳນັກງານປະທານາທິບໍດີຝຣັ່ງ ທ່ານ Francois Hollande
ກ່າວວ່າ ການກ່າວຫາວ່າ ສະຫະລັດລັກຟັງໂທລະສັບຂອງ
ທ່ານ ແລະປະທານາທິບໍດີສອງຄົນກ່ອນທ່ານນັ້ນ “ເປັນທີ່ຮັບ
ເອົາບໍ່ໄດ້” ແລະກ່າວເພີ້ມອີກວ່າ ຝຣັ່ງຈະບໍ່ຍອມ ໃຫ້ສິ່ງໃດກໍ
ຕາມ ທີ່ເປັນໄຂຂົ່ມຂູ່ຕໍ່ຄວາມປອດໄພຂອງຕົນ ເກີດຂຶ້ນ
ເດັດຂາດ.
ທ່ານ Hollande ໄດ້ອອກຖະແຫລງການສະບັບນຶ່ງໃນວັນພຸດ
ມື້ນີ້ ຫລັງຈາກໄດ້ປະຊຸມກັບຄະນະສະພາປ້ອງກັນຊາດເພື່ອ
ສົນທະນາເຖິງການເປີດເຜີຍ ເອກກະສານລັບຂອງ Wikileaks
ໂດຍກ່າວວ່າ ອົງການຄວາມໝັ້ນຄົງແຫ່ງຊາດ ສະຫະລັດ ໄດ້
ສອດແນມເບິ່ງປະທານາທິບໍດີຝຣັ່ງ ສາມຄົນທີ່ຜ່ານມາ.
ບັນດາເຈົ້າໜ້າທີ່ ໄດ້ຮຽກເອກອັກຄະລັດຖະທູດສະຫະລັດປະຈຳຝຣັ່ງ ທ່ານນາງ Jane
Harley ເຂົ້າພົບ ທີ່ຫ້ອງການລັດຖະມົນຕີຕ່າງປະເທດຝຣັ່ງ ທ່ານ Laurent Fabius
ເພື່ອສົນທະນາກ່ຽວກັບບັນຫາດັ່ງກ່າວ.
ເອກກະສານຂອງ wikileaks ໄດ້ພິມເຜີຍແຜ່ໂດຍໜັງສືພິມລາຍວັນ Libera-tion ຂອງ
ຝຣັ່ງ ແລະໂດຍເວັບໄຊທ໌ສືບສວນ Mediapartl. ຍັງບໍ່ທັນມີການຢັ້ງ ຢືນເຖິງຄວາມຖືກ
ຕ້ອງຂອງເອກກະສານນີ້ເທື່ອ.
ທຳນຽບຂາວ ບໍ່ໄດ້ແຈ້ງໃຫ້ຊາບວ່າ ສະຫະລັດ ໄດ້ຕິດຕາມສັງເກດເບິ່ງ ທ່ານ Hollande
ຫລືບັນດາຜູ້ທີ່ຮັບຕຳແໜ່ງກ່ອນທ່ານ ຫລືບໍ່ ແຕ່ໄດ້ເນັ້ນໜັກວ່າ ບໍ່ໄດ້ແນເປົ້າໝາຍໃສ່
ການຕິດຕໍ່ສື່ສານຂອງທ່ານ Hollande ແລະກໍຈະບໍ່ກະທຳການດັ່ງກ່າວ.
ໂຄສົກອົງການຄວາມໝັ້ນຄົງແຫ່ງຊາດສະຫະລັດ NSA ທ່ານ Ned Price ກ່າວວ່າ ລັດຖະບານທ່ານ Barack Obama ບໍ່ໄດ້ປະຕິບັດງານສືບລັບໃນ ຕ່າງປະເທດໃດໆ
ຍົກເວັ້ນ ໃນກໍລະນີທີ່ມີ “ຈຸດປະສົງໃນດ້ານຄວາມໝັ້ນຄົງ ແຫ່ງຊາດທີ່ສະເພາະເຈາະຈົງ ແລະມີເຫດມີຜົນພຽງພໍ” ອັນເປັນມາດຕະຖານ ທີ່ທ່ານກ່າວວ່າ ນຳໃຊ້ກັບທັງບັນດາຜູ້
ນຳຂອງໂລກແລະ “ປະຊາຊົນຄົນທຳມະດາສາມັນ.”
ທ່ານ Price ກ່າວວ່າ “ພວກເຮົາປະຕິບັດງານຢ່າງໃກ້ຊິດ ກັບຝຣັ່ງ ໃນທຸກໆ ດ້ານກ່ຽວ
ກັບຄວາມເປັນຫ່ວງຂອງນາໆຊາດ ແລະຝຣັ່ງເປັນພາຄີທີ່ຂາດບໍ່ໄດ້.
