ສະຫະລັດ ໄດ້ປະກາດໃນວັນອັງຄານວານນີ້ ການລົງໂທດທາງ
ດ້ານການເງິນ ຕໍ່ບັນດາຜູ້ນຳລັດອິສລາມທີ່ສຳຄັນ ແລະຜູ້ທີ່ກ່ຽວ
ຂ້ອງທາງດ້ານການເງິນ ແລະໄດ້ລະບຸຕົວບຸກຄົນ ແລະກຸ່ມຕ່າງໆ
ໃຫ້ເປັນ ພວກນັກຕໍ່ສູ້ກໍ່ການຮ້າຍຕ່າງຊາດ ຕື່ມອີກດ້ວຍ.
ກະຊວງການເງິນ ແລະ ກະຊວງການຕ່າງປະເທດສະຫະລັດ
ໄດ້ທຳການລົງໂທດຕໍ່ທັງໝົດ 30 ບຸກຄົນ ແລະກຸ່ມຕ່າງໆ ໃນອັນ
ທີ່ເຈົ້າໜ້າທີ່ອາວຸໂສ ລັດຖະບານທ່ານໂອບາມາ ທ່ານນຶ່ງ ໄດ້
ອະທິບາຍວ່າ ເປັນການ “ເພີ້ມລະດັບຂຶ້ນແທ້ໆ” ໂດຍສະຫະລັດ
ເພື່ອປ້ອງກັນ ບໍ່ໃຫ້ກຸ່ມ ລັດອິສລາມ ຈາກການໃຊ້ລະບົບການເງິນ
ຂອງໂລກໃຫ້ເປັນປະໂຫຍດ.
ອັນນີ້ ແມ່ນເຊື່ອວ່າ ຈະເປັນການທີ່ສຳຄັນທີ່ສຸດຂອງສະຫະລັດ ທີ່ພະ ຍາຍາມ ເພື່ອຕັດການສະໜັບສະໜູນທາງການເງິນ ຕໍ່ກຸ່ມດັ່ງກ່າວ.
ກະຊວງການເງິນ ໄດ້ວາງມາດຕະການລົງໂທດ ຕໍ່ ບຸກຄົນສຳຄັນຂອງກຸ່ມລັດອິສລາມຈຳນວນ 15 ຄົນ ລວມທັງພວກທີ່ສະໜັບສະໜູນແລະ ພວກທີ່ອຳນວຍຄວາມສະດວກ ນຳດ້ວຍ. ການລະບຸຊື່ດັ່ງກ່າວ ແມ່ນເພັ່ງເລັງໃສ່ “ການໂຈມຕີ” ສະຖາບັນການເງິນຂອງກຸ່ມ ໂດຍການຍັບຍັ້ງ ບັນດາຜູ້ນຳຂອງກຸ່ມ ແລະ ພວກທີ່ອຳນວຍຄວາມສະດວກ ຈາກການນຳໃຊ້ລະບົບການເງິນຂອງສາກົນ. ການກຳນົດນັ້ນຍັງຈະສະໜັບ ສະໜູນ ຍຸດທະສາດຂອງປະທານາທິບໍດີ ບາຣັກ
ໂອບາມາ ເພື່ອຈະ “ລົບກວນ ແລະໃນທີ່ສຸດທຳລາຍ ພວກລັດອິສລາມຫຼື ISIL” ອີງຕາມ
ຖະແຫລງການສະບັບນຶ່ງຂອງກະຊວງການເງິນ.
ທ່ານ Adam Szubin ຮັກສາການ ແທນ ລັດຖະມົນຕີຊ່ວຍວ່າການ ຮັບຜິດຊອບດ້ານກໍ່ການຮ້າຍ ແລະສືບລັບການເງິນ ເວົ້າວ່າ “ກະຊວງການເງິນຍັງບໍ່ລົດລະ ກ່ຽວກັບ ການຫລຸດຜ່ອນ ກຳລັງທາງດ້ານການເງິນຂອງພວກ ISIL ໃຫ້ຈົນໝົດ ແລະບໍໍ່ຍອມໃຫ້ພວກກຸ່ມກໍ່ການຮ້າຍ ທີ່ໂຫດຫ້ຽມນີ້ ເຂົ້າໄປນຳໃຊ້ລະບົບການເງິນສາກົນ.”
ກະຊວງການເງິນ ໄດ້ວາງມາດຕະການລົງໂທດ ຕໍ່ບັນດາເຈົ້າໜ້າທີ່ ລັດອິສລາມ ຜູ້ທີ່ປະຕິບັດການຢູ່ໃນ ອັຟການິສຖານ ປາກິສຖານ ລີເບຍ ເຢເມັນ ແລະ ຕູນີເຊຍ. ລວມຢູ່ໃນບຸກຄົນດັ່ງກ່າວ ທີ່ຕົນໄດ້ລົງໂທດຢູ່ໃນຊີເຣຍ ແມ່ນມີ ທ້າວ Aqsa Mahmood ສັນຊາດອັງກິດ ຜູ້ທີ່ຖືກກ່າວຫາວ່າ ຊ່ວຍເກນເອົານັກຮຽນຍິງ 3 ຄົນຈາກອັງກິດ ເມື່ອຕົ້ນປີນີ້ ເພື່ອຫລົບໜີ ອອກຈາກອັງກິດ ໄປເປັນເມຍຂອງພວກນັກຕໍ່ສູ້ລັດອິສລາມ.
