ຢູ່ທີ່ສະຫະລັດນີ້ ຜູ້ພິພາກສາລັດຖະບານກາງ ໄດ້ກໍານົດເອົາວັນທີ 12 ເດືອນກັນຍາ
ເປັນມື້ເລີ້ມຕົ້ນດໍາເນີນຄະດີນາຍ Victor Bout ນາຍທະຫານເກົ່າໃນກອງທັບຂອງອະ
ດີດສະຫະພາບ ໂຊວຽດ ທີ່ຖືກກ່າວຫາວ່າ ເປັນນຶ່ງໃນບັນດາພວກພໍ່ຄ້າອາວຸດລາຍ
ໃຫຍ່ທີ່ສຸດຂອງໂລກ.
ນາຍ Bout ໄດ້ໄປປາກົດໂຕຕໍ່ໜ້າຜູ້ພິພາກສາ ເພື່ອໃຫ້ການກ່ອນການດໍາເນີນຄະດີ ທີ່ນະຄອນນີວຢອກໃນວັນສຸກຜ່ານມາ ຊຶ່ງເປັນການໄປປາກົດໂຕຕໍ່ສານຂອງສະຫະ ລັດຄັ້ງທີສອງຂອງຜູ້ກ່ຽວ ນັບແຕ່ຖືກສົ່ງໂຕອອກຈາກປະເທດໄທມາໃນເດືອນພະຈິກແລ້ວນີ້.
ນາຍ Bout ທີ່ໄດ້ຖືກຕັ້ງສົມຍານາມໃຫ້ວ່າ ພໍ່ຄ້າມໍລະນະ ຫລື The Merchant of Death ນັ້ນ ຖືກກ່າວຫາວ່າ ໃຊ້ເຮືອບິນເປັນຝຸງ ບັນທຸກສິນຄ້າເພື່ອສົ່ງພວກອາວຸດຍຸດໂທປະກອນໃຫ້ພວກກະບົດແລະພວກຫົວຮຸນແຮງທີ່ຂົງເຂດອະເມລິກາໃຕ້ ໃນອະຟຣິກາ ແລະໃນພາກຕາເວັນອອກກາງ. ນາຍ Bout ກ່າວວ່າ ລາວດໍາເນີນທຸລະກິດການຂົນສົ່ງທາງອາກາດ ທີ່ຖືກຕ້ອງຕາມກົດໝາຍ.
ນາຍ Bout ຖືກຈັບກຸມທີ່ໄທເມື່ອ 2 ປີຜ່ານມາ ໃນການປະຕິບັດງານລັບຂອງພວກນັກສືບ
ສະຫະລັດ ທີ່ປອມເປັນພວກຜູ້ຕາງໜ້າກຸ່ມກະບົດ FARC ໃນປະເທດໂຄລົມເບຍ ໄປທາບ
ທາມຂໍຊື້ອາວຸດຈາກຜູ້ກ່ຽວ.
ນາຍ Bout ໄດ້ຖືກສົ່ງໂຕມາສະຫະລັດໃນປີແລ້ວນີ້ ຫລັງຈາກການດໍາເນີນການຫາທາງ
ຫລີກລ້ຽງທາງກົດໝາຍມາເປັນເວລາສອງປີ. ລັດຖະບານຣັດເຊຍປະນາມການສົ່ງໂຕນາຍ
ບຸດວ່າ ເປັນການກະທໍາທີ່ຜິດກົດໝາຍແລະທາງການເມືອງ.
