ກ່ອນອອກເດີນທາງກັບຄືນສະຫະລັດນັ້ນ ປະທານາທິບໍດີ
ໂອບາມາ ໄດ້ພົບປະກັບຄູ່ຕໍາແໜ່ງຂອງທ່ານຈາກຣັດເຊຍ
ທ່ານ Dmitry Medvedev ຢູ່ຂ້າງນອກກອງປະຊຸມສຸດຍອດກຸ່ມ APEC ໃນວັນອາທິດ
ມື້ນີ້ ເພື່ອທໍາການໂອ້ລົມສົນທະນາກັນເລື້ອງສົນທິສັນຍາວ່າດ້ວຍການລົດຜ່ອນອາວຸດນີວ
ເຄລຍຕະຫລອດທັງເລື້ອງກອງປະຊຸມສຸດຍອດຂອງກຸ່ມ NATO ທີ່ຈະມາເຖິງນີ້ແລະເລື້ອງ ອື່ນໆອີກ.
ທ່ານໂອບາມາໄດ້ກ່າວຢໍ້າເຖິງຄວາມຕັ້ງໃຈອັນແນ່ວແນ່ຂອງທ່ານ ທີ່ຈະເຮັດສົນທິສັນຍາ
START ໃຫ້ສໍາເລັດເສັດສິ້ນລົງໄປ ຊຶ່ງສົນທິສັນຍາທີ່ວ່ານີ້ຈະລົດກໍາລັງອາວຸດນີວເຄລຍ
ຂອງສະຫະລັດແລະຂອງຣັດເຊຍ ລົງຫລາຍເຖິງ 1 ສ່ວນ 3 ນັ້ນ.
ທ່ານໂອບາມາກ່າວຕື່ມວ່າ ທ່ານໄດ້ສື່ສານໃຫ້ລັດຖະສະພາສະຫະລັດຮູ້ແລ້ວວ່າ ການໃຫ້
ສັດຍາບັນແກ່ຂໍ້ຕົກລົງ START ແມ່ນເປັນບຸລິມະສິດຂອງລັດຖະບານຂອງທ່ານ.
ສອງປະທານາທິບໍດີໄດ້ລົງນາມໃນສົນທິສັນຍາ START ໃນເດືອນເມສາຜ່ານມາ ແຕ່ທາງ
ສະພານິຕິບັນຍັດຂອງທັງສອງປະເທດຍັງບໍ່ທັນໄດ້ໃຫ້ສັດຕະຍາບັນເທື່ອ.
ໃນເລື້ອນຶ່ງອີກ ທ່ານ Medvedev ກ່າວວ່າ ທັງສອງຝ່າຍໄດ້ທໍາຄວາມຄືບໜ້າຢ່າງຫລວງ
ຫລາຍກ່ຽວກັບຄວາມສົນໃຈຂອງຣັດເຊຍໃນການຢາກເຂົ້າຮ່ວມໃນອົງການການຄ້າໂລກນັ້ນ.
ການພົບປະຫາລືກັນນີ້ຍັງໄດ້ເພ່ງເລັງໃສ່ເລື້ອງກອງປະຊຸມສຸດຍອດຂອງກຸ່ມເນໂຕຄັ້ງຕໍ່ໄປ ທີ່
ມີຂຶ້ນໃນນະຄອນ Lisbon ທີ່ມີວັດຖຸປະສົງ ເພື່ອປັບປຸງສາຍພົວພັນຂອງຣັດເຊຍໃຫ້ດີຂຶ້ນ
ກັບກຸ່ມເນໂຕ ເລື້ອງການເສດຖະກິດໂລກ ສະຖານະການໃນອັຟການິສຖານ ແລະການລົງ ໂທດຕໍ່ອິຣ່ານນໍາ.
ປ. ໂອບາມາ ພົບປະກັບ ປ. ເມັດວີເດັຟ
- ສິງ ບູຣົມມະວົງ
