ສະຫະລັດກ່າວວ່າ ຕົນຈະບໍ່ຮັບຮູ້ຜົນການເລືອກຕັ້ງສະພາຣັດເຊຍ ທີ່ກຳນົດຈະຈັດຂຶ້ນໃນເຂດ Crimea ທີ່ຣັດເຊຍຍຶດຄອງ ໃນວັນອາທິດມື້ອື່ນນີ້.
ໂຄສົກກະຊວງຕ່າງປະເທດສະຫະລັດ ທ່ານ John Kirby ກ່າວຢູ່ໃນຖະແຫຼງ ການວ່າ “ທ່າທີຂອງພວກເຮົາກ່ຽວກັບເຂດ Crimea ແມ່ນເປັນທີ່ຈະແຈ້ງ ກໍຄື ແຫຼມດັ່ງກ່າວຍັງຄົງເປັນພາກສ່ວນນຶ່ງຂອງ Ukraine. ການລົງໂທດທີ່ພົວພັນ ກັບເຂດ Crimea ຕໍ່ຣັດເຊຍ ນັ້ນ ຍັງຈະມີຜົນບັງຄັບຕໍ່ໄປຈົນກວ່າຣັດເຊຍໂອນການຄວບຄຸມເຂດ Crimea ຄືນໃຫ້ແກ່ Ukraine.
ທ່ານ Kirby ໄດ້ກ່າວເພີ້ມອີກວ່າ “ພວກເຮົາຍັງສືບຕໍ່ມີຄວາມເປັນຫ່ວງຢ່າງເລິກເຊີ່ງ ກ່ຽວກັບສະຖານະການດ້ານມະນຸດສະທຳ ຢູ່ໃນເຂດ Crimea ຮວມທັງສະຖານະພາບ ຂອງປະຊາຄົມຊົນກຸ່ມນ້ອຍເຜົ່າ Tatar ແລະລາຍງານກ່ຽວ ກັບການຫາຍສາບສູນຜູ້ຄົນຈຳ ນວນນຶ່ງ ແລະການລະເມີດສິດທິມະນຸດ.
ລັດຖະມົນຕີຕ່າງປະເທດ Ukraine ທ່ານ Pavlo Klimkin ກ່າວວ່າ ການເລືອກຕັ້ງ “ແມ່ນມີຂຶ້ນແບບຜິດກົດໝາຍໂດຍສິ້ນເຊີງ” ແລະທ່ານມີຄວາມເປັນຫ່ວງກ່ຽວກັບຈຳນວນທະ ຫານຣັດເຊຍ ທີ່ “ມີຫລາຍຜິດປົກກະຕິ” ຢູ່ໃນເຂດ Crimea.
ຣັດເຊຍໄດ້ປະກາດຮວມເອົາເຂດ Crimea ເຂົ້າເປັນດິນແດນສ່ວນນຶ່ງຂອງຕົນໃນເດືອນມີນາ ປີ 2014 ຫລໍັງຈາກການລົງປະຊາມະຕິທ້ອງຖິ່ນ ທີ່ກອງປະຊຸມ ສະມັດຊາໃຫຍ່ ສະຫະປະຊາຊາດ ເກືອບເປັນເອກກະສັນຮ້ອງວ່າ ຜິດກົດໝາຍ.
ປະທານາທິບໍດີຣັດເຊຍ ທ່ານ Vadimir Putin ໄດ້ສາລະພາບວ່າ ທະຫານຂອງທ່ານໄດ້ເຄື່ອນກຳລັງເຂົ້າຄວບຄຸມຈຸດຍຸດທະສາດແຄມທະເລດຳດັ່ງກ່າວ ກ່ອນການລົງປະຊາມະຕິມີຂຶ້ນ ແຕ່ໄດ້ປະຕິເສດຊໍ້າແລ້ວຊໍ້າອີກຕໍ່ການໜູນຫຼັງ ພວກກະບົດທີ່ສະໜັບສະໜູນມົສກູ ຢູ່ໃນພາກຕາເວັນອອກຂອງ Ukraine ທີ່ໄດ້ເຮັດໃຫ້ມີຜູ້ເສຍຊີວິດເກືອບ 10,000 ຄົນແລ້ວ ນັບແຕ່ໄດ້ເລີ້ມໃນເດືອນເມສາ ປີ 2014.
