ບັນດານັກການທູດລະດັບສູງຂອງສະຫະລັດ ຣັດເຊຍ ແລະຕາເວັນອອກກາງ ຈະພະຍາຍາມສະສາງຂໍ້ຕົກລົງການຢຸດຍິງ ຊີເຣຍ ທີ່ລົ້ມແຫລວໃນວັນເສົາມື້ອຶ່ນນີ້ ພ້ອມກັບການສົນທະນາທີ່ນະຄອນ Lausanne ປະເທດ Switzerland ຕິດຕາມມາດ້ວຍການປະຊຸມຕ່າງຫາກໃນວັນອາທິດທີນະຄອນລອນດອນ.
ຄວາມພະຍາຍາມຄັ້ງໃໝ່ເກີດຂຶ້ນບໍ່ຮອດສອງອາທິດ ຫລັງຈາກສະຫະລັດ ໄດ້ລົບລ້າງການເຈລະຈາສອງຝ່າຍກັບຣັດເຊຍ ແລະທັງສອງຝ່າຍໄດ້ແລກປ່ຽນເຫັນພ້ອມໃນການກ່າວຫາຊຶ່ງກັນແລະກັນ. ບັນດາເຈົ້າໜ້າທີ່ຣັດເຊຍ ກ່າວວ່າ ເຂົາເຈົ້າມີຄວາມຫວັງຕໍ່ຜົນທີ່ອອກມາໃນທາງບວກ.
ແຕ່ວ່າໃນຂະນະທີ່ການສູ້ລົບຍັງດຳເນີນຢູ່ໃນເຂດຍຶດຄອງຂອງເມືອງ Aleppo ບັນດານັກ ວິເຄາະພາກັນມີຄວາມສົງໄສວ່າຈະບໍ່ມີການຢຸດຍິງໃດໆ.
ຮອງບັນນາທິການໜັງສືພິມ Yezhenedelny Zhumal (Weekly Journal) ທ່ານ Alexander Golts ກ່າວວ່າ “ແລະຣັດເຊຍໂຈມຕີຢ່າງໜັກເພື່ອໃຫ້ການສະໜັບສະໜູນກຳລັງທີ່ມີຄວາມອິດເມື່ອຍຂອງ ປະທານາທິບໍດີ Bashar al-Assad ໃນຄວາມພະຍາຍາມທີຈະຄວບຄຸມເອົາເມືອງ Aleppo. ບັດນີ້ ມັນເປັນທີ່ແຈ້ງຂາວວ່າ ເປົ້າໝາຍຂອງຣັດເຊຍບໍ່ແມ່ນການຕໍ່ສູ້ກັບພວກກໍ່ການຮ້າຍຈາກລັດອິສລາມ ຫລື IS (Islamic State) ຫລື Jabhat al-Nausra ເປົ້າໝາຍຂອງຣັດເຊຍແມ່ນການສະໜັບສະໜູນ ທ່ານ Assad. ແລະຈຸດສຳຄັນໃນຄວາມກົງກັນຂ້າມລະຫວ່າງຕາເວັນຕົກ ແລະ ຣັດເຊຍ.”
ຫລາຍຄົນເຊື່ອວ່າ ກ່ອນອຶ່ນໝົດຣັດເຊຍຕ້ອງການຊ່ວຍເຫລືອ ທ່ານ Assad ຄວບຄຸມເອົາເມືອງ Aleppo ເພື່ອວ່າເຂົາເຈົ້າສາມາດຢູ່ໃນໜ້າທີ່ອັນເຂັ້ມແຂງໃນການເຈລະຈາຕໍ່ລອງ.
ແຕ່ວ່າຣັດເຊຍຍັງໄດ້ເຕືອນກຳລັງແນວໂຮມທີ່ແນໃສ່ພວກທະຫານບ້ານ ບອກ ໃຫ້ເຂົາເຈົ້າຢູ່ຫ່າງໄກ ແລະໄດ້ຂົ່ມຂູ່ທີ່ຈະຍິງເຮືອບິນໃດໆທີ່ເຂົ້າມາໃກ້ກຳລັງທະຫານຣັດເຊຍ ແລະຊີເຣຍ.
ໃນຂະນະທີ່ການຢຸດຍິງເປັນທີ່ຕ້ອນຮັບ ບັນດານັກວິເຄາະກ່າວວ່າ ຄວາມເປັນຫວ່ງໃຫຍ່ກໍຄືການປ້ອງກັນການແຜ່ຂະຫຍາຍຂັດແຍ້ງທີ່ແຜ່ລາມອອກໄປໃນຊີເຣຍ.
ທ່ານ Golts ກ່າວວ່າ “ສາມອາທິດທີ່ຜ່ານມາພວກເຮົາໄດ້ສົນທະນາ ໃນຄວາມເປັນໄປໄດ້ ຂອງການຮ່ວມມືທາງທະຫານ ລະຫວ່າງຣັດເຊຍ ແລະສະຫະລັດ. ບັດນີ້ສິ່ງທີ່ອາດເປັນໄປໄດ້ທັງໝົດນັ້ນໄດ້ຫາຍສາບສູນໄປ. ເປົ້າໝາຍສຳຄັນທີ່ເປັນຄວາມຈິງກໍຄືຫາທາງຫລີກຫລ່ຽງການປະເຊີນໜ້າກັນທາງທະຫານ ບັດນີ້ລະຫວ່າງສະຫະລັດ ແລະຣັດເຊຍ ຢູ່ໃນຊີເຣຍ.”
