ກອງທັບ ສະຫະລັດ ເວົ້າວ່າເຮືອບິນລົບ ຈີນ ໄດ້ບິນເຂົ້າໃກ້ນຶ່ງໃນເຮືອບິນສຳຫຼວດຂອງເຂົາເຈົ້າ ໃນລະຫວ່າງການປະຕິບັດພາລະກິດບິນລາດຕະເວນໃນທະເລຈີນໃຕ້ເມື່ອອາທິດທີ່ຜ່ານມາ.
ຖະແຫຼງການໂດຍກອງບັນຊາການ ສະຫະລັດ ໃນເຂດອິນໂດ-ປາຊີຟິກ ກ່າວວ່າ ເຮືອບິນລົບ J-16 ຂອງ ຈີນ “ໄດ້ບິນມາຢູ່ດັງ” ຂອງເຮືອບິນ RC-135 ໂດຍກົງໃນການເຄື່ອນໄຫວທີ່ດຸຮ້າຍຢ່າງບໍ່ຈຳເປັນ,” ຈົນບັງຄັບໃຫ້ຄົນຂັບເຮືອບິນ ຕ້ອງບິນຜ່ານອາກາດທີ່ປັ່ນປ່ວນ ຍ້ອນເຮືອບິນລົບນັ້ນ.
ພາບວິດີໂອຂອງເຫດການຈາກຫ້ອງຂັບເຮືອບິນຂອງເຮືອບິນສຳຫຼວດ ສະຫະລັດ ໄດ້ສະແດງໃຫ້ເຫັນເຮືອບິນສັ່ນບໍ່ດົນຫຼັງຈາກເຮືອບິນລົບ ຈີນ ໄດ້ບິນຂ້າມເສັ້ນທາງການບິນຂອງເຂົາເຈົ້າ.
ຖະແຫຼງການໄດ້ກ່າວວ່າ ເຮືອບິນສຳຫຼວດ RC-135 ໄດ້ບິນປະຕິບັດການ ທີ່ “ປອດໄພປະຈຳວັນຢູ່ທະເລຈີນໃຕ້ໃນໜ່ານຟ້າສາກົນ, ໂດຍສອດຄ່ອງກັບກົດ ໝາຍສາກົນ.”
ເຫດການຂອງອາທິດແລ້ວນີ້ໄດ້ເກີດຂຶ້ນ 6 ເດືອນຫຼັງຈາກເຫດການທີ່ຄ້າຍຄືກັນໃນເດືອນທັນວາທີ່ຜ່ານມາ, ເວລາທີ່ຈຸບິນຂອງເຮືອບິນ RC-135 ອີກລຳນຶ່ງຖືກບັງຄັບໃຫ້ທຳການເຄື່ອນໄຫວຫຼົບຫຼີກ ເພື່ອຫຼີກລ່ຽງການຕຳກັນກັບເຮືອບິນລົບ ຈີນ.