ທຳນຽບຂາວຂູ່ວ່າ ຈະທຳການລົງໂທດຕໍ່ນິກາຣາກົວ ຫຼັງຈາກໄດ້ກ່ຽວກັບການຈຳກັດຮັດແຄບສະບັບໃໝ່ ຕໍ່ເວເນຊູເອລາ ແລະຄິວບາ ໃນວັນພະຫັດວານນີ້ ໂດຍເອີ້ນປະເທດທັງສາມນີ້ວ່າ “ສາມປະເທດຜະເດັດການ.”
ໃນການກ່າວຄຳປາໄສທີ່ນະຄອນໄມອາມີນັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດ ທ່ານຈອນ ໂບລຕັນກ່າວວ່າ ສະຫະລັດ “ຈະບໍ່ຍອມເອົາໃຈພວກຜະເດັດການ ແລະພວກທໍລະລາດ ໃກ້ກັບປະເທດຂອງພວກເຮົາ ໃນຊີກໂລກນີ້ອີກຕໍ່ໄປແລ້ວ.”
ທ່ານໂບລຕັນໄດ້ປຽບທຽບພວກຜູ້ນຳຂອງປະເທດທັງສາມ ຄືທ່ານນິໂກລາສ ມາດູໂຣ ແຫ່ງເວເນຊູເອລາ ທ່ານຣາອູລ ກາສໂຕຣ ແຫ່ງຄິວບາແລະທານແດນຽລ ໂອເຕກ້າ ແຫ່ງນິກາຣາກົວ ວ່າ ເປັນຕົວຕະລົກໃນໜັງ Three Stooges.
ທ່ານໂບລຕັນກ່າວວ່າ “ສາມຈອມຜະເດັດການທີ່ວາງໂຕເປັນນາຍທະຫານ ເປັນ ນັກປະຕິວັດ ເປັນສັນຍາລັກ ແລະເປັນແສງສະຫວ່າງ ແຕ່ທີ່ຈິງແລ້ວ ພວກເຂົາແມ່ນເປັນຕົວຕະລົກ ທີ່ໜ້າສົງສານ ມີລັກສະນະ ຄ້າຍຄື Larry, Culy ແລະ Moe ຫຼາຍກ່ອນ.
ການລົງໂທດເທື່ອໃໝ່ຕໍ່ເວເນຊູເອລາ ແມ່ນແນເປົ້າໃສ່ຕະຫຼາດຄຳຂອງປະເທດ ໂດຍຫ້າມບໍ່ໃຫ້ປະຊາຊົນແລະບໍລິສັດຂອງອາເມຣິກັນ ເຮັດທຸລະກິດທີ່ພົວພັນການຊື້ຂາຍຄຳ ກັບເວເນຊູເອລາ.
ສະຫະລັດໄດ້ກ່າວຫາມາດູໂຣວ່າ ສົ່ງຄຳແບບຜິດກົດໝາຍຫຼາຍກວ່າ 20 ລ້ານໂຕນ ໄປຍັງເທີກີ ເພື່ອຫລົບຫລີກການລົງໂທດຂອງສະຫະລັດ.
ທ່ານໂບລຕັນ ໄດ້ຖິ້ມໂທດໃສ່ຄິວບາວ່າ ໃຫ້ການຊ່ອຍເຫຼືອແກ່ລັດຖະບານມາດູໂຣໃນເວເນຊູເອລາ ບ່ອນທີ່ເສດຖະກິດພວມປະສົບກັບບັນຫາ ໄດ້ເຮັດໃຫ້ເກີດອັດຕາເງິນເຟີ້ສູງ ຂາດແຄນອາຫານການກິນແລະສິນຄ້າທີ່ຈຳເປັນຕ່າງໆ ແລະລະບອບປະຊາທິປະໄຕໄດ້ພັງທະລາຍລົງ.
ທ່ານກ່າວວ່າ ສະຫະລັດໄດ້ຈັດເອົາ 20 ກວ່າສ່ວນບຸກຄົນແລະອົງການຕ່າງໆຂອງຄິວບາເຂົ້າໃນລາຍຊື່ທີ່ຖືກຫ້າມບໍ່ໃຫ້ເຮັດທຸລະກິດກັບຊາວອາເມຣິກັນ.
ທ່ານໂບລຕັນໄດ້ເຕືອນໂອເຕກ້າ ກ່ຽວກັບການສືບຕໍ່ປາບປາມ ພວກຝ່າຍຄ້ານຢ່າງຮຸນແຮງ.
ສະຫະລັດໄດ້ທຳການລົງໂທດໄປແລ້ວ ຕໍ່ພວກເຈົ້າໜ້າທີ່ອະວຸໂສຂອງນິກາຣາກົວຫຼາຍໆຄົນ ກ່ຽວກັບການກໍ່ຄວາມຮຸນແຮງ ແລະການສໍ້ລາດບັງຫຼວງ
