ເຈົ້າໜ້າທີ່ໄດ້ກ່າວໃນວັນພະຫັດມື້ນີ້ວ່າ ບັນດານັກການທູດ
ຈາກສະຫະລັດ ຣັດເຊຍ ແລະອົງການສະຫະປະຊາຊາດ
ຈະພົບປະກັນ ທີ່ນະຄອນເຈນີວາ ໃນວັນສຸກມື້ອື່ນນີ້ ເພື່ອປຶກສາ
ຫາລືກັນ ຊອກຫາຊ່ອງທາງ ສ້າງຄວາມກ້າວໜ້າໃຫ້ແກ່ຂັ້ນຕອນ
ສັນຕິພາບ ໃນຊິເຣຍ ທີ່ປະສົບກັບໄພສົງຄາມນັ້ນ.
ຮອງລັດຖະມົນຕີການຕ່າງປະເທດຂອງຣັດເຊຍ ທ່ານ Gennady
Gatilov ໄດ້ບອກກັບອົງການຂ່າວ RIA ຂອງຣັດເຊຍວ່າ
Moscow ຈະໃຊ້ກອງປະຊຸມດັ່ງກ່າວເພື່ອຮຽກຮ້ອງ “ໃຫ້ມີການ
ດຳເນີນຄວາມພະຍາຍາມຮ່ວມກັນເພີ້ມຂຶ້ນ” ໃນການຕໍ່ຕ້ານພວກ
ກໍ່ການຮ້າຍ.
ສະຫະລັດ ແລະຣັດເຊຍ ໄດ້ປະສົບກັບອຸບປະສັກ ໃນການຊອກຫາຈຸດຢືນຮ່ວມກັນ ໃນຂະ ນະທີ່ຕ່າງຝ່າຍຕ່າງກໍທຳການໂຈມຕີທາງການທະຫານຢູ່ໃນຊີເຣຍບ່ອນທີ່ສົງຄາມກາງເມືອງ ໄດ້ສັງຫານຜູ້ຄົນຫຼາຍກວ່າ 2 ແສນ 5 ໝື່ນຄົນແລ້ວ.
ການໂຈມຕີທາງອາກາດຂອງສະຫະລັດສ່ວນໃຫຍ່ ແມ່ນໄດ້ແນເປົ້າໝາຍໃສ່ກຸ່ມຫົວຮຸນແຮງ ລັດອິສລາມ ໃນຂະນະທີ່ການຖິ້ມລະເບີດສ່ວນໃຫຍ່ຂອງຣັດເຊຍແມ່ນແນໃສ່ພວກ ຕໍ່ຕ້າລັດ ຖະບານຊີເຣຍກຸ່ມອື່ນໆ ຮວມທັງບາງກຸ່ມ ທີ່ໄດ້ຮັບການໜຸນຫຼັງໂດຍປະເທດຕາເວັນຕົກ.
ກະຊວງການ ຕ່າງປະເທດສະຫະລັດ ໄດ້ຢືນຢັນກ່ຽວກັບກອງປະຊຸມໃນວັນສຸກມື້ອື່ນນີ້ ໂດຍ ກ່າວວ່າ ນັກການທູດຂອງວໍຊີງຕັນ ຈະເປັນຜູ້ນຳພາ ໂດຍລັດຖະມົນຕີຊ່ອຍວ່າການຕ່າງປະເທດ ທ່ານນາງ Anne Patterson.
ໂຄສົກຂອງກະຊວງການຕ່າງປະເທດ ທ່ານ John Kirby ກ່າວວ່າ ກອງປະຊຸມດັ່ງກ່າວນີ້ ຈະເພັ່ງເລັງໃສ່ຄວາມພະຍາຍາມ ໃຫ້ມີການໂອນອຳນາດທາງການເມືອງ ພ້ອມທັງ “ຂອບ ແລະໂຄງຮ່າງການຢຸດຍິງ.”
ທ່ານ Staffan de Mistura ທູດ ສັນຕິພາບພິເສດຂອງອົງການສະຫະປະຊາຊາດ ຮັບຜິດ ຊອບເລື້ອງຊີເຣຍ ຈະເຂົ້າຮ່ວມໃນກອງປະຊຸມຢູ່ເຈນີວາດ້ວຍ ຊຶ່ງເປັນສ່ວນນຶ່ງຂອງຄວາມພະຍາຍາມທາງດ້ານການທູດໃນຂອບເຂດທີ່ ກວ້າງຂວາງ ທີ່ແນໃສ່ຫາທາງຍຸຕິບັນຫາຂັດ ແຍ້ງໃນຊີເຣຍ.
